Read Zeme Naga JOHAN 2 Bible Online

JOHAN 2 - Zeme Naga bible

JOHAN 2

¹Zai pakechumbe mai ge Galiliram, Kana ge kahegiabe bam lei, zai Isua pui du chige bam lei;

²Isua benai pe gu kenieme je kahegiabe ge wang ra kû gai bei de lei.

³Wain ’ngga di dege Isua pui ne pechu, “Penui dage wain ga de lei,” acheu bei de lei.

⁴Dadege Isua ne pechu, “A pui gau, nang a hangge châu ze lau? A ting wangchang merei lei,” kacheu de lei.

⁵Pe pui ne tâka’ngguame je, “Ningnui je pa ne kerang-rangbe tew zu lau,” acheu bei de lei.

⁶Chunage chige Judame gu huika’nchibe-râtewbe hanggene tingchubung seruk ze dung bam lei, chi bung kat ge hedui hit haî kat riâ gut lu lei.

⁷Isua ne penui je, “Mâ-bung ramme ge heduiruîpui gai lau,” acheu bei de lei. Dadege chiramme ge penui ne ruîpui’nsamrap kai bei de lei.

⁸Pa ne penui je, “Chuna â gêsa tuakpat lu, luube-bâm ge besuitewpeu dage teimie be lau,” acheu bei de lei. Dadege penui ne chiramme tei lu de lei.

⁹Chuna â hedui ze wain midibe luube-bâm ge besuitewpeu ’ndâu gai lu (ka’ngguame heduituakme chî lu bam sedu) pa â ’ndaigene chize wang mei be chî mak ze henâukupeu je kû lu

¹⁰pechu, “Ziemmename leine ne keraîbe ge wain keyibe ka’nggua lei; zai ziemmename saklei di dezaine chi wain peran-gabe pei lei; kane nang â chuna riâ wain keyibe kaikuachang de lei,” ze kacheu de lei.

¹¹Ai pe gu ka’nchetbe ramme ruage raîlangbe ze Isua ne Galili Kana gene tew gai ze, pa pe ngêudibe teilia gai de lei; dadege pe gu kenieme pechu ’nnum’mmi di de lei.

¹²Aipau châng dege pa Kaperna-um ’mbe pe pui zai pe kiname zai pe gu kenieme je ngua lu tat ti de lei; zai chige beting keduîne penui bam gai de lei.

¹³Judame gu tat’ntuahengi ze na di de lei, dadege Isua Jerusalem ’mbe hang di de lei.

¹⁴Kellumki lungge penui ne helîkahedetbe ge, getumsei ramme, zai meli ramme, zai depeine ramme, zai rangkânghiakme ramme je ngaudau de lei.

¹⁵Dadege â heria ne lakkegitrabe hang tew lu kellumki gene penui ’nteumename je meli benai getumsei ramme dage nguakumpat kam ’ndi de lei; zai pa ne rangkânghiakme gu rangkângpum ramme suktua ze penui gu leisi-kaira ramme chuikautuarang gai wak bei de lei.

¹⁶Dadege pa ne depeine zuame je, “Airamme teitat ne lau; a peu ki ze ningnui ne helîkahedetbeki hang tew gai ra mak lei,” ze kacheu de lei.

¹⁷Pe gu kenieme ne, “Ning ki hangge ’nningkahekuîbe zene achu tew’ngga gai gu lei,” ze acheu rawgaibe ze ’nningdau di de lei.

¹⁸Dadege chi Judame ne pechu, “Aipau tâ tewbe ze anui je teilia ra ning dage ’ndaikau gu ka’nchetbe la lau?” ze kacheu de lei.

¹⁹Isua ne penui je kak ze, “Aipau kellumki ze tew’nsia gai be lau, hezie kechumne lung gene I ne chize teichu gai gu lei,” kacheu de lei.

²⁰Dadege Judame ne, “Aipau kellumki ze kum hedai ze seruk tew gai lei, zai hezie kechumne lung gene nang ne aize tewchu gai ra mei?” kacheu de lei.

²¹Kane pa â pe pum gu kellumki rasam sa lei.

²²Chipauziegene kechaibe gene pechu kuakchugaibeibe châng dege, pa ne aize sagaibeibe sam ze pe gu kenieme ’nningdau di de lei; zai rawgai’ndibe sam ramme benai Isua ne sagai’ndibe sam ze penui ’nnum’mmi di de lei.

²³Jerusalem ge tat’ntuahengi ting pa bambe ting ge mâ-ningdaulakbe tâ ramme pa tewgaibe penui ngau lu dege, misonggame ne pe ji je ’nnum’mmi di de lei;

²⁴kane Isua â penui je pe lung gesang ne ’nnumtew mak lei,

²⁵’nteumena je pa chilube ziegene zai ziemmename ruagene mi-mige ne sakki tewgaihâ ra ’nnangmakbe ziegeneu; ziemmena lung ge ’ndaikau bam mei be ze pa â chi dadegeu.