Read Zeme Naga TÂTEWBE 10 Bible Online

TÂTEWBE 10 - Zeme Naga bible

TÂTEWBE 10

¹Kaisaria ge hangkat pe ji, Korneliasbe bam lei, pa â Itali Regiment, kacheube ge sipai haîmuiteipeu,

²pe kiduîme ’nteumena ne Hera je hingchi ze bambe kau, Hera je keneipeu, miramme hangge ka’nggiabe kela peipatchipeu zai Hera je sau mak kellum bampeu lei.

³Zai mai kat tîngna ’nchetkak kechum gum ge keliâbe gene Hera gu angel’mpeu pe dage wangbe pa ngau’nchichiak ze ngau de lei, pechu “Korneliasbai,” ze acheu zeu.

⁴Dadege hing-desang di ze pechu piereking lu ze, “’Ndaikau lau, Heguang gau?” ze kacheu de lei. Dadege pa ne pechu, “Nang kakellumbe ramme, zai kelaksiame je nang ka’ngngâbe kela peibe ramme ze Hera masuage chibamrabe hangge chuchang de lei.

⁵Zai chunage Joppa ge hanggesame je lang gai lau, zai hangkat Simonbe, chi Peterbe kacheupeu je nguawang lau;

⁶pa â hemeigei kateleupeu Simonbe ki, sungkling kung ge bambe geze rêu lamui lei,” kacheu de lei.

⁷Zai pechu ka’mpaupeu angel’mpeu tat ti dege pe guâ ka’ngguame hangna zai pechu kuâbamme ruagene sipai’mpeu lungsangtewpeu hangkat je kû lu,

⁸penui je mâgetaleine salia kam gai lu, Joppa ’mbe penui je lang gai bei de lei.

⁹Bechaibe mai ge ’mpuîki ge penui tat lage, zai chi keloa hiage penui wangchang dege, Peterbe â kellum ra, tîngna’nding ge heki’mpûm ’mbe chu di de lei.

¹⁰Zai pa ’njei di mâ-teu gai nei di de lei; kane mâ-teu ra penui kateleube luage, pe mang gum ze bîngtat ti ze

¹¹tinggîm ’ngkam lat kai ze, paî kedibe gum ze mik medai gene keîgim lu, kedei ’mbe ’mpatkeube pa ngau de lei.

¹²Chipau paîbung lungge mârekaune pezat leine zai liaruabe zat ramme, zai ’nruine zat leine bam de lei.

¹³Zai pe dage acheu ze mâ-kuâ ge â wang ze, “Peterbai, chu ze tewchat lu teu zu lau,” kacheu de lei.

¹⁴Kane Peterbe ne, “Tingwang gau, acheu ra mak lei; mâdauge de mâ-mâ getakedau zat zai kahebâbe zat â I teu meluisui lei,” acheu bei de lei.

¹⁵Dadege chi mâ-kuâ pe dage pakenabe wang dai ze, “Hera ne tew’nchigai’ndibe ze, mâ-mâ ketakedau kau lei, ze nang acheuchi lak lei,” ze kacheu de lei.

¹⁶Aize luachum riâ wangchang de lei, zai luakatne chize tinggîm ’mbe teichu gai ’ndi de lei.

¹⁷Chunage Peterbe ne keliâbe pa ngaulube ze, parimba ’ndaikau mei ze pa pe lung ge ’nninghereu bambe luage, pie le lau, Korneliasbe ne langgaime bau ze Simonbe ki bambe bâm ze ’mmêt lu wang ze keriekemui ge sap kai lu ze,

¹⁸penui ne kû ze, Simonbe, chi Peterbe kacheupeu ze chige rêu mei ze ka’nneu de lei.

¹⁹Zai Peterbe chi keliâbe pa ’nning ze bambe luage, Herui ne pechu, “Pie le lau, ziemmena hangchum ne ningchu peu la de lei.

²⁰Zuachu lu wangkeu zu lau, ngaurau mak ze penui je nguatat chu lau; penui je I ne lang gai bei daseu,” kacheu de lei.

²¹Dadege Peterbe penui tailam wangkeu lu ze, “Ningnui ne gepeubepeu ze I de lei; ’ndaikau hang ningnui wang lau?” kacheu de lei.

²²Dadege penui ne, “Korneliasbe, sipai haîmuiteipeu, ziemmena ka’nzeibe kau, zai Hera je hingchibe kau Judame zat leine ne pechu sa’mmi ze bambepeu ne peize ningchu pe ki ge wang ra kû ra lang gai ra, dezai nang ne mâ-mâ sagaibe pa seu gai ra hangge angel’mpeu ka’nchipeu ne betak gechiau gai de lei,” ze kacheu de lei.

²³Dadege pa ne penui je kilûng ge rêu ra kû bei de lei. Bechaibe mai ge pa chu lu penui je nguatat ti de lei, zai Joppa ge mi puiname hanggesame ne pechu kangzangtew ze nguatat ti de lei.

²⁴Zai bechai mai ge, Kaisaria ge penui wangchang de lei. Korneliasbe ne penui wang ra heguîkua ze pe kiduîme benai pe kang ka’ntipme je kûwang’ndui lu bamkua de lei.

²⁵Zai kilûng ge Peterbe gut dege, Korneliasbe ne pechu ngau lu ze kâu-pluikeu ze pechu kakellum de lei.

²⁶Kane Peterbe ne pechu kuakchu gai ze, “Sapchu lau; I du ziemmena lei,” acheu bei de lei.

²⁷Peterbe pechu ’mpau gai lu dege kilûng ’mbe gut lu ziemmena misongga ’nduikuabe pa ngau de lei;

²⁸dadege pa ne penui je, “Juda’mpeu ne kêdabe heramzat’mpeu dage tatmie ze nguakebut bam ra du tâu ta de lei be ningnui ne du chi ze lakam de lei; kane Hera ne achu ziemmena mi-mige peireige ketakedau kau ziemmena acheu ze mei, nune ’nchimakbe kau mei acheu ze I kû mak ra hangge teilia gai de lei.

²⁹Chidadege achu kû gai bei ze kenambe ga ze I wangkeu de lei, chidaze ’ndaitew ze ningnui ne achu kû ra lang gai lau ze I ’nneu gai de lei,” kacheu de lei.

³⁰Dadege Korneliasbe ne, “Hezie medaine tattibe ge, chuna gumbe hî, hegî ’nchetkak kechum hî ge I kellum bam lei; zai pie le lau, ziemmena hangkat pe puâ sirebabe bâ lu a suage sap kai de lei,

³¹acheu sa ze, ‘Korneliasbai, nang kakellumbe kuâ ze I seuchang lu de lei, zai kegame je nang kela peibe ramme ze Hera masuage ’ngngaî dai mak chî lamui lei.

³²Chidaze Joppa ge Simon, chi Peter kacheupeu wang gai ra hangge lang gai lau; pa â hemeigei kateleupeu Simonbe ki, sungkling kung ge bambe ge rêu lamui lei,’ ze kacheu de lei.

³³Chigum ze luakatne ningchu kû ra I lang gai de lei, zai nang du ning lungyi ze wang gai bei de lei. Chipauziegene chuna â Hera masuage anui ’nteumena wang’ndui lamui de lei, Heguangpeu ne ningchu tâtew ra diegaibe rasam ramme ’ngking ra hangge zeu,” kacheu de lei.

³⁴Zai Peterbe ne sam sapat kai ze, “Pelingsing ne aize I chika’mmi de lei, chi Hera â kehung-ka’nrie mâ de ga lei be zeu,

³⁵kane hezat leine ge pechu kehingbe kau, zai kapelingbe kau je pa ne ’nchâ bei lei.

³⁶Haimena gu Tingwang, Isua Krista ne desieyibe misuiyibe sam karchibe paugaibe sam Hera ne Israelme dage langgaibe nang chî gu lei,

³⁷chi Johanbe ne baptistewbe rasam Galili gene chu ze Judia huâzie ge pauruagaibe sam ge:

³⁸chi Hera ne Nazareth’mpeu Isua je Herui Ka’nchibe benai reziechibe tâtewchibe ne ’ndaigum ze Hera taudui ’nnuk kai bei mei be tak zeu; Hera ne pe dage nguabam bei dadegeu, satan ne tewhereu ze bamme leine je tew’mmi ze tâ-yibe tew ze ’ndaigum tatrua bam mei be zeu.

³⁹Zai pa ne Judame ram ge, zai Jerusalem ge tâtewgaibe leine ze anui ne sakkitewme kam de lei. Penui ne pechu hingbang ge keî’nchie gai ze tewchat ’ndi de lei;

⁴⁰kane Hera ne pechu pakechumbe mai ge zuchu gai dai ze liâ gai bei de lei;

⁴¹baudime ’nteumename dage makse, kane pa kechaibe gene zuachube chângge pechu nguateu-nguasak ze bamme, sakkitewme anui chang ze anui Hera ne kelânggaibeime dage liâ gai bei de lei.

⁴²Zai pa ne anui je ziemmename dage pau gai ra, zai pa â keringme benai kechaime je samrampeu hangge Hera ne tew’ntipkaibeipeu de lei be ze sakkitew ra samdie gai de lei.

⁴³Pechu â kemeume leine ne sakkitew gai de lei, pechu ’nnumka’mmibe kau â pe ji gene hemui kelunbe ngau gu lei be zeu,” kacheu de lei.

⁴⁴Airamme ze Peterbe ne sa lage chi ka’ngkingme leine peireige Herui Ka’nchibe wangkeu gai de lei.

⁴⁵Zai rumgetenlume ruagene ’nnumka’mmime, Peterbe je ngua kangzangtew-wangme bau ze ningdaulak bam di de lei, Herui Ka’nchibe kela ze Jentailme peireige ’nsangdu ruîkeubeibe ziegeneu.

⁴⁶Hekua gechâm-châmbe gene penui samsa ze, zai Hera je hengêutewka’ndibe penui seulube ziegeneu. Chidadege Peterbe ne rang’nchichiak kai ze,

⁴⁷“Anui ne Herui Ka’nchibe ngaulube luigum ze, aime ngaulume je du baptistew ra hangge hedui ze mige ne nam dui mei?” ze kacheu de lei.

⁴⁸Dadege pa ne penui je Isua Krista ji gene baptis tew gai ra hangge die gai bei de lei. Dadege chige ’nnaihang gai dai ra pechu penui kiam de lei.