Read Zeme Naga JOHAN 3 Bible Online

JOHAN 3 - Zeme Naga bible

JOHAN 3

¹Chunage Pharisai’mpeu hangkat pe ji Nikodemasbe, Judame gu pemuitewpeu bam lei.

²Aipaupeu ze tingmuî ne Isua dage wang lu ze, pechu, “Rabbi, nang â Hera dagene wangbe Geteiliapeu lei be anui chî lei; nang mâ-ningdaulakbe tâ ramme tewbe ze mî de tewchi lak lei, pe dage Hera bam makchai aî,” kacheu de lei.

³Zai Isua ne pechu kak ze, “Pelingsing, pelingsing ze ningchu I rang lei, mige de lungkeurechi dai makchai â, Hera gu heguangram pa ngaulak lei,” acheu bei de lei.

⁴Dadege Nikodemasbe ne pechu, “Ziemmena gechîng chaine ’ndaigum ze pechu lungkeu dai ra lau? Pe pui gu henarak ge lua pakenabe gut lu ze lungkeuchi duî mei?” kacheu de lei.

⁵Isua ne kak ze, “Pelingsing, pelingsing ze ningchu I rang lei, mi-mige de hemi benai Herui gene lungkeu dai makchai â, Hera gu heguangram pa gut lak lei.

⁶Chi hemeipum gene lungkeube â hemei lei, zai Herui gene lungkeube ze â herui lei.

⁷‘Ningnui (kehu ’mbene) lungkeurechi dai himchang ra lei,’ ze ningchu I kacheube ze ’nningdaulak se lau.

⁸Tingkai â pa ne guinei-neibe ge gui lei, zai chipau kuâ nang ne seu lei, kane chize ’ndai’nggene wang mei zai ’ndai’ngge tat mei be nang chî mak lei; chigum ze mi-mige Herui gene lungkeume leine dage du chigum bam de lei,” ze kacheu de lei.

⁹Nikodemasbe ne pechu, “’Ndaigum ze aize changchi ra lau,” ze kacheu de lei.

¹⁰Isua ne pechu kak ze, “Nang Israelme gu geteiliapeu chang lu aize nang chî mak kerei mei?

¹¹Pelingsing pelingsing ne ningchu I rang lei, anui gechîbe ze anui â sa lei. Zai anui ngaulube ze sakkitew lei; kane anui sakkitewgaibe ze ningnui ne ’nchâ mak lei.

¹²I ne kedeirei gu mâ-mâ ramme ranglia bei ze ningnui ne ’nnum’mmi mak tizai â I ne tinggîm gu mâ-mâ ramme ranglia bei sedu ’ndaigum ningnui ’nnumtew ra lau?

¹³Ziemmena tinggîm gene wangkeupeu runne zangno, mî de tinggîm ge chube kau ga lei.

¹⁴Zai hênamkang ge Mosabe ne henêu teigetuachu ze da gai gum ze, ziemmena Na je du teichu ze da gai himchang gu lei,

¹⁵chidezai mi-mige pa ge ’nnumka’mmime leine ring le ra hangge zeu,” ze acheu bei de lei.

¹⁶Hera ne kedeirei je hung-desangdibe ziegene pe Na-nekune hangkatgapbampeu pa ne pei gai lei, mi-mige de pechu ’nnumka’mmibe kau â ga ra mak lei, kane ringbetunmakbe ngau gu lei.

¹⁷Kedeirei je tew’ngkui ra hang Hera ne pe Na je kedeirei ge lang gai mak lei, kane pa gezene kedeirei je tew’nring gai ra lang gai lei.

¹⁸Pa ge ’nnumka’mmibe kau je â tew’ngkui gai me lei; mige ’nnum’mmimakbe kau je â kenû ge tew’ngkui gai ’nde lei, Hera Na hangkatgap bambepeu ji ge pa ’nnum’mmimaktaibe ziegeneu.

¹⁹Zai tew’ngkuigairabe ze â aize de lei, kedeirei ge kebabe wangkeu bei ze, ziemmename ne kebabe je sua kemuîbe je hungdibe zeu, penui tatew ramme siabe ziegeneu.

²⁰Mi-mige de kesiabe tâ tewbe kau â kebabe je ngaugailak lei, zai kebabe ge wang mak lei, makchai â, pe tâ ramme ralia gai bu daseu.

²¹Kane pelingtewbe kau â kebabe ge wang lei, chidezai pe tatew leine ze Hera ge pa tew lei be ngau’nchichiak le ra hangge zeu.

²²Aipau chângge â Isua benai pe gu kenieme ze Judiaram ’mbe tat ti de lei; chige penui dage pa ’nnai ze baptistew ze bam lei.

²³Zai Johanbe du Salim taihia, Aenon ge baptistew bam lei, chige hedui kie dadegeu; zai ziemmename wang ze penui je baptistew gai bei de lei.

²⁴Johanbe je kebangki ge kai mak kerei dadegeu.

²⁵Zai Johanbe gu kenieme benai Juda’mpeu hangkat kakge huika’nchibe sie tedeu ge samtube bam de lei.

²⁶Dadege penui Johanbe dage wang lu pechu, “Rabbi, Jordan giam ge ning dage bambepeu, pechu nang ne sakkitewgaipeu ze aige baptistew ze lamui lei, zai ziemmename leine pe dage zuamie ze la lei,” ze kacheu de lei.

²⁷Johanbe ne kak ze, “Mî de mâ de ngaulak lei, tinggîm ’mbene pechu peigai’ndibe runne zangnêu.

²⁸I â Krista mak lei, kane pe suage achu â lang’ntua gai lei, zai I sabe ze ningnui zene sakki kam de lei.

²⁹Meibepui je lubepeu ze â henâukupeu ze de lei; Henâukupeu-meripeu, chi sap lu ze pe kuâ seubampeu ze henâukupeu kuâ ge pe suiyi-desang ze bam de lei; chipauziegene ai a suiyibe ze chuna â ’nsang de lei, ze kacheu de lei.

³⁰Pa â pungbi-bi himchang gu lei, kane I â ’nsînbi-bi himchang gu lei,” ze kacheu de lei.

³¹Kehu ’mbene wangkeupeu â ’nteumena peireige bam lei; kedeirei gene patpeu â kedeirei gu chang lei, zai kedeirei gu ze pa sa lei; kehu ’mbene wangkeupeu â ’nteumena peireige bam lei.

³²Pa ne ngaulube benai seulube ze pa sakkitew lei. Leusede pa sakkitewgaibe ze mî de ’nchâ mak lei;

³³pa sakkitewgaibe ze ka’nchâbe kau â, Hera â gesang lei be chigaihâ lei.

³⁴Hera ne langgaibeipeu â Hera gu sam ramme sa lei, pa ne periâ ’ndeutit lu ze Herui pei mak daseu;

³⁵chi Bepeu ne pe Na je hung lei, zai mâgetaleine pe ba ge pei kam gai ’nde lei.

³⁶Pe Na ge ’nnumka’mmibe kau â, keringbe betunmakbe pe dage bam lei; chi pe Na kuâpheumakbe kau â, keringbe ngau ra mak lei, kane Hera lumpum pe peireige bam bam lei.