Read Zeme Naga JOHAN 13 Bible Online

JOHAN 13 - Zeme Naga bible

JOHAN 13

¹Chunage Tat’ntuahengi suage, Isua ai kedeirei sâu nan ze Bepeu dage tat ra pehî wangchang de lei be chî lu dege, kedeirei ge pe gume bamme je pa hung ze, betun riâ chang ze pa hung de lei.

²Zai muîteseu teube luage, Satan ne Simonbe na Juda-Iskariotbe lung ge Isua je zuarabe lungsui hang kai bei dadege â

³Isua ze Bepeu ne pe ba ge mâgetaleine pei gai ’nde lei be, zai pa â Hera dagene wangkeu lei be benai Hera dage pa tatzi gu de lei be pa chî lu dege,

⁴muîteseu teube gene pa chu lu, pe paî kai nan ze, paîpoine pe kia ge ’ngkang gai de lei.

⁵Dadege mâkuak ge hedui ruî gai lu pe gu kenieme pî ramme huichu di de lei, pe kia ge paîpoine ka’ngkangbe zene penui pî pa ne nuichu di de lei.

⁶Simon Peterbe tailam pa wang de lei; dadege Peterbe ne pechu, “Heguang gau, nang ne a pî hui ra semei?” kacheu de lei.

⁷Isua ne pechu kak ze, “I ’ndaikau tâ tew mei be chuna â nang chî me lei, kane bechâng dezai nang chîdesi gu lei,” kacheu de lei.

⁸Peterbe ne pechu, “Mâtew-tewsede nang ne a pî hui ra mak lei,” kacheu de lei. Isua ne pechu kak ze, “I ne ningchu hui makchai â, I ge ning dam hang mâ de ga lei,” acheu bei de lei.

⁹Simon Peterbe ne pechu, “Heguang gau, a pî runne mak ze, kane a ba benai a peî du lei!” kacheu de lei.

¹⁰Isua ne pechu, “Hedui-pialube kau â, hui dai ra ’nnang ta de lei, pe pî hang runne zangno, kane pa â ’nchi kam de lei; zai ningnui â ’nchi lei, kane ningnui ’nteumena â mak lei,” kacheu de lei.

¹¹Châu ne pechu zua ra mei be pa chî lu dadegeu; chipauziegene pa ne, “Ningnui ’nteumena â ’nchi me lei,” kacheu de lei.

¹²Penui pî ramme pa ne hui kam gai lu, pe paîni kai lu dege pe bâm ge ’ntau gai dai lu, pa ne penui je, “Ningnui peireige ’ndaikau I tew gai mei be ningnui chî mei?

¹³Ningnui ne achu Geteiliapeu zai Heguang ze kû de lei; zai ningnui sabe tâu de lei, I â chize daseu.

¹⁴Chidaze I ningnui Wangpeu zai Geteiliapeu ne ningnui pî hui dizai â ningnui du kat-kat pî hui sing ra lei.

¹⁵I ne ningnui je tewrabe tak geteiliabe pei gai ’ndi daze I ningnui peireige tew gai gum ze ningnui du tew sing ra lei.

¹⁶Pelingsing, pelingsing ne ningnui je I rang lei, ka’ngguapeu â pe pau sua â di me lei; zai langgaibeibepeu du langgaibepeu sua â di me lei.

¹⁷Airamme ze ningnui chî lu ze tew dizai â ningnui hang yi gu lei.

¹⁸Ningnui ’nteumena rasam I sa mak lei, I ne kelânggai’ndime je I chî lei; aize â rawdiakkaibe sam tewpui gai ra chang di de lei, ‘A gu tingku teupeu ne a peireige pe pîmesui huachu gai lei,’ kacheube zeu.

¹⁹Aize wangchang makge chuna ningnui je I ranglia lei, chize wangchang dezai I ze pa de lei be ningnui ’nnum’mmi le ra hangge zeu.

²⁰Pelingsing, pelingsing ze ningnui je I rang lei, mi-mige de I ne langgaipeu je ka’nchâbe kau â achu ka’nchâ lei; zai achu ka’nchâbe kau â achu langgaipeu je ka’nchâ lei,” ze kacheu de lei.

²¹Aigum ze Isua ne sa gai lu dege, pe lunghereu di ze acheu ze rang’nchichiak kai ze, “Pelingsing, pelingsing ze ningnui je I rang lei, ningnui ruage hangkat ne achu zua gu lei,” kacheu de lei.

²²Châu je pa rang mei be kenieme ’nningchi lak ze penui kat-kat je pierua bam de lei.

²³Pe gu kenieme ruage hangkat, Isua kehungpeu ze Isua ga ge ’mbeîgit lu bam de lei;

²⁴dadege Simon Peterbe ne pechu betak tewlia ze ’mpau ze, “Pa châu je rang mei be ’nneu lau,” kacheu de lei.

²⁵Chidadege acheu jeibe luî gene Isua ga ge ’nreiwang lu, pa ne pechu, “Heguang, chize châu lau?” kacheu de lei.

²⁶Isua ne kak ze, “Chize â I ne aipau tingkuliâp ze sûm gai lu dezai I peigairapeu ze de lei,” acheu bei de lei. Chidadege â pa ne tingkuliâp ze sûm gai lu dege chize Simon Iskariotbe na Judabe je pei bei de lei.

²⁷Zai chi tingkuliâp lulube chângge, Satan pe lung ge gut ti de lei. Isua ne pechu, “Nang ’ndaikau tew ra mei be tew gai kelua zu lau,” kacheu de lei.

²⁸Chunage mâ-teube-kaira ge nguateume mi-mige ne de ’ndaitew ra aipau sam pe dage pa sa mei be ze chî mak lei.

²⁹Hanggesame ne Judabe dage rangkâng bung bambeibe ziegene Isua ne pechu, “Kahengîbe hangge anui hang mâ-ka’nnangbe lui le lau,” ze ranggaibe hangge ’nnum gai, makchaidu pa ne kelaksiame hangge mâge â peirabe hangge ’nnum gai wak ti de lei.

³⁰Dadege tingkuliâp lulube châng dege, kelua ze pa tat ti de lei; zai chize tingmuî de lei.

³¹Pa tat ti dege Isua ne, “Chunage ziemmena Na je hengêutew’ndi gai ’nde lei, zai pa ge Hera ngeu-tew’ndi gai ’nde lei.

³²Pa ge Hera ngeu-tew’ndi gai ’ndizai â, Hera ne du pe Na singbepeu ngeu-tew’ndi gai gu lei, zai pechu hengêutew’nnua gai gu lei.

³³Hename nung gau, ningnui dage beting keduîne I bam gai gu rei lei. Ningnui ne achu peu gu lei; zai ‘I tatkaibe ge ningnui wangchi lak lei,’ ze Judame dage I sagai’ndibe gum ze, ningnui je du chuna I salia de lei.

³⁴Samde karchibe ningnui je I pei lei, chi ningnui kat-kat je hung lau; ningnui je I ne hung bei gum ze ningnui du kat-kat je hung lau, kacheube zeu.

³⁵Ningnui ne kat-kat hangge kehungbe bam dizai â aigene ningnui â a kenieme lei be ze ziemmena ’nteumena ne chî kam gu lei,” ze kacheu de lei.

³⁶Simon Peterbe ne pechu, “Heguang gau, nang ’ndai’ngge tat ra lau?” kacheu de lei. Isua ne kak ze, “I tatkairabe ge nang chuna â a chai suichi lak lei; kane bechâng dezai nang a chai sui gu lei,” acheu bei lei.

³⁷Peterbe ne pechu, “Heguang gau, ’ndaitew ze chuna I ning chai suichi lak ra lau? Ning hangge a keringbe pei gai gu lei,” kacheu de lei.

³⁸Isua ne kak ze, “Nang keringbe ze a hangge nang pei gai ra de mei? Pelingsing, pelingsing ze ningchu I rang lei, luachum nang achu ’ngkimchang gai mak tâne ’nruirie kua ra mak lei.