Read Zeme Naga JOHAN 7 Bible Online

JOHAN 7 - Zeme Naga bible

JOHAN 7

¹Chipau chângge Isua Galili bak ruatat ti de lei; Judame ne pechu tewchat ra peubeibe ziegene Judiaram lungge â tatrua nei mak lei.

²Chunage Judame gu Hetiamliambe-ngi na di de lei.

³Dadege pe sikiname ne pechu, “Aipau bâm sâu nan ze Judia mbe tatchu lau, ning kenieme ne nang tâtewbe ngau le ra hangge zeu.

⁴Pechu peize chisatket ra peube kau â, reine ze tâtew mak lei. Airamme nang tew dizaine â, ning runne ningchu kedeireime dage teilia be lau,” kacheu de lei.

⁵Pe kiname ’nsangnedu pechu ’nnum’mmi mak ti daseu.

⁶Isua ne penui je, “A ting â wangchang merei lei, kane ningnui ting â aige bam bam lei.

⁷Kedeirei ne ningnui je ngaugailakchi lak lei, kane kedeirei ne achu â ngaugailak lei, I ne kedeirei tatew kesiabe ramme peireige sakkitewbeibe ziegeneu.

⁸Kahengîbe ge ningnui runne tatchu lau, aipau kahengîbe ge I â tat ra mak kerei lei, a ting â chang sing mak kerei daseu,” kacheu de lei.

⁹Pa ne acheu sa gai lu ze, Galili ge pa â ’nnai gai di lei.

¹⁰Kane pe kiname kahengîbe ge hangdibe châng dege, pa du hang di de lei. ’Ndûlang ze tat mak ze, reine ze tat ti de lei.

¹¹Zai kahengîbe ge Judame ne pechu peu ze, “Pa ’ndaige la lau?” ze penui kacheu de lei.

¹²Zai baudime ruage pechu damteliu bam de lei. Hanggesame ne, “Pa â ziemmena keyibe kau lei,” acheu, zai kêdame ne “Mak lei, pa ne baudime je nguaka’mmie de lei,” kacheu de lei.

¹³Kane Judame je hingbe ziegene mî de pe rasam ’ndûlang ze saba mak lei.

¹⁴Zai hengî-prîsi ge Isua kellumki ’mbe hang lu ze mâ-geteilia bam de lei.

¹⁵Judame ne chize ’nningdaulak ti ze, “’Ndaigum ze aipaupeu mâ-chika’mmibe bam rei se lau, pa mâdau du getei gai mak zeu?” kacheu de lei.

¹⁶Isua ne penui je kak ze, “I geteiliabe ze â a gu mak lei, kane achu langgaipeu gu lei,

¹⁷mi-mige ne pe gu ’nningtak ze Hera ’nning tewrabe lei dizai â chi mâ-geteiliabe ze Hera dagene patbe mei nune I ne a runne a gu rezie ne sa mei be ze pa chî gu de lei.

¹⁸Pe runne gu rezie gene samsabe kau â pe runne ngêu hang peu lei; kane pechu langgaipeu ngeudibe hang peube kau â, kapelingbe kau lei, zai pe dage ka’ngkuibe mâ de ga lei.

¹⁹Mosabe ne ningnui je hingde pei gai mak mei? Sede ningnui ruage mî de hingde tei mak lei. ’Ndaitew ze ningnui achu tewchat ra peu lau?” kacheu de lei.

²⁰Baudime ne pechu kak ze, “Ning dage herasiabe la de lei! Châu ne ningchu tewchat ra peu lau?” kacheu de lei.

²¹Isua ne penui je kak ze, “Tâ kat I ne tew gai de lei, zai ningnui ne chize ’nningdaulak lei.

²²Mosabe ne ningnui je rumkagetenbe pei gai lei, (chize Mosabe dagene patbe mak ze, kane ningnui paume dagene pat lei) zai ’ntakbambe mai ge ziemmena je ningnui ne rumgetan gai lei.

²³Mosabe gu hingde ze tewpângmakrabe hang ziegene ’ntakbambe mai ge du ziemmena rumgeten ze bam lei dizai â, ’ntakbambe mai ge ziemmena pumluî ze I ne tew’mmi ’nchichiakbeibe ziegene a peireige ningnui lumpum mei?

²⁴Kengaube ramme gene samram se lau, kane samrambe ge peling ne samram lau,” acheu bei de lei.

²⁵Chipauziegene Jerusalem ge bamme hanggesame ne, “Penui tewchat ra peubepeu ze aipaupeu mak ti lau?

²⁶Ni, aige ’ndûlang ze pa sam sa la lei, zai pechu penui mâ de sa mak zeu! Aipaupeu ze Krista de lei be rezieteime ne chî sing di de mei?

²⁷Sede aipaupeu ze ’ndai’nggene wang mei be anui â chî lei; kane Krista wangkeu dezai â pa ’ndai’nggene pat mei be mî de chî ra mak lei,” kacheu de lei.

²⁸Dadege kellumki lungge pa mâ-geteiliabe luage pa ’nrung ze, “Ningnui ne achu chî mei zai I ’ndai’nggene wang mei be du ningnui chî mei? Kane I â a sui-sui ne wangkeube mak lei; achu langgaipeu â gesang lei, zai pechu ningnui â chî me lei,

²⁹I â pechu chî lei, pe dagene I pat daseu, zai pa ne achu lang gai bei de lei,” kacheu de lei.

³⁰Chidadege pechu nîm ra penui peu de lei; kane panehî wangchangmakbe ziegene mî de pechu hebahuâ kai mak tai lei.

³¹Acheuleusede misonggame ne pechu ’nnum’mmi di de lei; penui acheu sa ze, “Chi Krista wangkeu dezai, aipaupeu ne dak ningdaulakbe ramme tewgai’ndibe suadu kie ze tewlia gu semei?” kacheu de lei.

³²Baudime ne pechu aigum ze satelum bambe Pharisaime seu de lei, zai tingkugechîngme benai Pharisaime ne pechu nîm ra saibe ramme je lang gai bei de lei.

³³Dadege Isua ne, “Beting keduîne hangge ningnui dage I bam gai gu rei lei, chipau châng dezai achu langgaipeu dage I tat ku lei;

³⁴ningnui achu peu gu lei, kane ningnui achu ngaudau ra mak lei; I bambe bâm ge ningnui wangchi lak lei,” kacheu de lei.

³⁵Judame penui kat-kat je, “Aipaupeu ze anui ne pechu ngau ta de ra hangge ’ndai’ngge pa tat te ra kaheka lau? Grikme ruage hetîtiruame dage pa tat ze Grikme je mâ-geteilia ra pa ka’nning semei?

³⁶‘Ningnui achu peu gu lei, kane ningnui achu ngaudau ra mak lei,’ zai ‘I bambe bâm ge ningnui wangchi lak lei,’ kacheube ze ’ndaikau gu rimba lau?” kacheu de lei.

³⁷Kahengîbe nâlangbe mai, chi ngidi mai ge, Isua ne sapchu lu sa ze, “Mi-mige herei zai â peize a dage wang sak le lau.

³⁸Mi-mige de achu ze ’nnumka’mmibe kau â, rawdiakkaibe leisikuak ge rangbe luigum ze, Hedui keringbe geuki ramme pe lung gene lua gu lei,” ze kacheu de lei.

³⁹Chunage pechu ’nnumka’mmime ne ngaurabe ai Herui rasam pa sa lei; herui pei gai mak kerei dadege, Isua je hengêutewgaimakbe ziegeneu.

⁴⁰Aipau sam ramme penui seu lu dege, baudime ruage hanggesame ne, “Aipau peu â kemeu’mpeu sing de lei,” kacheu de lei.

⁴¹Kêdame ne, “Aipau peu â Krista lei,” kacheu de lei. Kane hanggesame ne, “Galili gene Krista pat ra semei?

⁴²Krista â Dabidbe dagene piakeu ze Dabidbe bambe keloa Bethlehem gene wangkeu gu lei, ze rawdiakkaibe sam ka’nchibe gene rang mak ti lau?” kacheu lei.

⁴³Chidadege â pe ziegene baudime ruage pebau pângpat ti de lei.

⁴⁴Hanggesame ne pechu nîm nei de lei, kane mî de pe peireige heba pat kai mak tai de lei.

⁴⁵Dadege saibe ramme ze tingkugechingme benai Pharisaime tailam tat dai di de lei, “’Ndaitew ze ningnui pechu ngau mak lau?” kacheume dage zeu.

⁴⁶Saîbe ramme ne kak ze, “Mâdau de mî de aipau peu sam sa gum ze sa me lei!” ze kacheu de lei.

⁴⁷Pharisaime ne penui je kak ze, “Ningnui je du kelutew ’ndi de mei?

⁴⁸Rezieteime benai Pharisaime ruage mige pechu ’nnumka’mmibe kau la semei?

⁴⁹Kane ai baudime, hingde-sie lam chimakme je deset kai ’nde lei,” kacheu de lei.

⁵⁰Zai penui ruage hangkat chi Nikodemasbe tingtie pe dage tatkaipeu ne penui je,

⁵¹“Ziemmena je pe dagene seu ra mâ sam sa ra pei gai raî mak, zai pa ne ’ndaikau tew mei be chi-raî mak ze anui gu hingde ne samram ra se mei?” ze kacheu de lei

⁵²Penui ne pechu kak ze, “Nang du Galili’mpeu mei? Peu gai ni lau, Galili gene kemeu’mpeu patrabe ze nang ngau ra mak lei,” kacheu de lei.

⁵³Penui hangkat-kat ne ze penui ki ’mbe tat kam di de lei,