Read Zeme Naga JOHAN 4 Bible Online

JOHAN 4 - Zeme Naga bible

JOHAN 4

¹Chunage Isua â Johanbe suadu pe gu kenieme hang tewgai’ngkie zai baptistew ka’ngkiebe rasam Pharisaime seu di de lei be Heguangpeu chî lu dege,

²(Isua sing ne â baptistew mak kane pe gu kenieme runne tew leusedu)

³Judia sâu nan ze, Galili ’mbe tat dai di de lei.

⁴Zai Samaria pa tatpela ra chang lei.

⁵Dadege Samaria gu namdi kat, Sukar kacheube, Jakobbe ne pe na Josepbe hang kedei peigaibe bâm taige pa tatchang de lei.

⁶Chige Jakobbe gu dekua bam lei, zai tebeîtewbe ziegene Isua leikeu di dege, dekuaki taige pa ’ntau gai de lei. Chize tîngna ’nchetkak kereu ze kena hî gum di de lei.

⁷Chige Samaria’mpui hangkat heduituak ra wangkeu de lei. Isua ne pechu, “I sak kai ra pei lau,” kacheu de lei.

⁸Pe gu kenieme â mâ teu ra lui ra hang namdi ’mbe tat ti dadegeu.

⁹Chi Samaria’mpui ne pechu, “’Ndaigum ze nang Juda’mpeu ne I Samaria’mpui dagene hedui sak kai ra kie lau?” kacheu de lei. Judame â Samariame benai mâ de ’ngnga mak bam dadegeu.

¹⁰Zai Isua ne pechu kak ze, “Hera gu kela peibe benai ‘Sak kai ra achu pei lau,’ ze ning dage kacheupeu je nang chî lu laîzai â pechu nang kie gu, dezai pa ne ningchu keringbe hedui pei bu de lei,” ze acheu bei de lei.

¹¹Chi ’mpuimi ne pechu, “A pau gau, ning dage tuakrabe zat hang mâ de ga lei, zai dekuaki du chuk lei; ’ndai’nggene nang chi keringbe hedui ngau lau?

¹²Anui je aipau dekua ze peibepeu, zai aigene pa benai pe name, zai pe gu kaurui ramme du sak ze bambe, anui peu Jakobbe sua â nang di mei?” ze kacheu de lei.

¹³Zai Isua ne pechu, “Mi-mige de aipau dui sakme leine â, herei dai gu lei,

¹⁴kane mi-mige de I peirabe hedui sakbe kau â, mâtew-tewsede herei dai ra mak lei; pechu I peirabe hedui ze pa gene heduidepin chang ze keringbe betunmakbe hangge sungchu ze bam gu lei,” kacheu de lei.

¹⁵Chi ’mpuimi ne pechu, “A pau gau, aipau dui ze achu pei lau, I herei dai mak ra, zai aigene hedui tuak ra I wangkeu dai mak ra hangge zeu,” kacheu de lei.

¹⁶Isua ne pechu, “Tat ze ning napeu je kû lu, aige wang lau,” ze acheu bei de lei.

¹⁷Chi ’mpuimi ne pechu kak ze, “A napeu ga lei,” ze kacheu de lei, Isua ne pechu, “‘A napeu ga lei,’ ze nang kacheube ze gesang de lei;

¹⁸ning napeu hangmengeu chang de lei; zai chuna nang ngualungpeu du ning napeu mak lei; ai nang sabe ze gesang de lei,” kacheu de lei.

¹⁹Chi ’mpuimi ne pechu, “A pau gau, nang ze kemeu’mpeu lei be I chî de lei.

²⁰Anui paume â aipau kedeiloa hube ge kakellum de lei; zai ningnui ne ziemmename kellum singrabe bâm â Jerusalem ze de lei” ze kacheu de lei.

²¹Isua ne pechu, “Mpuimi gau, achu ’nnum’mmi le lau, aipau kedeiloa hube peireige du zai Jerusalem ge du mak ze ningnui ne Bepeu je kellummerabe ting wang la de lei.

²²Ningnui â ningnui chimakbe je kakellum lei; anui â anui chibe je kakellum lei, tewka’nringbe â Judame dagene pat daseu.

²³Kane panehî wang mui de lei, zai chuna ze de lei, gesang ne kakellumme Bepeu je Herui benai samsang gene kellumrabe ting zeu, aigumbe kau je Bepeu ne pechu kellum ra peu daseu.

²⁴Hera â herui lei, zai pechu kakellumme â herui benai samsang ne kellum himchang ra lei,” ze kacheu de lei.

²⁵Chi ’mpuimi ne pechu, “Messiah (Krista kacheupeu) ze wangkeu zi gu lei be I chî lei; pa wangkeu dezai mâ-pelane pa ne anui je teilia gu lei,” kacheu de lei.

²⁶Isua ne pechu, “I ningchu ka’mpaupeu I ze pa de lei,” kacheu de lei.

²⁷Chipau luage pe gu kenieme wang de lei. ’Mpuimi je pa ka’mpaube ze penui ’nningdaulaklu-lu bam de lei, kane mî de, nang ’ndaikau lunei lau? ze mei nune “’Ndaitew nang pechu ka’mpau lau?” ze acheu mak lei.

²⁸Dadege chi ’mpuimi pe gu heduibung sâu nan ze, namdi ’mbe tat ti de lei, zai ziemmena ramme je salia ze,

²⁹“Wang lu ze a tatew leine rangliapeu je pie gai ni lau. Aipaupeu ze Krista de mei?” kacheu de lei.

³⁰Namdi gene penui hela pat lu pe tailam wang de lei.

³¹Chipau kakge kenieme ne pechu kiâm ze, “Rabbi, mâ-teu zu lau,” kacheu de lei.

³²Kane pa ne penui je, “Ningnui chimakbe hetak I teu ra la lei,” kacheu de lei.

³³Dadege kenieme kat-kat je ’mpau ze, “Pe gu hetak hang mige ne teiwang bei semei?” kacheu de lei.

³⁴Isua ne penui je, “A gu hetak â achu langgaipeu suî’nning tew ra, zai pe tâ ze tewpuigairabe ze lei.

³⁵Ningnui ne, ‘Kêu medai dezai helugatrabe ting chang du de lei,’ ze acheu mak ti lau? Ningnui je I rang lei, ’ngngangchu ze helu ramme pie gai ni lau, gat ra hang helu ramme mei’nzin la de lei.

³⁶Gatbepeu â tâtewbe hî ngau lei, zai keringbe betunmakbe hang perachî kaigekua gai lei, chidezai ka’nrukpeu benai penai hangna ne penai suiyi’nta ze bam ra hangge zeu.

³⁷Aige sabe sam, ‘Hangkat ne ’nruk, zai kêdapeu ne gat lei,’ kacheube ze gesang lei.

³⁸Ningnui ne tâtewhereugaimakbe gu ze gat ra I ne ningnui je lang gai lei; miramme ne tâtewhereu gai lei, zai ningnui â penui gu tatew ge gut lei,” ze kacheu de lei.

³⁹Chi ’mpuimi ne, “I tâtewgai’ndibe leine ze pa ne achu ranglia bei de lei,” acheu ze sakkitewgaibeibe ziegene chipau namdi ge Samariame misonggame pechu ’nnum’mmi kam di de lei.

⁴⁰Chigum ze Samariame ne pe dage wang ze penui dage ’nnai bam ra pechu kiam de lei; dadege chige hezie kena pa ’nnai gai de lei.

⁴¹Zai pe sam ziegene ziemmena misonggame ne du pechu ’nnum’mmi di de lei.

⁴²Zai penui ne chi ’mpuimi je, “Chuna â ning sam ziegene anui ’nnumka’mmibe chang ta de lei, anui runne ne seu lu de lei, zai aize kedeirei tewka’nringpeu run lei be ze anui chî lu de lei,” ze kacheu de lei.

⁴³Zai hezie kena châng dege, Galili ’mbe pa tat ti de lei.

⁴⁴Isua pa sing ne, kemeu’mpeu â pe ram sing ge â pengêu ga lei, ze sakkitew gai lu dadegeu.

⁴⁵Chigum ze Galili ge pa wangchang dege, Galilime ne Jerusalem ge hengî ting ge pa tâtewgai’ndibe leine penui ngau kam lu ze, pechu ka’nchâ de lei, penui du kahengîbe ge tat lu dadegeu.

⁴⁶Chigum ze Galili ge Kana keloa ge pa wang gai kadai de lei, chi hedui ne wain chang ra pa tewgaibe bâm gezeu. Zai Kaperna-um ge saibe hangkat pe na ’nrâ ze bam lei.

⁴⁷Zai chi saibe ze Isua Judia gene Galili ge wang la de lei be sam seu lu dege, pe dage wang ze, pa ne wangkeu ze pe na je tew’mmi gai ra pechu kiam de lei, pe na chaitena bam di dadegeu.

⁴⁸Chidadege Isua ne pechu, “Mâ-ka’nchetbe benai tâningdaulakbe ramme ningnui ngau makchaine â ningnui â ’nnum’mmi ra mak lei!” acheu bei lei.

⁴⁹Chi saibe ne pechu, “A pau gau, a na chai makge wangkeu zu lau,” kacheu de lei.

⁵⁰Isua ne pechu, “Tatchu lau; ning na ring gu lei,” acheu bei de lei. Chipaupeu ze Isua ne pechu rangbeibe sam ze ’nnum’mmi lu ze tat ti de lei.

⁵¹Zai pa acheu tatkeu lage pe gu tâka’ngguame ne pechu hedau lu pe na ze ring la de lei be ze pauliâ bei de lei.

⁵²Dadege pa ne penui je pe na yibi di ze chudaidibe hî ze ’nneu gai dege penui ne pechu, “’Nzimai ’nchetkak kat hî gum ge pa ka’nrâbe sau di de lei,” ze acheu bei de lei.

⁵³Isua ne chize pechu, “Ning na ring gu lei,” kacheube hî sing ge de lei be ze pe peu chî di de lei; zai pa benai pe kibaume leine ne ’nnum’mmi di de lei.

⁵⁴Aize Judia gene Galili ge pa wangkeulube chângge Isua tâningdaulakbe tewbe pakenabe de lei.