Read Zeme Naga JOHAN 6 Bible Online

JOHAN 6 - Zeme Naga bible

JOHAN 6

¹Chipau chângge Isua Galili sungkling katlam giam Tiberias sungkling kacheu ’mbe kapat ti de lei.

²Zai baudime misongga ze pe chai suitat ti de lei, keteukeneume peireige tâningdaulakbe ramme misongga pa tewgaibe penui ngaulube ziegeneu.

³Isua kedeiloa ’mbe hang lu, chige pe gu kenieme je nguakantau de lei.

⁴Chunage Judame gu Tat’ntuahengi na di de lei.

⁵Dadege pa ’ngngangchu dege pe tailam baudime misongga wangbe ngau lu, Isua ne Philipbe je, “Aime bau teu ra hangge ’ndai’nggene anui tingku lu ra lau?” kacheu de lei.

⁶Aize â pechu kedak ra hangge pa ne sa de lei, pa â pe runne ’ndaikau tew ra mei be chî lu dadegeu.

⁷Philipbe ne pechu kak ze, “Penui ’nteumena kecheî-cheîne teu gai ra hang rangkângpum haî na mî ne â tingku cham lei,” acheu bei de lei.

⁸Pe gu kenieme ruage hangkat Andriabe, Simon Peterbe kinapeu ne pechu,

⁹“Aige ’mpeumi napoine hangkat la lei, pe dage barli tingku mengeu benai hekâ kena la lei; kane aikieme hangge aize ne ’ndaikau chang ra lau?” kacheu de lei.

¹⁰Isua ne, “Baudime je peize ’ntau kam gai lau,” acheu bei de lei. Chunage chige timpeizeu bam lei; dadege baudime ’ntau kam gai de lei, chang mengeu riâ gum zeu.

¹¹Dadege Isua ne tingkukuak kena tei lu, pe suiyibe sam pau gai lu dege, ka’ntaume je ’nzi gai bei de lei; chigum ze hekâ ramme du penui teudui-duî gum pei bei de lei.

¹²Zai penui teu’nggeu lu dege, pa ne pe gu kenieme je, “Padesuine ramme ka’nsakbe ruiwang kam gai lau, mâ de peize ’ngga mak ra hangge zeu,” kacheu de lei.

¹³Chigum ze barli tingku mengeu penui ne teuka’nsakbe padesuine ’ntui kereu ze kena ruipui lu de lei.

¹⁴Baudime ne Isua tâningdaulakbe tewgaibe penui ngau lu dege penui ne, “Kedeirei ge wangkeurapeu kemeu’mpeu ze aipaupeu sing de lei!” kacheu de lei.

¹⁵Pechu ngua lu ’nchi-chine penui pechu Heguang hang suang gai ra wangrabe Isua chî lu dege, pe runne kedeiloa kehu ’mbe tat dai di de lei.

¹⁶Zai tingnaimik hegî dege, pe gu kenieme sungkling ’mbe wangkeu lu,

¹⁷’nnei ge gut lu, Kaperna-um giam ’mbe kapat ti de lei. Chize muî di de lei, zai Isua â penui dage wangchang mak kerei lei.

¹⁸Tingkai kechibe guiwangbeibe ziegene sungkling hedui gesuâk ze bam lei.

¹⁹Zai mail kechum mei, nu mail medai mei gum ze hedui peireige ’nnei gene penui tat kai dege, sungkling peireige Isua tat ze ’nnei ’mbe wangbe penui ngau de lei. Penui hing di de lei,

²⁰kane pa ne penui je, “I lei; hing se lau,” kacheu de lei.

²¹Chidadege penui suiyi ze ’nnei ge pechu teigut kai de lei, zai luakatne penui tatrabe bâm ge ’nnei chang di de lei.

²²Bechaibe mai dege sungkling katlam giam baudime bamkuame ne ’nnei kat runne bambe ngau lu, zai Isua â pe gu kenieme ruage chi ’nnei ge gut mak ze, kane pe gu kenieme runne tat ti de lei be penui chî lu de lei.

²³Kane Heguangpeu ne pe suiyibe sam paugailube chângge penui tingku teube bâm chige Tiberias ’mbene kêdabe ’nnei ramme wangchang de lei.

²⁴Dadege baudime ze Isua benai pe gu kenieme chige bam mak lei be chî lu dege ’nnei ramme ge gut kai lu Kaperna-um ’mbe Isua je peutat ti de lei.

²⁵Sungkling katlam giam ’mbene Isua je penui ngaudau lu dege, penui ne pechu, “Rabbi, ’ndaitewbe lua ne nang aige wang lau?” ze kacheu de lei.

²⁶Isua ne penui je kak ze, “Pelingsing, pelingsing ze ningnui je I rang lei, tâningdaulakbe ramme ningnui ngaulube ziegene achu ningnui peube mak lei, kane tingku ramme ningnui teu’nggeugitlube ziegene de lei.

²⁷Hetak ’nggadairabe hangge ningnui tâtewhereu se lau, kane keringbe betunmakbe hang bam-bamderabe hetak chi ziemmena Na ne ningnui je peirabe, chipau hangge tâtew lau; Hera Bepeu ne pe peireige pe gu ka’nchetbe kai ’ndi daseu,” kacheu de lei.

²⁸Dadege penui ne pechu, “Hera gu tâ anui tewrabe ze ’ndaikau anui tewsingrabe lau,” kacheu de lei.

²⁹Isua ne penui je kak ze, “Hera gu tâ â aize de lei, pa ne langgaipeu je ningnui ’nnum’mmirabe zeu,” acheu bei de lei.

³⁰Dadege penui ne pechu, “Acheuzaine anui ngau lu ningchu ’nnum’mmi le ra hangge tâningdaulakbe ’ndaikau nang tew lau? ’Ndaikau tâ nang tew lau?

³¹Anui peume â hênamkang ge manna ze teu lu de lei; ‘Tinggîm ’mbene penui teu ra pa ne pei bei lei,’ ze acheu rawgai’ndibe gum zeu,” ze acheu bei de lei.

³²Dadege Isua ne penui je, “Pelingsing, pelingsing ze ningnui je I rang lei, tinggîm ’mbene tingku ningnui je peigaipeu ze Mosabe mak lei; a peu ne tinggîm ’mbene hetak gesang ningnui je pei lei.

³³Hera gu tingku ze â chi tinggîm ’mbene wangkeube kedeireime je keringbe peibe ze daseu,” kacheu de lei.

³⁴Penui ne pechu, “Heguang gau, aipau tingku anui je pei ze bam lau,” kacheu de lei.

³⁵Isua ne penui je, “I keringbe tingku lei, a dage wangbe kau â, ’njei ra mak lei, zai achu ’nnumka’mmibe kau â, mâtew-tewsede herei ra mak lei.

³⁶Kane achu ningnui ngau lu da, sede ’nnum’mmi mak lei, ze I ningnui je acheu bei de lei.

³⁷A peu ne achu peigaibe leine a dage wang kam gu lei; zai a dage wangbe kau je â pechu I kelitua ra mak lei.

³⁸A suî’nning tew ra tinggîm ’mbene I wangkeu mak lei, kane achu langgaipeu ’nning tew ra wangkeu daseu;

³⁹zai achu langgaipeu ’nning â aize de lei, achu peigai’ndibe leine mâ de tew’ngga mak ze kane nâlangbe mai ge teichukamgairabe zeu.

⁴⁰Mi-mige pe Na je ngau lu pechu ’nnumka’mmime leine ne keringbe betunmakbe ngaulerabe ze a peu ’nning de lei; zai nâlangbe mai ge I ne pechu teichu dai gu daseu,” ze acheu bei de lei.

⁴¹Chidadege pa ne, “I â tinggîm ’mbene wangkeube tingku lei,” ze acheubeibe ziegene Judame ne pe peireige katelum de lei.

⁴²Penui ne acheu sa ze, “Aize Isua, Josepbe na, pe peu benai pe pui je anui chî mak ti lau? ’Ndaigum ze chuna pa ne, ‘I â tinggîm ’mbene wangkeu lei,’ ze kacheu lau?” ze penui kacheu de lei.

⁴³Isua ne penui je kak ze, “Ningnui karai runne telum se lau.

⁴⁴Bepeu achu langgaipeu ne pechu ’nrupwang makchai â mî de a dage wangchi lak lei; Zai I ne nâlangbe mai ge pechu teichu gai gu lei.

⁴⁵Kemeume ne acheu ze rawgai’ndibe ze, ‘Zai Hera ne penui je getei gai kam gu lei,’ ze kacheu de lei. Mi-mige Bepeu dagene seulume benai chîlume leine â, a dage wang lei.

⁴⁶Mi-mige de Bepeu je ngaube kau ga lei, Hera dagene patpeu je runne zangnêu; pa Bepeu je ngau lu de lei.

⁴⁷Pelingsing, pelingsing ze ningnui je I rang lei, ’nnumka’mmibe kau â, pe dage keringbe betunmakbe bam lei.

⁴⁸I â keringbe tingku lei.

⁴⁹Ningnui peume ne hênamkang ge manna ze teu lu penui chai di de lei.

⁵⁰Aize ziemmena ne teu lu chaimakrabe tinggîm ’mbene wangkeube tingku lei.

⁵¹I â tinggîm ’mbene wangkeube keringbe tingku lei; mige de aipau tingku teu dizai â, betingbeta pa ring bam gu lei; zai kedeireime ringrabe hangge tingku I peirabe ze â a pumji lei,” ze acheu bei de lei.

⁵²Dadege Judame penui karai ge tu ze acheu sa ze, “’Ndaigum ze aipaupeu ne anui je pe pumji teu ra peichi ra lau?” kacheu lei.

⁵³Chidadege Isua ne penui je, “Pelingsing, pelingsing ze ningnui je I rang lei, ziemmena Na pumji ningnui teu, zai pe jai ningnui sak le makchai â, ningnui ge keringbe ga lei;

⁵⁴a pumji teu zai a jai sakbe kau â pe dage keringbe betunmakbe bam lei, zai nâlangbe mai ge I ne pechu teichu gai gu lei.

⁵⁵A pumji â hetak gesang lei, zai a jai â sakrabe gesang lei.

⁵⁶Mi-mige de a pumji teu, zai a jai sakbe kau â, I ge bam bam lei, zai I du pa ge bam bam lei.

⁵⁷Bepeu keringbepeu ne achu langgaibe luigum zai Bepeu ziegene I ringbambe luigum ze (I ze keringbe tingku) achu teube kau â, a ziegene ring gu lei.

⁵⁸Aize tinggîm ’mbene wangkeube tingku lei, ningnui peume teu lu chaidibe tingku gumbe mak zeu; mi-mige de aipau tingku teube kau â, betingbeta ring bam gu lei,” kacheu de lei.

⁵⁹Kaperna-um ge pa mâ-geteilia ze bambe ge ka’nduibeki gene aize pa ne sa gai de lei.

⁶⁰Zai pe gu kenieme misonggame chize seu lu dege, “Aize â chuktibe samsa de lei; châu ne chize ’ngkingchi ra lau,” ze kacheu de lei.

⁶¹Kane Isua pe gu kenieme ne aipau sam ge katelum lei be pe runne ne chî lu dege pa ne penui je, “Aipau sam ge ningnui kesiatew mei?

⁶²Ziemmena Na ne pa tingtie bambe bâm ge chube ningnui ne ngau gai ra dizai â ’ndaigum ra lau?

⁶³Keringbe peibe ze herui ne de lei, hemeipum â matâu hang ga lei; ningnui dage I sagai’ndibe sam ramme â herui benai keringbe lei.

⁶⁴Kane ningnui ruage hanggesame â ’nnum’mmimakme la lei,” ze kacheu de lei. Isua â keraîbe luagene chaume ne pechu ’nnum’mmi mak mei, zai châu ne pechu zua ra mei be chî lu dadegeu.

⁶⁵Dadege pa ne, “Aipau ziegene ningnui je I rang bei dezei lau, Bepeu ne pechu pei be makchai â mî de a dage wangchi lak lei zeu,” kacheu de lei.

⁶⁶Aipau chângge â pe gu kenieme misonggame ze ’ngngîn dai kam di ze pechu ngua ze tatrua ta di de lei.

⁶⁷Isua ne kereu-ze-kename je, “Ningnui du tat-tenei di mei?” kacheu de lei.

⁶⁸Simon Peterbe ne pechu kak ze, “Heguang gau, châu dage anui tat kai ra lau? Ning dage keringbe betunmakbe sam ramme bam zeu;

⁶⁹zai nang â Hera gu Ka’nchipeu lei be anui ’nnum’mmi de lei, zai chî lu de lei,” ze kacheu de lei.

⁷⁰Isua ne penui je kak ze, “Ningnui hangkereu-ze-kename je I ne kelâng gai mak ti lau, zai ningnui ruage hangkat â diabolbe chang di zeu?” kacheu de lei.

⁷¹Pa â, Simon Iskariotbe na Judabe, chi hangkereu-ze-kename ruage hangkat, chipaupeu ne pechu zuarabe sam hangge sa lei.