Read Zeme Naga JOHAN 11 Bible Online

JOHAN 11 - Zeme Naga bible

JOHAN 11

¹Chunage Marile benai pe kina Marthale keloa Bethani, chi Bethani’mpeu hangkat Lazarabe ’nrâ ze bam de lei.

²Chi Marile Heguangpeu je taudui perîmyibe ne ’nnuk kai lu, pe peîtam ne pe pî nuigaipui kinapeu Lazarabe ’nrâ ze bam lei.

³Chidadege pe sipui kena ne pe dage sam lang gai ze, “Heguang gau, nang ne kehungbepeu ze ’nrâ ze la lei,” ze kacheu de lei.

⁴Kane Isua ne chize seu lu dege pa ne, “Ai ka’nrâbe zene chai ra mak lei; kane Hera ngeudirabe hang lei, chidezai Hera Na je chize ne hengêutew’ndirabe hangge zeu,” acheu bei de lei.

⁵Chunage Isua ne Marthale benai pe kinapui zai Lazarabe je hung de lei.

⁶Chidadege â pa ka’nra lei be Isua ne seube luage pa bambe bâm ge hezie kena ’nnai’ntie-bi gai di lei.

⁷Chidadege aipau chângge pa ne kenieme je, “Judia ’mbe anui tat dai kei lei,” kacheu de lei.

⁸Kenieme ne pechu, “Rabbi, Judame ne chunage ningchu tingchu ne tuâ ra peu bam ze chige nang tat dai ra mei?” kacheu de lei.

⁹Isua ne kak ze, “Mai kat lungge ’nchetkak kereu ze kena bam mak semei? Mi-mige ne tingbabe luage tatruabe â mâ-’nrap mak lei, kedeirei gu kebabe pa ngaube ziegeneu.

¹⁰Kane mi-mige de tingmuî ge tatrua dizai â, mâ-ka’nrap lei, pa ge kebabe gabe ziegeneu,” acheu bei de lei.

¹¹Acheu ze pa ne sa gai de lei, zai bechâng ge pa ne penui je, “Anui kangpeu Lazarabe â jeikeu di de lei, kane kejeibe gene pechu ’ngkiachu gai ra I tat ku lei,” kacheu de lei.

¹²Kenieme ne pechu, “Heguang gau, pa jeikeu dizai â, yi dai du lei,” acheu bei de lei.

¹³Chunage Isua â pa chaidibe rasam sa lei, kane penui â, kejeibe ge gesaube je pa ne rangbe hang ’nning gai di lei.

¹⁴Chidadege Isua ne penui je rang’nchichiak kai ze, “Lazarabe â chai de lei;

¹⁵zai ningnui hang ziegene chige I bammakbe ze a suiyi lei, chidezai ningnui ’nnum’mmi le ra hangge zeu. Kane pe tailam anui tat kei lei,” kacheu lei.

¹⁶Thomasbe, ’Mpinlungpeu ze kûpeu, ne pe kangme kenieme je, “Anui du pechu nguachai ra tat kei lei,” kacheu de lei.

¹⁷Chunage Isua wangchang dege, Lazarabe â heraw ge hezie medaine bamchang de lei be pa chî lu de lei.

¹⁸Bethani â Jerusalem taige bam lei, mail kena gum runne lei,

¹⁹zai Judame ruage misonggame ne Marthale benai Marile dage penai kinapeu deu gene penai lung tewhegei gai ra wang de lei.

²⁰Marthale ne Isua wang la de lei be seu lu dege â, pa tat ze pechu suidau de lei, Marile ne kilûng ge ’ntaukuadibe kakge zeu.

²¹Marthale ne Isua je, “Heguang gau, aige nang bam bei laîzai â a kinapeu chai ra mak te lei.

²²Zai chuna du Hera dage nang gekiebe leine ze Hera ne ningchu pei gu lei be I chî lei,” kacheu de lei.

²³Isua ne pechu, “Ning kinapeu chu dai gu lei,” acheu bei de lei.

²⁴Marthale ne pechu, “Nâlangbe mai ge ringchukadaibe ge pa chu dai gu lei be I chî lei,” kacheu de lei.

²⁵Isua ne pechu, “I chukadaibe benai keringbe lei; achu ’nnumka’mmibe kau â, pa chai di sedu ring gu lei,

²⁶zai mi-mige de I ge ring zai I ge ’nnumka’mmibe kau â, mâtew-tewsede chai ra mak lei. Aize nang ’nnum’mmi mei?” kacheu de lei.

²⁷Pa ne pechu, “Eu lei, Heguang gau, ’nnum’mmi lei; nang â Krista, Hera Na, kedeirei ge wangkeurapeu lei be I ’nnum’mmi lei,” acheu bei de lei.

²⁸Aize pa acheu sa gai lu dege, pa tat lu ze pe kinapui Marile je kû gai lu reine ze, acheu ze sa ze, “Geteiliapeu aige lamui lei, zai pa ne ningchu kû lei,” acheu bei de lei.

²⁹Zai pa chize seu lu dege, kelua ze pa zuachu lu, pe tailam tat ti de lei.

³⁰Chunage Isua â keloa lungge gut mak kerei lei, kane Marthale ne pechu suidaube bâm ge pa bam di gerei lei.

³¹Kilûng ge pe lung tewhegei gai ze, nguabamme Judame ne, Marile kelua ze chu lu pattibe ngau lu dege, heraw ge hap kai ra patbe hangge ’nning gai lu ze pe chai penui suitat ti de lei.

³²Chidadege Marile ne Isua bambe bâm ge wangchang lu, pechu ngau lu dege, pe pîkang ge keikeu lu, pechu, “Heguang gau, aige nang bam bei laîzaine â a kinapeu chai ra mak te lei,” kacheu de lei.

³³Pa hap bambe zai pa benai pechu nguawangme Judame du nguapuîhapbambe Isua ngau lu dege, pe lung deîtau di ze pe lung bamhereu di de lei;

³⁴dadege pa ne, “’Ndai’ngge ningnui pechu ’njei gai ’ndi lau?” kacheu de lei. Penui ne pechu, “Heguang gau, wang ze pie le lau,” acheu bei de lei.

³⁵Isua hap ti de lei.

³⁶Dadege Judame ne, “Ni ’ndaizeu pechu pa hung lau!” kacheu de lei.

³⁷Kane penui ruage hanggesame ne, “Pemikchitpeu mik latlupeu ne aipaupeu je chai mak ra tewchi lak semei?” kacheu de lei.

³⁸Dadege Isua ne pe lung huaipun gai dai ze, heraw ’mbe wang de lei; chi heraw ze tingchutebunglube kau lei, zai bepeirei ge tingchukâng ’mbei gai lei.

³⁹Isua ne “Chi tingchukâng ze lutua ne lau,” acheu bei lei. Dadege chi chaidipeu sipui, Marthale ne pechu, “Heguang gau, chuna â perîm bam du de lei, pa chaidibe hezie medaine chang di daseu,” kacheu de lei.

⁴⁰Isua ne pechu, “Nang ne ’nnum’mmi dizai â, Hera ngeudibe nang ngau gu lei be ningchu I rang gai mak ti lau?” kacheu de lei.

⁴¹Dadege penui ne tingchukâng lutua ’ndi de lei. Dadege Isua pe ma ’ngngangchu lu, “A peu gau, nang ne achu ’ngkingbeibe ziegene ningchu I a suiyi lei.

⁴²Nang ne a sam ’ngking’nsui bam lei be I chî lei, kane a taige baudime sapme ziegene aize I rang lei, chidezai nang ne achu lang gai bei de lei be penui ’nnum’mmi le ra hangge zeu,” kacheu de lei.

⁴³Zai pa ne acheu sa gai lu dege, pe rankai ’nrung ze, “Lazarabai, zuapat chu lau,” kacheu de lei.

⁴⁴Chaidipeu ze pe pî pe ba ramme kechaipaî ne dum lu ze pat te lei, zai pe ju du paî ne dum ’ndi de lei. Isua ne penui je rang gai ze, “Pechu heipat kai bei ze peize tatchu lau,” kacheu de lei.

⁴⁵Chipauziegene Judame ruage misonggame Marile dage wangme, pa tâtewgaibe penui ngau lu ze, pa ge ’nnum’mmi di de lei;

⁴⁶kane penui ruage hanggesame ne Pharisaime dage tat lu ze, Isua tâtewgaibe rasam ze salia bei de lei.

⁴⁷Chigum ze tingkugechîngme benai Pharisaime ne samrambeki ge bamme je kûwang’ndui gai lu, acheu sa ze, “Anui ’ndaikautew ra lau? Aipaupeu ne tâningdaulakbe ramme misongga tew daseu.

⁴⁸Aigum ze pa tewtat bam ra anui ne lun dizai â ziemmena leine ne pa ge ’nnum’mmi gu, zai Romme ne wang ze anui gu ka’nchibe bâm benai anui zat je tew’ngga gu daseu,” kacheu de lei.

⁴⁹Kane penui ruage hangkat, Kaiaphabe, chipau kum ge tingkudilangbe changpeu ne penui je, “Ningnui a mâ de chî me lei;

⁵⁰baudime hangge hangkat ne chai gai ra ningnui hangge betâusingbe tak ze ningnui ’nningchi mak lei, chidezai mi zatme leine ga gai mak ra hangge zeu,” kacheu de lei.

⁵¹Aize pe suî’nning gene sabe mak lei, kane chipau kum ge tingkudilangpeu pa changbe luigum ze heramzatme hangge Isua chaigairabe ze pa rangka’ntua lei,

⁵²zai heramzatme hang runne mak lei, kane Hera name kedeirei ge ratattime je pumkat ge nguawanggairabe hangge rangka’ntua lei.

⁵³Chigum ze chipau mai gene seu ze ’ndaigum pechu tewchat ra mei be hangge penui hedeichu di de lei.

⁵⁴Chipauziegene Isua Judame ruage ’ndûlang ze tatrua ta di de lei, kane hênam taige namdi kat Ephraim kacheube heram ge pa tat ti de lei; zai chige kenieme je ngua lu ’nnai bam di lei.

⁵⁵Chunage Judame gu Tat’ntuahengi na di de lei, zai misonggame ne penui run-runne penui je tew’nchi gai ra Tat’ntuahengi suage heram gene Jerusalem ’mbe hang kam di de lei.

⁵⁶Isua je penui peurua ze kellumki ge penui sapbe luage penui karai kat-kat je ’mpau ze, “Pa kahengîbe ge wang me ra mei se lau?” ze kacheu de lei.

⁵⁷Chunage tingkugechîngme benai Pharisaime ne mi-mige de pa ’ndaige la mei be chibe kau lazai â, pa ne peize penui je chîchang gai ra samde pei gai de lei, chidezai penui ne pechu nîm le ra hangge zeu.