Read Zeme Naga JOHAN 20 Bible Online

JOHAN 20 - Zeme Naga bible

JOHAN 20

¹’Ntakkak gu tingnaimikpui raîlangbe mai hechua ba’nzangrabe luage Mari-Magdalinle heraw ge wang de lei, zai heraw gene tingchukâng lutua’ndibe pa ngau de lei.

²Chidadege pa paktat ze, Simon Peterbe benai kenie’mpeu kêdabe, chi Isua ne hungbepeu dage wang lu penai je, “Heguang je heraw gene penui ne teitat ’nde lei, zai ’ndai’ngge pechu penui ne kai ’ndi mei be anui â chî mak lei,” kacheu de lei.

³Dadege Peterbe benai kenie’mpeu kêdapeu pat lu, heraw ’mbe penai tat ti de lei.

⁴Penai hangna paktat ti de lei, kane kenie’mpeu kêdapeu ne Peterbe je pak’nzû lu, heraw ge wangchang-raî di de lei;

⁵dadege heraw lungge pa keikeu pie gai ze, petachîambe paî ramme chige tuâ bambe pa ngau de lei, kane heraw lung ’mbe pa â gut mak tai lei.

⁶Dadege Simon Peterbe pe chai suiwang lu, heraw lung ’mbe gut ti de lei, zai petachîambe paî ramme chige tuâ bambe pa ngau de lei,

⁷zai mi ju-nuibepaî pe peî ge kaibe ze â petachîambe paî ramme ruage bam mak lei, kane kêdabe bâm ge pe runne ’nzuichâmcheî laleu lei.

⁸Dadege kenie’mpeu kêdabe, chi heraw ge wangchangraipeu du heraw lung ’mbe gut ti de lei, zai pa ngau lu ’nnum’mmi di de lei;

⁹kechaime ruagene pa chu dai himchang gu lei be rawdiakkaibe leisi sam penui chî mak kerei dadegeu.

¹⁰Dadege kenie’mpeu hangna penai ki lam’mbe helatwang dai di de lei.

¹¹Kane Marile â, heraw hela ’mbene hap bam lei, zai pa hap ze keikeu lu heraw lungge pie gai de lei;

¹²zai angelme hangna penai paî ’ngngûpchup ze Isua pum ’njeigaibe bâm ge, hangkat pe peî ’mbia, zai hangkat pe pî ’mbia ’ntaubambe pa ngau de lei.

¹³Penai ne pechu, “Mpuimi gau, nang ’ndaitew ze hap bam lau?” kacheu lei. Pa ne penai je, “A Wang je penui ne teitat ti ze pechu ’ndai’ngge kai ’ndi mei be I chimakbe ziegene lei,” kacheu de lei.

¹⁴Aize sa gai lu, pa ’nreiwang dege, Isua sapbambe pa ngau de lei, kane chize Isua lei be pa chî mak tai lei.

¹⁵Isua ne pechu, “’Mpuimi gau, ’ndaitew ze hap bam lau? Châu je nang peu lau?” kacheu de lei. Pechu meriereîpeu hang ’nning gai lu, pa ne pechu, “A pau gau, nang ne aigene pechu teitat ti zaine â, pechu nang ’ndai’ngge kai ’ndi mei be achu ranglia lau, dezai I ne pechu teitat ra hangge zeu,” kacheu de lei.

¹⁶Isua ne pechu, “Mari” kacheu de lei. Pa ’nreiwang lu, Hebrai lad ne pechu, “Rab-boni!” kacheu de lei, (chize Geteiliapeu kacheu be lei).

¹⁷Isua ne pechu, “Achu tui se lau, Bepeu dage I chu merei daseu; kane a puiname dage tat ze, A peu zai ningnui peu, a Rapeu zai ningnui Rapeu dage I chu gu de lei be salia gai be lau,” kacheu de lei.

¹⁸Zai Mari-Magdalinle tat lu ze, kenieme je, “Heguang je I â ngau lu de lei,” ze pau gai de lei; dadege pechu pa ne airamme salia gai de lei, ze penui je pa pau gai de lei.

¹⁹Chipau mai, ’ntakkak gu tingnaimikpui raîlangbe mai hegî dege, Judame je hingbe ziegene, kenieme bambe bâm ’ngkam kainamrim ze bambe ge Isua wang lu, penui ruage sap kai lu ze, penui je, “Peize ningnui dage desieyibe bam lau,” kacheu de lei.

²⁰Pa ne aize sa gai lu dege, pa ne penui je pe ba kena benai pe jak teilia gai de lei. Chidadege penui chize ngau lu penui suiyi ze bam lei.

²¹Isua ne penui je rang dai ze, “Peize ningnui dage desieyibe bam lau, Bepeu ne achu lang gai gum ze I du ningnui je lang gai lei,” kacheu de lei.

²²Zai aize pa ne sa gai lu dege, penui peireige pe chui ’mmut kai lu, penui je, “Herui Ka’nchibe ngau le zu lau.

²³Ningnui ne mi-mige gu hemui ramme lun dizai â chiramme lun gai ’nde lei; ningnui ne mi-mige gu hemui kebang gai dizai â, chiramme kebang gai ’nde lei,” ze kacheu lei

²⁴Chunage Thomasbe hangkereu-ze-kename ruage hangkat ’Mpinlungbe ze kubepeu â Isua wangbe luage penui dage bam mak lei.

²⁵Chidadege kenieme kêdame ne pechu ranglia ze, “Heguang je anui ngau lu de lei,” kacheu de lei. Kane pa ne penui je, “Pe ba kena ge hegeîkeriaktu jâm I ngau mak, zai hegeîkeriaktu jam ge a bakêrang ne deîtau sing gai mak, zai pe jak ge pe jâm a ba ne deîtau sing gai makchai â, I â ’nnum’mmi ra mak lei,” kacheu de lei.

²⁶Hezie desatne chângge pe gu kenieme kilûng ge bam’nduikadaibe ge â, penui ruage Thomasbe bam lei. ’Ngkam ramme kainam kam nan ze bam lei, kane Isua wang ze, penui ruage sap kai lu penui je, “Peize ningnui dage desieyibe bam lau,” kacheu de lei.

²⁷Dadege Thomasbe je pa ne, “Ning bakêrang aige kai lau, zai a ba kena pie gai lau; zai ning ba kena getuapat ze a jak ge pe jâm deîtau gai lau; keneibe ga ze bam se lau, kane ’nnum’mmi de zu lau,” kacheu de lei.

²⁸Thomasbe ne pechu kak ze, “A Wang zai a Rapeu!” kacheu de lei.

²⁹Isua ne pechu, “Achu nang ngaulube ziegene nang ’nnum’mmi di de mei? Ngau mak ze ’nnumka’mmime yi de lei,” kacheu de lei.

³⁰Chunage Isua ne kenieme masua gene, aipau leisikuak lungge rawgaimakbe mâtei-liabe kêdabe ramme misongga tewlia gai bei de lei;

³¹kane Isua â Krista, Hera Na lei be ningnui ’nnum’mmi le ra hangge, zai ’nnum’mmi lu, pe ji ge ningnui keringbe ngau le ra hangge airamme rawdiak kai de lei.