Read Zeme Naga JOHAN 14 Bible Online

JOHAN 14 - Zeme Naga bible

JOHAN 14

¹“Ningnui lung peize tewhereu se lau; Hera ge ’nnum’mmi lau, zai I ge du ’nnum’mmi lau.

²A peu ki ge hekisiâm misongga la lei; ga laîzaine â ningnui bâm hang teleu ra I tat tu lei, ze ningnui je I acheu ra semei?

³Zai I tat ze ningnui bâm hang teleu lu dezai I wangkeu dai ze ningnui je a dage ngua gai gu lei, I bambe ge ningnui du bam ra hangge zeu.

⁴Zai I ’ndai’ngge tat ra mei be ’mpuî ningnui chî lei,” kacheu de lei.

⁵Thomasbe ne pechu, “Heguang gau, nang ’ndai’ngge tat ra mei be anui â chî me lei; ’ndaigum ze ’mpuî anui chî le ra lau?” kacheu de lei.

⁶Isua ne pechu, “I â ’mpuî zai samsang zai keringbe lei; a dagene makchai â mî de Bepeu dage wang me lei.

⁷Achu ningnui chî lu laîzaine â, a peu je du ningnui chî gu lei; chuna gene seu ze pechu ningnui chî zai ngau lu de lei,” kacheu de lei.

⁸Philipbe ne pechu, “Heguang gau, anui je Bepeu teilia lau, dezai anui lungwângchang du lei,” kacheu de lei.

⁹Isua ne pechu, “Philipbai, aitiege ningnui dage I bam bam bei sedu nang achu chî mak kerei mei? Achu ngaulube kau ze Bepeu je ngau lu de lei; ‘Anui je Bepeu teilia lau,’ ze ’ndaigum nang acheuchi ra lau?

¹⁰Bepeu ge I bam, zai I ge Bepeu bam lei be nang ’nnum’mmi mak mei? Ningnui dage I samsabe ramme a runne gu rezie ne I sabe mak lei; kane Bepeu a dage bambepeu ne pe tâ ramme tew lei.

¹¹I Bepeu ge bam zai Bepeu I ge bambe achu ’nnum’mmi le lau; makchai du tâ ramme ziegene achu ’nnum’mmi le lau.

¹²“Pelingsing, pelingsing ze ningnui je I rang lei, achu ’nnumka’mmibe kau â, I tewbe tâ ramme pa du tew gu lei; zai airamme suadu kedibe tâ ramme pa tew gu lei, Bepeu dage I tatbe ziegeneu.

¹³A ji gene ningnui gekiebe leine ze I tew gai gu lei, chidezai pe Na ge Bepeu ngeu-tew’ndi gai be ra hangge zeu;

¹⁴a ji gene ningnui mâ-mâ leine kie dizai â chize I tew gai gu lei.

¹⁵“Ningnui ne achu hung zai â, I samdiegaibe ramme ningnui tei gu lei.

¹⁶Zai I ne Bepeu dage kie gu lei, dezai ningnui dage betingbeta nguabam-bam ra kêdabe Nguakageteipeu pa ne ningnui je pei gai gu lei,

¹⁷kedeirei ne luchilakbe, kagesangbe Herui du pei gai gu lei, kedeirei â pechu ngau de ngau mak zai chî de chimakbe ziegeneu; ningnui â pechu chî lei, pa ne ningnui dage nguabam-bam dadegeu, zai ningnui ge bam gu lei.

¹⁸“Ningnui je I putzîng gai ra mak lei; ningnui dage I wang gu lei.

¹⁹Mâtiege mak ze kedeirei ne achu ngau ta gu de lei, kane ningnui achu ngau gu lei; I ringbe ziegene ningnui du ring gu lei.

²⁰Chipau mai ge â, I a peu ge bam, zai ningnui I ge bam, zai I ningnui ge bam lei be ningnui chî gu lei.

²¹A gu samdiegaibe ramme pe dage bam, zai chize teika’mmibe kau â achu kehungbe kau lei; zai achu hungbe kau je â a peu ne hung gai bu lei, zai pechu I ne hung gu, zai I sing ne pe dage liâ gu lei,” kacheu lei.

²²Judabe (Iskariotbe-makbepeu) ne pechu, “Heguang gau, ’ndaigum ze nang sing ne anui dage liâ ze, kedeirei dage liâ mak ra lau?” kacheu de lei.

²³Isua ne kak ze, “Ziemmena mige hangkat ne achu hung zai â a sam ze pa tei’mmi gu, zai a peu ne pechu hung gu lei, zai pe dage anai (a peu benai I) wang ze anai bamrabe bâm tew gu lei.

²⁴Achu hungmakbe kau â a sam ramme tei’mmi mak lei; zai chi sam ningnui seube â, a gu mak lei, kane a peu achu langgaipeu gu lei.

²⁵“Ningnui dage I bambe luage, airamme ningnui je I salia bei de lei.

²⁶Kane chi Nguageteiliapeu Herui Ka’nchibe, Bepeu ne a ji gene langgairapeu zene mâgetaleine ningnui je geteilia gai gu lei, zai I ne ningnui dage sagai’ndibe leine ze ningnui ’nningdau bam ra pa ne tew gai gu lei.

²⁷Desieyibe ningnui dage I sâudiak kai lei; a gu desieyibe ze ningnui je I pei lei; kedeirei ne pei gum ze I pei me lei. Ningnui lung peize tewhereu se lau, zai peize hing de hing se lau.

²⁸‘I tat tu lei, zai ningnui dage I wang gu lei,’ ze I ningnui je kacheube ze ningnui seu lu de lei. Ningnui ne achu hung bei laîzai â ningnui suiyi’nta ze bam du de lei, Bepeu dage I tatbe ziegeneu; Bepeu â a sua â di-bi daseu.

²⁹Zai chuna chi mâ-wangchang makge ningnui je I rang gai de lei, chi mâ-wangchang dezai ningnui ’nnum’mmi ra hangge zeu.

³⁰I ningnui dage sam sa’ngkie ta du de lei, ai kedeirei gu samrampeu wang mui daseu. A peireige pe gu rezie mâ de ga lei;

³¹kane Bepeu ne samdiegaibe luigum ze I â tew lei, chidezai kedeirei ne Bepeu je I hung lei be chî le ra hangge zeu. Zuachu lau, aigene anui tatchu kei lei.