Read Zeme Naga JOHAN 5 Bible Online

JOHAN 5 - Zeme Naga bible

JOHAN 5

¹Aipau chângge Judame gu kahengîbe kat bam ze, Isua Jerusalem ’mbe hang di lei.

²Zai Jerusalem lungge Meli Keriekemui taige heduisungbe kat Hebrai lad ge Beth-zatha, kacheube bam lei. Chige hezai hang heki liâmpatkaibe mengeu bam lei.

³Chige keteukeneume, mikchitme, pîsiame, pum pikatlam chaime misongga ze jeikuâ ze bam bam lei, hedui ’ngngairabe hang kuâ zeu;

⁴tingge dege â chi heduisungbe ge Tingwang gu angel’mpeu ne wangkeu ze hedui tew’ngngai’nrui gai bei bei lei; hedui tew’ngngaigaibeibe chângge gutrailu-lume â penui dage geteukeneube zat ramme bambe yi di di lei.

⁵Chige hangkat kum himreu ze desat riâ ’nrâdibe kau bam lei.

⁶Isua ne pechu ngau lu, zai chige pa jeitie-desangdibe chî lu dege pechu, “Ningchu tew’mmi gai be ra nang lunei mei?” ze kacheu de lei.

⁷Chi ka’nrâpeu ne pechu kak ze, “A pau gau, hedui tew’ngngaigaibe chângge hezai ge achu kairabe kau mî de ga lei, I gut ra heka gai dege kêdapeu ne a sua tatraî di di lei,” ze kacheu de lei.

⁸Isua ne pechu, “Zuachu lu ning paîzui pua lu ze tatchu lau,” acheu bei de lei.

⁹Dadege luakatne chipaupeu je tew’mmi gai bei de lei, zai pe paîzui puachu lu tat ti de lei. Chipau mai ze ’ntakbambe mai lei.

¹⁰Chidadege tew’mmigaipeu je Judame ne, “Nemai â ’ntakbambe mai lei, ning paîzui pua ra besie mak lei,” acheu bei de lei.

¹¹Kane pa ne penui je kak ze, “Achu tew’mmigaipeu ne achu, ‘Ning paîzui puachu lu tatchu lau,’ ze rang gai de lei,” ze kacheu de lei.

¹²Penui ne ’nneu ze, “ ‘Ning paîzui pua lu tatchu lau,’ kacheupeu ze châu lau?” kacheu de lei.

¹³Chunage chi tew’mmigaibeipeu â chize châu mei be chî mak lei, chipau bâm ge ziemmena kie di dadege Isua â reine ze tat ti de lei.

¹⁴Bechâng dege Isua ne pechu kellumki ge ngaudau lu pechu, “Ni, nang yi di de zeî lau! Hemui tâ tew dai ta lau, ning peireige mâ-kesiabe wang me ra hangge zeu,” acheu bei de lei.

¹⁵Chipaupeu tat ti de lei, zai pechu tew’mmigaipeu â Isua de lei ze Judame dage pauliâ gai de lei.

¹⁶Aipau ziegene Judame ne Isua je tewsâ de lei, airamme ’ntakbambe mai gene pa tewbe ziegeneu.

¹⁷Kane Isua ne penui je kak ze, “A peu â tâtew lamui rei lei, I du tew bam lei,” acheu bei de lei.

¹⁸Aipauziegene Judame ne pechu tewchat ra peuranbi-bi bam di de lei, ’ntakbambe mai reimakbe runne mak ze, Hera je pe Peu lei ze kû ze, zai pe runne pechu Hera benai ka’nsambe hang tewgaibeibe ziegeneu.

¹⁹Isua ne penui je, “Pelingsing, pelingsing ze ningnui je I rang lei, pe Na pe runne suî’nning ne mâ de tewchi lak lei, Bepeu tâtewbe pa ne ngaube runne tew zangnêu; Bepeu ne tewgaibe leine ze pe Na ze du tew daseu.

²⁰Bepeu ne pe Na je hung dadege pa tewgaibe leine pe Na je teilia kam gai bei de lei; zai ningnui ’nningdaulak ze bam ra hangge ai suadu tâ-kedibe ramme pa ne pechu teilia gu rei lei.

²¹Bepeu ne chaidime je kuakchu gai ze, penui je keringbe pei gum ze, pe Na ne pa ne nei-neime je keringbe pei lei.

²²Bepeu â mî je du samram mak lei, kane samrambe leine pe Na dage pei gai ’nde lei,

²³chidezai ’nteumena ne pe Na je hengêutew ra hangge zeu, Bepeu je penui hengêutew gum zeu. Pe Na je hengêutewmakbe kau â Bepeu pechu langgaipeu je hengêutew mak lei.

²⁴Pelingsing, pelingsing ze ningnui je I rang lei, a sam seu ze achu langgaipeu je ’nnumka’mmibe kau â pe dage keringbe betunmakbe bam lei; pa â samrambe ge wang me lei, kane kechaibe gene keringbe ge zuapat ti de lei.

²⁵“Pelingsing, pelingsing ze ningnui je I rang lei, panehî wangchangzi gu de lei, zai chuna ze de lei, chi chaidime zene Hera Na kuâ seurabe benai keseume leine ne ringrabe ting zeu.

²⁶Bepeu ne pa sing ge keringbe bam gum ze, pa ne pe Na je du pa sing ge keringbe bam ra pei bei de lei,

²⁷zai pechu samram ra rezie pei gai bei de lei, pa â ziemmena Na chang dadegeu.

²⁸Aige ’nningdaulak ze bam se lau; heraw ge bamdime leine ne pe kuâ seu ra

²⁹zai tâ keyibe tewme leine ne keringbe chukadaibe ge zuapat zai tâ kesiabe tewme leine ne samrambe chukadaibe ge zuapat ra panehî wangchangzi gu de lei.

³⁰“A runne I a gu rezie ne mâ de tewchi lak lei; I keseube luî I samram lei; zai a gu samrambe â kapelingbe lei, a suî’nning tew ra I peu mak, kane achu langgaipeu suî’nning tew ra I peube ziegeneu.

³¹I a runne achu sakkitew dizai â, I sakkitewbe ze kapelingbe mak lei;

³²achu sakkitewpeu kêdabe la lei, zai pa ne achu sakkitewgaibe ze kapelingbe lei be I chî lei.

³³Johanbe dage ningnui lang gai de lei, zai pa ne samsang ze sakkitew gai bei de lei.

³⁴Chi sakkitewbe I ngaube ze ziemmename dagene ngaube mak lei; kane ningnui ringpat le ra hangge aize I rang lei.

³⁵Pa (Johanbe) â hemibung getaube lerba ze bambe kau lei, zai ting kat hangge ningnui â pe gu pa’mbi gene ningnui suiyi’nta ze bam gai nei de lei.

³⁶Kane achu sakkitewgaibe I ngaube â, Johanbe gu sakkitewbe sua â di lei; tâ ramme I tew’nsang gai ra Bepeu ne achu peibe ai I tew bambe tâ ramme zene Bepeu ne achu lang gai lei be sakkitew gai de lei.

³⁷Zai Bepeu langgaipeu sing ne achu sakkitew gai lei. Pe kuâ ningnui mâdauge du seu mak, zai pe luî du ningnui mâdauge du ngau mak lei;

³⁸zai pe sam du ningnui ge bam mak lei, pa ne langgaipeu je ningnui ’nnum’mmimakbe ziegeneu.

³⁹Rawdiakkaibe ka’nchibe sam ramme je ningnui peu lei, chigezene keringbe betunmakbe ningnui ngau ra ’nnumgaibe ziegeneu; zai chi rawdiakkaibe ka’nchibe sam ramme zene achu sakkitew de lei;

⁴⁰Acheuleusedu keringbe ningnui ngau ra hang a dage ningnui wang nei mak lei.

⁴¹Ziemmename dagene pengêudibe I ’nchâ me lei.

⁴²Kane Hera kehungbe ningnui lung ge ga lei be I chî lei.

⁴³A peu ji gene I wangkeu de lei, zai ningnui ne achu ’nchâ mak lei; kêdapeu ne pe runne pe ji gene wangkeu bei laîzaine â pechu ningnui ’nchâ gu lei.

⁴⁴Ningnui kat-kat dagene pengêudibe ’nchâ ze, zai Hera katgap bambepeu dagene wangbe chi pengêudibe je peu mak ze ’ndaigum ningnui ’nnum’mmichi le ra lau?

⁴⁵I ne Bepeu dage ningnui je kesia’ndamgairabe hang ningnui ’nnum gai se lau; chi Mosabe ningnui ka’nnumbe kaipeu zene ningnui je â kesia’ndam gai de lei.

⁴⁶Mosabe je ningnui ’nnum’mmi dizai â, achu du ningnui ’nnum’mmi gu lei, a rasam pa ne raw gai daseu.

⁴⁷Kane pa rawbe sam ramme ningnui ne ’nnum’mmi makchai â, ’ndaigum ze a sam ramme ningnui ’nnum’mmi ra lau?” kacheu de lei.