Read Zeme Naga JOHAN 9 Bible Online

JOHAN 9 - Zeme Naga bible

JOHAN 9

¹Pa acheu ze tatpat lage, hangkat lungkeube gene pe mikchitpeu je pa ngau de lei.

²Zai pe gu kenieme ne pechu ’nneu ze, “Rabbi, châu ne hemui tâ tew bei ze pechu mikchit ze lungkeu lau, aipaupeu ne mei, nune pe pui benai pe peu ne lau?” ze kacheu de lei.

³Isua ne kak ze, “Chize â aipaupeu ne hemui tâ tewbeibe ne mak, zai pe pui benai pe peu ne du mak lei, kane Hera gu tatew ramme pa ge teilia gai ra hanggene lei.

⁴Tingbabe luage achu langaipeu gu tâ ramme anui tewhimchang ra lei; kemuîbe wang mui de lei, mî de tâtewchilakrabe hî zeu.

⁵Kedeirei ge I bam tâne, I ze kedeirei gu kebabe lei,” kacheu de lei.

⁶Chize pa sa gai lu dege, kedei ge ’nchai’ntui gai lu, kedei ze ’nchai zene timdeu hang tew lu, chipaupeu mik kena lam ge timdeu ze kenei gai de lei,

⁷pechu acheu sa ze, “Tatchu lau, Siloam hezai gene hui ne lau,” acheu bei de lei. (Siloam kacheube ze Langgai’ndibe kacheu be lei.) Dadege pa tat ze hui lu pe mik ne mâ-ngau di ze wang kadai de lei.

⁸Pe ramme benai tingtie ge pa mâkieteuruapeu chang ze bambe penui ngaulume ne, “Aipaupeu ze tingtie ge ’ntau lu mâkieteu bambepeu mak ti lau?” ze kacheu de lei.

⁹Hanggesame ne, “Pa de lei,” acheu; zai kêdame ne “Mak lei, kane pechu ka’nzuâbe kau lei,” kacheu de lei. Pa ne “I ze de lei,” kacheu de lei.

¹⁰Zai penui ne pechu, “Acheuzaine ’ndaigum ze ning mik lat kai bei lau?” kacheu de lei.

¹¹Pa ne kak ze, “Hangkat, Isua kacheupeu ne timdeu hang kenei lu, a mik kena ge kenei gai lu, achu, ‘Tat ze Siloam hezai gene hui ne lau,’ kacheu de lei; chigum ze I tat ze hui gai de lei, zai a mik ne mâ-ngau kadai de lei,” kacheu de lei.

¹²Penui ne pechu, “Pa ’ndaige la lau?” kacheu de lei. Pa ne, “I â chî me lei,” acheu bei de lei.

¹³Tingtie ge pe mikchitpeu je Pharisaime dage penui ne nguawang gai bei de lei.

¹⁴Chunage Isua ne timdeu teleu lu pe mik mâ-ngau ra tewgaibe mai ze ’ntakbambe mai de lei.

¹⁵Dadege Pharisaime ne, ’ndaigum ze pe mik ngau dai lu mei be rasam pechu ’nneu kadai de lei. Dadege pa ne penui je, “Pa ne a mik ge timdeu kenei gai bei, zai I hui gai bei dege ’ngau di lei,” kacheu de lei.

¹⁶Pharisaime hanggesame ne, “Aipaupeu â Hera dagene patbe kau mak lei, ’ntakbambe mai ze pa rei mak daseu,” kacheu de lei. Kane kêdame ne, “’Ndaigum ze hemui kau ne aigum tâningdaulakbe ramme tewchi ra lau?” kacheu de lei. Penui ruage pebau pângpat ti de lei.

¹⁷Chidadege penui ne pe mikchitpeu dage sa dai ze, “Pa ne ning mik kena latkaibeibe ziegene pechu nang châu lei ze kacheu lau?” ze kacheu de lei. Zai pa ne, “Pa â kemeu’mpeu lei,” acheu bei de lei.

¹⁸Judame ne chi pe mik mâ-ngaudipeu pui benai pe peu je kûwang lu ze,

¹⁹penai je, “Aize ningnai na pe mikchit ze lungkeu lei ze kacheubepeu de mei? ’Ndaigum ze chuna pa ngau di lau?” acheu ze ’nneutâu gai mak tâne â pa pe mikchit ze bambe mâ-ngau dai de lei, kacheube ze penui ’nnumtew mak lei.

²⁰Pe pui benai pe peu ne kak ze, “Aize anai na, zai pe mikchit ze pechu lungkeu de lei be anai chî lei;

²¹kane ’ndaigum ze chuna pa mâ-ngau mei be anai chî me lei, zai châu ne pe mik kena lat kai kadai mei be du anai â chî me lei. Pechu ’nneu le lau; pa besuitew de lei, pe runne ne pa sa gu lei,” acheu bei de lei.

²²Judame je hingbe ziegene pe pui benai pe peu ne aize sa de lei, tingtie gene Judame ne samkam gai ze, mi-mige de pechu Krista de lei ze sapatkaime je â ka’nduibeki gene pechu â lupat ’nde ra lei, ze acheubeibe ziegeneu.

²³Chipauziegene pe pui benai pe peu ne, “Pa â besuitew de lei, pechu ’nneu le lau,” ze kacheu de lei.

²⁴Chidadege pe mikchitpeu je pakenabe ge penui kû lu, pechu, “Hera je toa lau; aipaupeu â hemui kau lei be anui chî lei,” kacheu de lei.

²⁵Pa ne kak ze, “Pa ze hemui kau lei be du I â chî me lei; kat I chibe ze â I a mikchit ti da sedu chuna â I ngaudibe ze de lei,” kacheu de lei.

²⁶Penui ne pechu, “Ningchu pa ne ’ndaikau tew gai bei lau? ’Ndaigum ze ning mik kena ze pa ne lat kai bei lau?” kacheu de lei.

²⁷Pa ne penui je kak ze, “Ningnui je I rang bei ze ningnui ’ngking mak tai de zeî lau. ’Ndaitew ze ningnui ’ngking dai nei lau? Ningnui du pe gu kenieme chang nei mei?” kacheu de lei.

²⁸Zai penui ne pechu ’nrûgetie ze, “Nang â pe gu kenie’mpeu de lei, kane anui â Mosabe gu kenieme lei.

²⁹Hera ne Mosabe je ka’mpau lei be anui chî, kane aipaupeu deu ge â, pa ’ndai’nggene pat mei be anui chî me lei,” ze kacheu de lei.

³⁰Zai chipaupeu ne kak ze, “’Ndaitew ze lau, aize â mi ’nningdaulak-desang de lei! Pa ’ndai’nggene pat mei be ningnui chî mak leusede pa ne a mik lat kai bei de lei.

³¹Hera â hemuime kuâ ’ngking mak lei be anui chî, kane hangkat ne Hera je kellum, zai pe suî’nningtew dizaine â pechu Hera ne ka’ngking lei.

³²Kedeirei putchube gene seu ze, mige de lungkeube gene pe mikchitpeu mik lat kai bei be du mâdau de seu me lei.

³³Aipaupeu ze Hera dagene wangkeube makchai â, pa mâ de tewchi lak lei,” ze acheu bei lei.

³⁴Penui ne pechu kak ze, “Hemui zeu gene ningchu â lungkeu gai lei, nang ne anui je geteilia ra mei?” kacheu de lei. Dadege penui ne pechu hela ’mbe kelitua ’ndi de lei.

³⁵Penui ne chipau peu je â tuâpat kai’nde lei be rasam Isua ne seu di de lei, zai pechu ngau lu Isua ne, “Nang ziemmena Na ge ’nnum’mmi mei?” kacheu de lei.

³⁶Pa ne kak ze, “A pau gau, chipaupeu ze châu lau, pa ge I ’nnum’mmi le ra hangge zeu?” kacheu de lei.

³⁷Isua ne pechu, “Nang ne pechu ngau de lei, zai chize ningchu ka’mpaupeu de lei,” acheu bei de lei.

³⁸Pa ne, “Heguang gau, I ’nnum’mmi lei,” kacheu de lei; zai pechu pa kakellum de lei.

³⁹Isua ne, “Samramrabe hangge kedeirei ge I wangkeu lei, ngaumakme ngau ra, zai kengaume mikchit ra hangge zeu,” kacheu de lei.

⁴⁰Pharisaime hanggesame pe taige bamme ne aize seu lu pechu, “Anui du mikchitme mei?” kacheu de lei.

⁴¹Isua ne penui je, “Ningnui ze hemikchit tizai â, ningnui dage kemaube bam ra mak lei; kane chuna ningnui ne, ‘Anui ngau lei,’ kacheube geze ningnui gu kemaube bam bam lei.