Read Zeme Naga JOHAN 12 Bible Online

JOHAN 12 - Zeme Naga bible

JOHAN 12

¹Tat’ntuahengi hengîrabe hezie serukne suage Isua ne kechaibe gene kuakchugaibeipeu Lazarabe bambe bâm Bethani ge Isua chang de lei.

²Chige pe hang muîteseu penui kateleu lei; Marthale ne mâ-ka’nggua de lei, kane Lazarabe â pechu nguateume ruage hangkat chang ze bam lei.

³Marile ne hingbang châ gene taudui perîmyibe tewlube pemîhungbe pehitpi lu lu ze Isua pî ’nnuk kai de lei, zai pe peîtam ne pe pî nui de lei; dadege chi taudui rîm zene kilûng ze nampuigit ti de lei.

⁴Kane Juda Iskariotbe pe gu kenieme ruage hangkat (pechu kelutewrabe peu) ne,

⁵“’Ndaitew ze aipau taudui perîmyibe ze denari haî chum hang zua lu ze, kelaksiame je pei gai be mak lau?” ze kacheu de lei.

⁶Aize pa sabe â kelaksiame hang pa ’nningkatinggeube ne mak ze, kane pa â kahegabe kau changbe ziegene lei, zai pa ne rangkângrak tei dadege chige (rangkâng) kaibe ze pa ne lu ka’nsui lei.

⁷Isua ne, “Pe runne peize pe deu tew le lau, a kechaipum bairabe mai hangge peize pa ne chize kai le lau,

⁸kelaksiame je â pehî’nsangne ningnui ngau ze la, kane achu ze â pehî’nsangne ge ningnui ngau ra mak lei,” kacheu de lei.

⁹Judame, baudime ne pa chige la lei be chî lu dege, Isua je runne mak ze, kane Lazarabe, chi chaidibe gene pa ne kuakchugaibeipeu je du ngau le ra penui zuawang de lei.

¹⁰Chidadege tingkugechîngme ne Lazarabe je du tewchat ne ra penui pezeu peu de lei,

¹¹pe ziegene Judame misongga ze Isua ge ’nnum’mmi ze tatkamdibe ziegeneu.

¹²Bechaibe mai dege baudime misongga ze kahengîbe ge wanglume Isua Jerusalem ge wang la de lei be seu lu de lei.

¹³Chidadege ’nchangtu ramme penui tei lu, pechu suidau ra tat ti de lei, acheu ’nrung ze, “Hosanna! Tingwang ji gene wangkeupeu je peize yi lau, Israelme Wangpeu jeu!” kacheu de lei.

¹⁴Dadege Isua hekunmerângne ngau lu ze peireige chua de lei;

¹⁵“Hing se lau, Zaion na’mpui gau, pie le lau, ning Wangpeu hekunmerângne chingchua ze wang mui de lei,” acheu ze rawgai’ndibe gum zeu.

¹⁶Pe gu kenieme ne aize keraî’ngka gene chîdesi mak lei; kane Isua je hengêutew’ndi gai dege aize pe rasam hang raw gai ze pe peireige tewgai’ndibe kau de lei be penui ’nningdau dai di de lei.

¹⁷Lazarabe je heraw gene kûpat ze pechu chaidibe gene kuakchugaibe luage, pe dage bamme baudime ne aize sakkitew gai de lei.

¹⁸Baudime ne pechu suidau ra patbe deu ze â aipau ka’nchetbe ningdaulakbe pa ne tewbeibe rasam penui seulube ziegene lei.

¹⁹Chi Pharisaime ne penui karai dam ze, “Ningnui ne mâ de tewchi lak te zeî lau; pie le lau ni, kedeirei ne pe chai suitattibe zeu,” ze kacheu de lei.

²⁰Chunage kahengîbe ge kellum ra hangme ruage hanggesame â Grikme lei.

²¹Chigum ze chime zene Galili ge Beth-saida ge bambepeu Philipbe dage wang lu pechu, “A pau gau, Isua je anui ngau gai nei lei,” kacheu de lei.

²²Philipbe ne tat ze Andriabe je salia bei de lei; zai Andriabe benai Philipbe ne tat ze Isua je salia bei de lei.

²³Dadege Isua ne penai je kak ze, “Ziemmena Na je pe ngêutew’ndigairabe panehî wangchang de lei.

²⁴Pelingsing, pelingsing ze ningnui je I rang lei, chêupum kedei ge kêu gai ze chai gai makchaine â, chize pe runne acheu ze bam bam lei; kane chize chai gai dizai â, pechî misongga ze ’nchipat lei.

²⁵Pe gu keringbe je hungbe kau â, chize ga gai gu, zai ai kedeirei ge pe gu keringbe je ngaugailakbe kau â chize betunmakbe keringbe hangge tei gai gu lei.

²⁶Mi-mige de a guâ ’nggua dizai â pa a chai suihimchang ra lei; zai I bambe ge a guâ ka’ngguapeu du bam gu lei; mi-mige de a guâ ’nggua dizai â, Bepeu ne pechu pe ngêutew gu lei.

²⁷“Chuna â a keringbe je tewhereu mui de lei. Zai I ’ndaikau sa ra lau? ‘A peu gau, aipau nehî gene achu tew’nringpat kai lau’ ze I acheu ra mei? Mak lei, aipau tâudeu hanggene aipau nehî ge I wang de lei.

²⁸A peu gau, ning Na je hengêutew’ndi gai lau,” ze kacheu de lei. Chidadege tinggîm ’mbene hekuâ wangkeu ze, “I ne chize hengêutew’ndi gai ’nde lei, zai I ne chize hengêutew’ndi gai dai gu lei,” kacheu de lei.

²⁹Baudime chige sapme ne chize seu lu ze, tingcheibe kuâ de lei, kacheu de lei. Kêdame ne, “Angel’mpeu ne pechu ka’mpau de lei,” kacheu de lei.

³⁰Isua ne kak ze, “Aipau kuâ wangbe ze a hanggene mak ze, ningnui hang ziegene wang de lei, kacheu de lei.

³¹Chuna ze kedeirei ge samram de lei, chunage kedeirei gu samrampeu je tuâpat kai gu de lei;

³²zai kedeirei gene achu teichu gai dezai, I ne ziemmename ’nteumena je a dage teiwang kam gai gu lei,” ze kacheu de lei.

³³Aize pa ’ndaigumbe chit ne chai ra mei be teilia ra sa de lei.

³⁴Dadege baudime ne pechu kak ze, “Krista â betingbeta bam bam lei be ze hingde gene anui â seu lei. ’Ndaigum ze nang ne ziemmena Na je teichu sing gai ’ndu lei, ze acheuchi ra lau? Ai ziemmena Na ze châu lau?” ze kacheu de lei.

³⁵Isua ne penui je, “Ningnui dage kebabe ze pehî keduîne hang larei lei. Ningnui dage kebabe bambe luage tatrua lau, makchai â, kemuîbe ne ningnui je duî gu lei; kemuîbe ge tatruabe kau â, pa ’ndaige tat mei be chî mak lei.

³⁶Ningnui dage kebabe bambe luage kebabe ge ’nnum’mmi le lau, kebabe name ningnui chang le ra hangge zeu,” kacheu de lei. Aize Isua sa gai lu dege, pa zuapat lu ze penui ruagene ’mbia di lei.

³⁷Penui ruage ka’nchetbe ningdaulakbe ramme misongga ze pa ne tew gai bei sede, penui ne pa ge ’nnum’mmi mak tai lei;

³⁸chize â kemeu’mpeu Isaiabe ne ranggaibe tewpui gai ra chang de lei: “Tingwang gau anui paugaibe châu ne ’nnum’mmi bei lau? Zai Tingwang ba châu dage teilia bei lau?” ze acheu sagai’ndibe zeu.

³⁹Chipauziegene penui ’nnum’mmichi lak lei. Isaiabe ne sa gai dai ze,

⁴⁰“Pa ne penui mik tewchit kai ze penui lung tew’nchi gai bei de lei, makchai â, penui mik ne penui ngau lu zai penui lung ne ’nningchi gu, zai penui je tew’mmi gai ra a lam ’nreiwang gu daseu,” kacheu daseu.

⁴¹Isaiabe ne Isua ngeudibe ngau lu zai pe rasam pa sagai’ndibe ziegene aize pa ne sa de lei.

⁴²Acheuleusedu besuitewme ruage misonggame ne ’nsangdu pechu ’nnum’mmi di de lei, kane Pharisaime je penui hingbe ziegene penui salia mak tai lei, makchai â, penui je ka’nduibeki gene tuâpat kai ’ndu daseu:

⁴³penui â Hera ne getoabe sua â, ziemmename ne getoabe je ka’nchâ dadegeu.

⁴⁴Zai Isua ne ’nrung ze sa ze, “I ge ’nnumka’mmibe kau â I ge ’nnumka’mmibe mak ze, kane achu langgaipeu Pa ge ’nnumka’mmi de lei.

⁴⁵Zai achu ngaube kau â achu langgaipeu je ngau lei.

⁴⁶Kebabe chang ze kedeirei ge I wangkeu de lei, chidezai mi-mige de achu ’nnumka’mmime leine â, kemuîbe ge bam mak ra hangge zeu.

⁴⁷Mi-mige de I samsabe ramme seu lu, chize tei’mmi mak tizai â, I ne pechu samram me lei; kedeirei je samram gai ra I wangkeu mak ze kane kedeirei je tew’nring gai ra hangge wangkeu daseu.

⁴⁸Achu tuâpat ze, I samsabe ramme ’nchâmakbe kau hangge samrampeu hangkat lamui lei; chi I sagai’ndibe sam zene nâlangbe mai ge pechu samrampeu chang gu lei.

⁴⁹I a runne gu rezie ne sam I sa gai mak daseu; achu langgaipeu sing ne I ’ndaikau sa ra mei, zai ’ndaikau rang gai ra mei be pa ne achu hingde pei gai daseu.

⁵⁰Zai pe gu hingde ze â, keringbe betunmakbe lei be I chî lei. Chidadege I ’ndaikau sa mei be Bepeu ne achu kerangbe luî I â sa sa lei,” kacheu de lei.