Read Zeme Naga JOHAN 16 Bible Online

JOHAN 16 - Zeme Naga bible

JOHAN 16

¹“Kâutatrabe gene ningnui je tei’nggim le ra airamme leine ningnui je I salia gai de lei.

²Penui ne ningnui je ka’nduibeki ramme gene tuâpat kai gu lei, mi-mige ne ningnui je tewchat kai lu dezai, Hera hangge tâka’nggua lei ze pa ne ’nninggairabe ting ze gesangsing ze wangzi gu de lei.

³Zai penui aize tew gu lei, penui ne Bepeu je chî mak zai achu du chimakbe ziegeneu.

⁴Kane airamme ningnui je I salia bei de lei, chidezai penui hang panehî wangchang dezai ningnui je penui rasam I salia bei de lei be ningnui ’nningdau ra hangge zeu. “Bepîbang gene airamme ningnui je I salia mak lei, ningnui dage I bambe ziegeneu.

⁵Kane chuna â achu langgaipeu dage I tat tu de lei; leusede ningnui ruage mî ne de, ‘’Ndai’ngge nang tat ra lau?’ ze acheu ’nneu mak lei.

⁶Kane airamme ningnui je I saliabeibe ziegene helungkahereube ne ningnui lung ge pui di de lei.

⁷Acheuleusede samsang ningnui je I salia lei, I tattibe ze ningnui hangge kegiebe lei, I ne tat mak tizai â, chi Nguageteiliapeu ze ningnui dage wang ra mak daseu; kane I tat tizai â, I ne ningnui dage pechu lang gai gu lei.

⁸Zai pa wangkeu dezai kedeireime je hemui, zai katelingbe zai samrambe deu ge chî ra pa ne tew gai gu lei:

⁹hemui deu gu ze â penui ne I ge ’nnum’mmimakbe ziegene chang lei;

¹⁰zai katelingbe deu gu ze â, Bepeu dage I tat ti ze ningnui ne achu ngau ta de ra changbe ziegene chang lei;

¹¹samrambe deu gu ze â ai kedeirei gu samrampeu je samramgai’ndibe ziegene de lei.

¹²“Ningnui dage mâ-mâ ramme I sa ra misongga larei lei, kane chuna â chiramme ningnui teikamchi lak lei.

¹³Chi kagesangbe Herui wangkeu dezai, kagesangbe leine ge ningnui je pa ne ngua gai gu lei: pe runne gu rezie ne pa â sa ra mak, kane pa seu-seube sam ze pa sa gu, zai mâ-mâ wangchangrabe ramme ze ningnui dage pa saba gai gu daseu.

¹⁴Pa ne a ngeu-tew’ndi gai gu lei, a gu ze pa lu lu ningnui dage saba gai gu daseu.

¹⁵Bepeu gu kebambe leine ze a gu lei; chipauziegene a gu ze pa lu lu chize ningnui dage saba gai gu lei, ze I ranglia de lei.

¹⁶“Mâtiege-makse ningnui achu ngau ta du lei; zai mâtiege-makse ningnui achu ngau dai gu lei,” ze kacheu de lei.

¹⁷Pe gu kenieme hanggesame ne kat-kat je, “Aize anui dage pa sabe ze ’ndaikau lau, ‘Mâtiege-makse ningnui achu ngau ta du lei, zai mâtiege-makse ningnui achu ngau dai gu lei,’ zai ‘A peu dage I tatbe ziegeneu,’ kacheube sam zeu?” kacheu de lei.

¹⁸Penui ne, “Pa ne, ‘Mâtiege-makse’ kacheube ze ’ndaikau lau? Pa ne ’ndaikau hangge rang mei be anui â chî mak zeu,” ze kacheu de lei.

¹⁹Penui ne pechu ’nneugaineibe Isua chî di de lei; dadege pa ne penui je, “I ne rangbe tak ge, ‘Mâtiege-makse ningnui achu ngau ta du lei, zai mâtiege-makse ningnui achu ngau dai gu lei,’ kacheube ze mei, ningnui runne ningnui ruage ka’mmêtbe zeu? ze kacheu de lei.

²⁰Pelingsing, pelingsing ze ningnui je I rang lei, ningnui â hap ze heu gu lei, kane kedeirei â pe suiyi’nta gu lei; ningnui lung hereu gu lei, kane ningnui lung kahereube ze ningnui suiyibe chang dai gu lei.

²¹’Mpuimi henalungkeurabe ting ge â, pe lung hereu ka’nzie lei, pe hangge panehî wangchangdibe ziegeneu; kane chi hena lungkeu lu dege â pa kahereube ze chî ta di tai lei, kedeirei ge pa henalungkeu lu pe suiyi dadegeu.

²²Chigum ze ningnui chuna â ningnui lung kahereu de lei, kane ningnui je I ngau dai gu lei, dezai ningnui lung suiyi’nta gu lei, zai ningnui suigut ze ningnui dagene mî ne de lutat ra mak lei.

²³Chipau mai ge â, achu ningnui mâ de kie ra mak lei. Pelingsing, pelingsing ze ningnui je I rang lei, Bepeu dage ningnui mâge â kie dizai â, chize a ji gene ningnui je pa ne pei gu lei.

²⁴Chuna riâ chang ze a ji gene ningnui mâ de kie mak lei; kie lau, dezai ningnui ngau gu lei, chidezai ningnui suigut puigit bam ra hangge zeu.

²⁵“I ne teikakedabe tak gene aize ningnui je teilia ze salia de lei; I ne teikakedabe tak gene ningnui je teilia ze mâ-saliatarabe ting wangzi gu de lei, kane ’nchichiak ze peluîrun ze Bepeu rasam salia gu lei.

²⁶Chipau mai ge a ji gene ningnui kie gu lei; zai I ne Bepeu dage ningnui hang kie gai gu lei, ze I ningnui je acheu me lei;

²⁷Bepeu sing ne ningnui je hung la daseu, ningnui ne achu hung bei, zai I Bepeu dagene wangkeu lei be ningnui ne ’nnum’mmibeibe ziegeneu.

²⁸I Bepeu dagene pat ze kedeirei ge wangkeu lei; zai kedeirei sâu dai nan ze Bepeu dage I tat tu lei,” kacheu de lei.

²⁹Pe gu kenieme ne, “Ni chuna â teikakedabe tak gene teilia ze mâ-salia ta di ze ’nchichiakbe ne nang sa la de lei!

³⁰Nang â mâgetaleine chî lei be chuna â anui chî de lei, zai mî ne de ningchu ’nneu ra ’nnang ta de lei, ai gene nang â Hera dagene wangkeu lei be anui ’nnum’mmi de lei,” kacheu de lei.

³¹Isua ne penui je kak ze, “Chuna â ningnui ’nnum’mmi de mei?

³²Panehî wangchang mui de lei, wang de wangchang de lei, ningnui je tewtimraripkairabe ting, ziemmename leine ne penui ki lam lam tatkamderabe ting zeu, achu runne sâudiak kai gu lei; acheusede I a runne bam me lei; Bepeu a dage la daseu.

³³Aize I ne ningnui je salia gai de lei, dezai zêune bambe desieyibe ningnui I gene ngau le ra hangge zeu. Kedeirei ge ningnui hang kahereube mi duanggabe bam de lei; kane ningnui suirengachai ze bam lau, I ne kedeirei ngam gai bei de lei,” kacheu de lei.