Read Zeme Naga JOHAN 19 Bible Online

JOHAN 19 - Zeme Naga bible

JOHAN 19

¹Dadege, Pilatbe ne Isua je tei lu, pechu lakkegit kai de lei.

²Zai sipaime ne heturia ne kraun hang hî lu, pe peî ge luak kai bei de lei, zai paî giebe ne pechu bâkerubit kai bei de lei;

³penui ne pe tailam hang lu, “Kellum, Judame wangpeu!” acheu ze pechu kagepei lei.

⁴Pilatbe pat dai lu, penui je, “Pie le lau, ningnui dage pechu I nguapat kai lei, pe dage hetû-hera mâ de I ngaupat me lei be ningnui chî ra hangge zeu,” kacheu de lei.

⁵Dadege Isua hetukraun kai ze paîgiebe bâ lu zuapat ti de lei. Pilatbe ne penui je, “Ni ziemmena je pie le lau!” kacheu de lei.

⁶Tingkugechîngme benai saibe ramme ne pechu ngau lu dege, penui ’nrung ze, “Pechu gia gai be lau, pechu gia gai be lau!” ze kacheu de lei. Pilatbe ne penui je, “Ningnui runne ne pechu tei lu, gia gai be lau, I â pe dage hetû-hera mâ de ngaupat mak daseu,” acheu bei de lei.

⁷Judame ne pechu kak ze, “Anui gu hingde la lei, zai chipau hingde gezene pa chai ra lei, pa pe runne pechu Hera Na hang chakkaibe ziegeneu,” kacheu de lei.

⁸Pilatbe chipau sam ramme seu lu dege, pa hing’nteu di de lei;

⁹heguang kisîam kedi ’mbe pa gut dai lu Isua je, “Nang ’ndai’nggene wang lau?” kacheu de lei. Kane Isua kak mak tai lei.

¹⁰Chidadege Pilatbe ne pechu, “Nang achu ’mpau mak ra mei? Ningchu ’mpat kai ra a dage rezie lamui, zai ningchu heling ge gia gai ra a dage rezie lamui lei be nang chî mak mei?” kacheu de lei.

¹¹Isua ne pechu kak ze, “Kehu ’mbene ningchu rezie pei gai makchai â, a peireige ning gu rezie mâ de bam ra mak lei; chipauziegene ning ba ge achu peigaipeu gu hemui â di-’nteu lei,” ze acheu bei de lei.

¹²Aipau sam gene Pilatbe ne pechu ’mpatkairabe ’mpuî peu de lei, kane Judame ne ’nrungkeleu ze, “Aipau peu je nang ’mpat kai dizaine â, nang â Kaisarbe kangpeu mak lei; mi-mige de pe runne pechu heguang hang suanggaibe kau â Kaisarbe je pa saka’nsia lei,” kacheu de lei.

¹³Aipau sam ramme Pilatbe seu lu dege, Isua je nguapat lu, tingchutau, Hebrai lad ge Gabbatha, kacheube bâm chi samrambe bâm ge pa ’ntaukeu gai de lei.

¹⁴Chunage chipau mai ze Tat’ntuahengi hang tâtew-kagekambe mai de lei; chize tîngna’nding hî ge de lei. Pa ne Judame je, “Ni, ningnui Wangpeu!” kacheu de lei.

¹⁵Dadege penui ’nrung ze, “Pechu nguatat chu lau, pechu nguatat chu lau, zai pechu gia gai zu lau,” kacheu de lei. Pilatbe ne penui je, “Ningnui Wang je heling ge I gia gai ra de mei?” kacheu de lei. Tingkugechîngme ne kak ze, “Anui wangpeu ga lei. Kaisarbe runne zangnêu,” kacheu de lei.

¹⁶Dadege pechu heling ge gia gai ’nde ra hang pa ne penui ba ge pei gai bei de lei.

¹⁷Dadege penui ne Isua je ngua ’ndi de lei, zai pa pe gu heling ze pe runne pua lu, Hebrai lad ge Golgotha, kacheube timpeîkuak bâm ’mbe zuapat ti de lei.

¹⁸Chige ze penui ne pechu heling ge gia gai de lei, pa benai miramme hangna, pehia ’mbe hangkat-kat bam lu, zai Isua ne sûngngangkelî ge bam lu zeu.

¹⁹Pilatbe zene du jidâ kat raw gai lu chize heling peireige da gai de lei; chize “Nazareth’mpeu Isua, Judame Wangpeu,” ze raw gai lei.

²⁰Judame misonggame ne aipau jidâ ze kia gai de lei, Isua je heling ge giagaibe bâm ze namdi taige bam bei dadegeu; zai chize Hebrai lad, Latin lad, zai Grik lad ne raw gai de lei.

²¹Dadege Judame gu tingkugechîngme ne Pilatbe je, “ ‘Judame Wangpeu, ze raw gai ’nzie se lau,’ kane ‘Aipaupeu ne, I â Judame Wangpeu lei,’ ze kacheu de lei, ze raw gai lau,” ze kacheu de lei.

²²Pilatbe ne kak ze, “I ne rawgai’ndibe â raw gai ’ndi de lei,” kacheu de lei.

²³Sipaime ne Isua je gia gai lu dege, pe paî ramme lu lu hedam medai tam gai de lei, sipai hangkat hangge dam kat-kat tam gai zeu; zai pe gu mechuatiebe du penui ne lu de lei. Kane chi mechuatiebe â paherui ga ze dak’nzutpelaritbe zat lei;

²⁴dadege penui karai kat-kat je, “Aize anui hitpâng mak kei lei, kane châu hang chang gu mei be chî ra hedachak kei lei,” kacheu de lei. Aize â, “A paî ramme penui ruage ka’nzi lei, zai a mechuatiebe hangge penui hedachak lei,” kacheube sam tewpui gai ra chang de lei.

²⁵Chigum ze sipaime ne aize tew de lei. Kane Isua gu heling taige sapme ze â, pe pui zai pe pui sikina kau Klopasbe nâu Marile, zai Mari-Magdalinle, aime bau de lei.

²⁶Isua ne pe pui benai pa kehungbe kenie’mpeu saphechut ze bambe ngau lu dege, pa ne pe pui je, “A pui gau, pie le lau, ning na!” kacheu de lei.

²⁷Dadege pa ne pe gu kenie’mpeu je, “Pie le lau, ning pui!” kacheu de lei. Zai chipau chângge â chi kenie’mpeu zene pe ki lam’mbe Marile je nguatat ti de lei.

²⁸Aipau chângge, mâgetaleine chuna â kam de lei be Isua chî lu ze, (rawdiakkaibe sam ze tewpui gai ra hangge) “I herei de lei,” kacheu de lei.

²⁹Chige mâ-bung kat wain kehiabe puigit ze dung bam lei; chigum ze mâ-chûp (sponge) ge chi wain kehiabe kaipuigitkailube ze hissop ge kai lu ze pe mui ge kai bei de lei.

³⁰Isua chi wain kehiabe ’ndâu gai lu dege, “Chuna â kam de lei,” kacheu de lei; dadege â pe peî kei’ngkum gai di ze, pe gu herui peipat ’ndi de lei.

³¹Chipau mai â tâtewkagekambe mai bei dadege, ’ntakbambe mai ge heling ge kechaipum ramme bammakrabe hanggene Judame ne Pilatbe dage chaidime pî ramme tewbet lu ze, kechaipum ramme teitat te ra hangge kie bei de lei.

³²Chidadege sipaime ne wang lu, pechu heling ge nguagiagaime, keraipeu benai kêdapeu pî ramme tewbet kai bei de lei;

³³kane Isua tailam penui wang dege, pa â chai di laleube ngau lu dege, pe pî â tewbet kai mak tai lei.

³⁴Kane sipaime ruage hangkat ne, pe jak ge hengeu rei gai bei ze, luakatne hejai benai hedui luapat lei.

³⁵Chize ngaulupeu ne sakkitew de lei, zai pa sakkitewgaibe ze gesang lei, zai pa â samsang sa lei be pa chî lei—ningnui du ’nnum’mmi le ra hangge zeu.

³⁶Rawdiakkaibe leisi sam ramme ge, “Pe ra katte tewbet ra mak lei,” kacheube sam tewpui gai ra airamme wangchang de lei.

³⁷Zai kêdabe rawdiakkaibe leisi sam ne rangbe ge, “Penui ne reigai’ndipeu je penui pie gu lei,” kacheu de lei.

³⁸Chipau chângge Arimathea’mpeu Josepbe, chi Isua kenie’mpeu Judame je pa hingbe ziegene reine ze Isua pum teitat ra hang Pilatbe dage kie lei, zai Pilatbe ne pechu lun bei de lei. Chidadege pa wang lu, kechaipum ze teitat ti de lei.

³⁹Zai Nikodemasbe, keraî’ngka ge pe dage tingmuî ge wanggaipeu ze du Mur benai alos perîmyibe hit himreu gum tei lu wang de lei.

⁴⁰Dadege Isua pum penai ne lu lu, Judame kechaibaibe sie luigum ze mâ-perîmyibe kai lu betachiâmbe paî ne dum gai de lei.

⁴¹Chunage pechu giagaibe bâm ge merie kat bam lei, zai chi merie ge heraw karchibe kat chige mâdau de ziemmena je baigaimakbe bam lei.

⁴²Judame ’ntakbam ra tâtewkagekambe mai dau di dadege zai chi heraw ze na bei dadege chige Isua je penui bai gai de lei.