Read Zeme Naga JOHAN 8 Bible Online

JOHAN 8 - Zeme Naga bible

JOHAN 8

¹Kane Isua â Olib loa ’mbe tat ti de lei.

²Hechuasûn ge kellumki ’mbe pa wang kadai de lei; ’nteumena pe dage zuawang de lei, zai pa ’ntau lu penui je mâ-geteilia de lei.

³Leisirawme benai Pharisaime ne ’mpuimi hangkat pa kahemabe gene nîmlupui je nguawang lu, sûngngangkelî ge pechu kai lu,

⁴penui ne Isua je, “Geteiliapeu gau, aipaupui je pa kahemabe tâtewbe luagene nîm lu de lei.

⁵Chunage hingde ge Mosabe ne chigumbe kau je â tingchu ne tuâ ra die gai lei. Aipaupui peireige nang ’ndaigum ka’nning lau?” kacheu lei.

⁶Aize pechu kedak ra penui sa lei, pe peireige penui ne kesia’ndam gai ra hangge zeu. Isua keikeu lu, pe bakêrang ne kedei ge mâ-raw gai lei.

⁷Zai penui ne pechu sau mak sam’nneu bam bei dege, pa sapchu lu penui je, “Ningnui ruage hemuigabe kau ne aipaupui je tingchu ne peize tuâ gai raî lau,” acheu bei de lei.

⁸Zai pa keikeu dai lu, pe bakêrang ne kedei ge mâ-raw gai kadai de lei.

⁹Kane chize penui seu lu dege, chînglangpeu ne tatchu raî ze hangkat-katne penui tat kam di de lei, dadege â Isua benai ’mpuimi, chi pe suage sapbampui je runne sâu gai ’ndi de lei.

¹⁰Zai Isua ’ngngangchu lu pechu, “’Mpuimi gau, penui ’ndai’ngge la lau? Mî du ningchu chau’ngkui gai me mei?” kacheu de lei.

¹¹Pa ne, “Heguang gau, mî de chau’ngkui gai me lei,” kacheu de lei. Dadege Isua ne, “I du ningchu chau’ngkui gai me lei; tatchu lau, hemui tâ tew dai ta lau,” acheu bei de lei.

¹²Isua ne penui dage sa dai ze, “I â kedeirei kebabe lei; a chai suibe kau â, kemuîbe ge tat ra mak lei, kane keringbe kebabe ngau gu lei,” kacheu de lei.

¹³Chidadege Pharisaime ne pechu, “Nang â ning runne ningchu sakkitew lei; nang sakkitewbe ze gesang mak lei,” kacheu de lei.

¹⁴Isua ne kak ze, “I ne a runne achu sakkitew sedu, I sakkitewbe â gesang lei, I â I ’ndai’nggene wang mei zai ’ndai’ngge tat ra mei be chî daseu; kane ningnui â I ’ndai’nggene wang mei, zai I ’ndai’ngge tat ra mei be chî me lei.

¹⁵Ningnui â hemeipumsie luî gene samram lei, I â mî je de samram mak lei.

¹⁶I â samram leusedu a gu samrambe â gesang lei, a runne ne I samrambe mak, kane I benai achu langgaipeu pa ne daseu.

¹⁷Ningnui gu hingde ge hangna gu sakki â gesang lei, ze raw gai lei;

¹⁸I â a runne achu sakkitew lei, zai Bepeu achu langgaipeu ne achu sakkitew lei,” kacheu de lei.

¹⁹Chipauziegene penui ne pechu, “Ning peu ’ndai’ngge la lau?” kacheu de lei. Zai Isua ne kak ze, “Ningnui achu du, zai a peu je du chî me lei; ningnui achu chî lu laîzai â, a peu je du ningnui chî gu lei,” acheu bei de lei.

²⁰Kellumki ge pa mâ-geteiliabe luage, rehâ kaika’nduibe bâm gene aipau sam ramme pa sa de lei; kane mî de pechu nîm mak tai lei, pe gu panehî ze wangchang mak kerei dadegeu.

²¹Pa ne penui dage sa dai ze, “I tat tu lei, zai achu ningnui peu gu, zai ningnui â ningnui gu hemui gene chai gu lei; I tatkaibe bâm ge ningnui wangchi ra mak lei,” kacheu de lei.

²²Chidadege â Judame ne, “Pe runne pechu tewchat ra nung semei, ‘I tatkaibe bâm ge ningnui â wangchi ra mak lei,’ ze pa kacheu daseu?” kacheu de lei.

²³Pa ne penui je, “Ningnui â ’ngkang ’mbene pat lei, I â kehu ’mbene wangkeu lei; ningnui â ai kedeirei gu lei, I â ai kedeirei gu mak lei.

²⁴Ningnui gu hemui ramme ge ningnui â chai gu lei, ze ningnui je I rang bei de lei, Pa ze I de lei be ze ningnui ’nnum’mmi mak tizaine â ningnui gu hemui gene ningnui chai gu daseu,” acheu bei de lei.

²⁵Penui ne pechu, “Nang châu lau?” kacheu de lei. Isua ne penui je, “Chize du ningnui je I bepîbang gene rang bei de lei.

²⁶Ningnui rasam ge mâ-mâ misongga I sa ra, zai samram ra la lei; kane achu langgaipeu â kapelingbe lei, zai pe dagene I seulube leine ze kedeirei ge I sarua de lei.”

²⁷Bepeu rasam penui dage pa saliabeibe penui â chî’mmi mak lei.

²⁸Chidadege Isua ne penui je, “Ziemmena Na je ningnui teigetuachu gai dezai pa ze I de lei be zai a runne gu rezie ne I â mâ de tew mak lei, kane a peu ne achu geteiliabe luî ze chize I sa lei be ningnui chî gu lei.

²⁹Zai achu langgaipeu ze a dage bam lei; pa ne a runne bam ra achu sâu gai mak lei, pehî’nsangne ge pe suigut I tewbe ziegeneu,” acheu bei de lei.

³⁰Pa ne acheu ze sagaibeibe luage misonggame ne pechu ’nnum’mmi di de lei.

³¹Dadege Isua ne Judame pechu ’nnum’mmidime je, “A sam ge ningnui sui bam dizaine â ningnui a kenieme gesang de lei,

³²zai samsang ze ningnui chî gu, zai chi samsang zene ningnui je lungzeune tew gai gu lei,” kacheu de lei.

³³Penui ne pechu kak ze, “Anui â Abrahambe chaname lei, mâdauge de anui â mi-mige gu kebang ge bam gai me lei. ’Ndaigum ze nang ne, ‘Ningnui je lungzeune tew gai gu lei,’ ze kacheu lau?” ze kacheu de lei.

³⁴Isua ne penui je kak ze, “Pelingsing, pelingsing ze ningnui je I rang lei, mi-mige hemui tâ tewbe kau leine ze hemui gu kebang de lei.

³⁵Kebang â kilûng ge betingbeta bam bam mak lei; pe na zene betingbeta bam bam lei.

³⁶Chidaze pe Na ne ningnui je lungzeune hang tew gai dizai â, ningnui lungzeune tew sing gu lei.

³⁷Ningnui Abrahambe chaname lei be ze I chî lei; kane achu tewchat ra ningnui peu lei, ningnui lung ge a sam hang pebâm ngaumakbe ziegeneu.

³⁸A peu dage ngaulube I sa lei, zai ningnui peu dagene ningnui seulube ze ningnui sa lei,” ze kacheu de lei.

³⁹Penui ne pechu kak ze, “Abrahambe â anui peu lei,” kacheu de lei. Isua ne penui je, “Ningnui ze Abrahambe chaname dizai â Abrahambe tewbe ningnui du tew gu lei,

⁴⁰kane chunage Hera dagene I ne seulube ningnui dage I samsang saliapeu je ningnui ne tewchat ra peu lei, aize â Abrahambe ne tewbe zat mak lei.

⁴¹Ningnui ne ningnui peu tewbe tew lei,” kacheu de lei. Penui ne pechu, “Anui â hangleutewbe gene lungkeube mak lei; anui peu hangkat la lei, chize â, Hera lei,” kacheu de lei.

⁴²Isua ne penui je, “Hera ze ningnui peu lei dizaine â ningnui achu hung gu lei, Hera dagene pat ze I wangkeu daseu; a suî’nning ne I wangkeube mak lei, kane pa ne achu lang gai bei de lei.

⁴³’Ndaitew ze I sabe ze ningnui ’nningchi mak lau? Chize â a sam ningnui ’ngkinglielakbe ziegene lei.

⁴⁴Ningnui â ningnui peu satan gu lei, zai ningnui ’nning â pa keneibe tewrabe ze lei. Bepîbang gene pa â kegîpeu lei, zai pe hangge samsang ze betâugabe chang lei, pe dage samsang gabe ziegeneu. Pa ne karasa dambe luage ze pe telungtak luigumbe gene sa de lei, pa â karasa sachibe kau, zai karasatewme leine peu daseu.

⁴⁵Kane I ne samsang rangliabeibe ziegene ningnui achu ’nnum’mmi mak lei.

⁴⁶Ningnui ruage châu ne achu hemui hang tew’ngkui gai lau? I ne samsang ranglia zai â ’ndaitew ze ningnui achu ’nnum’mmi mak lau?

⁴⁷Hera gu changbe kau â, Hera gu sam ramme ze ka’ngking lei; ningnui ’ngkingmakbe ze â, Hera gu ningnui changmakbe ziegene lei,” kacheu de lei.

⁴⁸Judame ne pechu kak ze, “Nang â Samaria’mpeu zai herasiabe bampeu lei ze anui kacheube ze tâu mak ti lau?” kacheu de lei.

⁴⁹Isua ne kak ze, “A dage herasiabe ga lei; kane a peu je I hengêutew lei, zai ningnui â achu hengêutew mak lei.

⁵⁰Kane I a runne a ngêu hang peu mak lei; chize Peubepeu hangkat la lei, zai pa ne samrampeu chang gu lei.

⁵¹Pelingsing, pelingsing ze ningnui je I rang lei, mi-mige de a sam teika’mmibe kau â, mâtew-tewsede kechaibe pa ngau ra mak lei,” ze kacheu de lei.

⁵²Judame ne pechu, “Chuna â ning dage herasiabe bam lei be anui chî de lei. Kemeume chai gum Abrahambe â chai di de lei; zai nang ne, ‘Mi-mige de a sam ze teika’mmibe kau â mâtew-tewsede kechaibe pa ’ndautâu ra mak lei,’ ze kacheu de lei.

⁵³Anui peu Abrahambe chaidipeu suadu nang â di ka’nteu mei? Zai kemeume chai kam dezei lau! Ning runne ningchu châu hang riam gai lau?” kacheu de lei.

⁵⁴Isua ne kak ze, “I a runne ne a ngeu-tew’ndi dizai â a ngêudibe ze matâu hang ga lei; a peu ne a ngêu tewka’ndi de lei, ningnui ne pa ze ningnui Rapeu lei ze sabepeu zeu.

⁵⁵Kane ningnui ne pechu chî mak lei; I â pechu chî lei, I ne pechu chî me lei, ze acheu dizai â, ningnui gum ze I karasasabe kau chang gu lei; kane I â pechu chî zai pe sam ze teika’mmi lei.

⁵⁶Ningnui peu Abrahambe ne a ting ze ngau ra pe suiyi’nta ze bam de lei; chigum ze pa ngau lu pe suiyi de lei,” kacheu de lei.

⁵⁷Dadege Judame ne pechu, “Nang â kum rengeu du chang mak ze Abrahambe je nang ngau di de semei?” kacheu de lei.

⁵⁸Isua ne penui je, “Pelingsing, pelingsing ze ningnui je I rang lei, Abrahambe bam makge I â bam lei,” kacheu de lei.

⁵⁹Chidadege â pechu tuâ ra penui tingchu kuaichu de lei, kane Isua ne pe runne ’mbia lu ze kellumki gene zuapat ti de lei.