Read Zeme Naga JOHAN 15 Bible Online

JOHAN 15 - Zeme Naga bible

JOHAN 15

¹“I â grepchîria gesang lei, zai a peu â grepchîria kateleupeu lei.

²A dage bekeî bambe leine bechî ’nchimakbe â pa ne lutua lei, zai bekeî bechî ’nchipatbe leine â, pa ne teleuka’mmi lei, bechî misongga ’nchipat le ra hangge zeu.

³Ningnui dage I sagai’ndibe sam zene ningnui je tew’nchi gai bei de lei.

⁴I ge bam bam lau, zai I du ningnui ge bam bam gu lei. Bekeî grepchîria ge bam makchai â, pe runne ne bechî ’nchi lak gum ze, ningnui du I ge bam makchai â, ningnui bechî ’nchichi lak lei.

⁵I â grepchîria lei, zai ningnui â bekeî ramme lei. I ge bam-bambe kau, zai pa ge I bam-bambe kau ze â bechî misongga ’nchipatbe kau lei, I ’ngga zai â ningnui mâ de tewchi lak daseu.

⁶Ziemmena I ge bammakbe kau â bekeî gum ze pechu â tuâpat nan tai lei, zai hegui gai di tai lei, zai chi bekeî ramme â tei’ndui lu, hemi ge tuâ gai bei ze rû nan tai lei.

⁷Ningnui I ge bam bam dizai â, zai a sam ramme ningnui ge bam bam dizai â, ningnui kenei-neibe kie lau, zai chize ningnui hang tew gai bu lei.

⁸Aigene a peu ngeu-tew’ndi gai bei de lei, chidezai ningnui bechî misongga ’nchipat ra, zai ningnui a kenieme lei be teilia be ra hangge zeu.

⁹A peu ne achu hung bei gum ze, I du ningnui je hung de lei; I kehungbe ge bam bam lau.

¹⁰A gu samde ramme ningnui tei dizai â I kehungbe ge ningnui bam bam gu lei, I ne a peu gu samde ramme tei’mmi lu ze pa kehungbe ge bam bam gum zeu.

¹¹A suigut ningnui ge bam ra, zai ningnui suigut puigit bam ra hangge airamme ningnui dage I sa gai de lei.

¹²“Aize a gu samde lei, ningnui je I hung bei gum ze ningnui kat-kat je hung lau.

¹³Ziemmena pe kangme hangge pa keringbe peigaibe peirei ziemmena dage chi suane kehungbe kedibe ga de lei.

¹⁴I samdiegaibe ningnui tew dizai â ningnui a kangme lei.

¹⁵Ningnui je I kebang ze kû ta du de lei, kebang â pe pau ’ndaikau tew mei be chî mak daseu; kane ningnui je I a kangme ze kû de lei, a peu dagene I seulube leine ze ningnui je I chiliâ gai bei daseu.

¹⁶Ningnui ne achu kakelâng mak lei, kane I ne ningnui je kakelâng lei, zai sum gai bei de lei, ningnui tat ze bechî ’nchipat ra, zai ningnui rachî bam bam de ra hangge zeu; chidezai Bepeu dage a ji gene ningnui gekiebe leine ze pa ne chize ningnui je pei gu lei.

¹⁷Ningnui kat-kat je hung ra aize I ne ningnui je die gai lei.

¹⁸“Kedeirei ne ningnui je ngaugailak tizaine â, ningnui je ngaugailak makge pa ne achu ngaugailak lei be chî le lau.

¹⁹Ningnui kedeirei gu dizaine â, kedeirei ne pe gume je hung gu lei, kane ningnui â kedeirei gu mak dadege kedeirei ne ningnui je ngaugailak lei, kane I ne ningnui je kedeirei gene kelâng gai de lei.

²⁰‘Kebang â pe pau sua â di me lei,’ ze ningnui dage I sagai’ndibe sam ze chibam lau, penui ne achu tewsâ dizai â penui ne ningnui je tewsâ gu lei; penui ne a sam tei dizai â penui ne ningnui sam du tei gu lei.

²¹Kane airamme ze a ziegene penui ningnui je tew gai gu lei, achu langgaipeu je penui chimakbe ziegeneu.

²²I wangkeu ze penui dage sam sa gai mak laîzai â penui dage hemui ga gu lei; kane chuna â penui gu hemui lun dai ra ga de lei.

²³Achu ngaugailakbe kau â a peu je du ngaugailak lei.

²⁴Mî de tewmakbe tâ zat ramme penui ruage I ne tew gai mak laîzai â, penui dage hemui ga gu lei; kane chuna â I benai a peu je penui ngau lu, anai je penui ngaugailak ti de lei.

²⁵Aize penui gu hingde rawgai’ndibe, ‘Patedeu mâ de ga ze, penui achu ngaugailak lei,’ kacheube ze tewpui gai ra chang di de lei.

²⁶Kane chi Nguageteiliapeu, chi Bepeu dagene I langgairapeu, kagesangbe Herui, Bepeu dagene patbe ze wang dezai, pa ne achu sakkitew gai gu lei;

²⁷zai ningnui ze du sakkitewme de lei, bepîbang gene ningnui â a dage bam-bamdibe ziegeneu.