Read Zeme Naga TÂTEWBE 11 Bible Online

TÂTEWBE 11 - Zeme Naga bible

TÂTEWBE 11

¹Chunage Judia ge apostolme benai mi puiname bamme ne Jentailme ’nsangnedu Hera gu sam ze lutâu di de lei be seu lu de lei.

²Dadege Peterbe Jerusalem ’mbe hang dege, rumkagetenbe kiangna zene acheu ze pechu ki’nsia ze,

³“Rumgetenmakme dage ’ndaitew ra du nang zuamie ze penui dage nguateu ze bam lau?” ze kacheu de lei.

⁴Kane Peterbe ne penui je peluî-luî rang’nzeitun gai ze:

⁵“Joppa namdi ge I kellum ze bam de lei; zai a mang gum bîngtattibe gene keliâbe I ngau de lei, paî kedibe gum ze pemik medai ge keîgim lu tinggîm ’mbene ’mpatkeu ze bambe zeu; zai chize a dage wangkeu gai de lei.

⁶Pelung ge I piegai’mmi dege, kaurui ramme, mârekaune ramme, zai liaruabe kau ramme, zai ’nruine ramme I ngau lei.

⁷Zai achu acheu ze samsabe kuâ I seu lei, ‘Chu lau, Peterbai, tewchat lu teu le lau,’ acheu zeu.

⁸Kane I ne, ‘Acheu ra mak lei, Tingwang gau, mâ-ketakedau kau mei nune kahebâbe kau mei mâdau de a mui ge gut kai mak kerei lei,’ ze acheu bei de lei.

⁹Kane chi hekuâ tinggîm ’mbene luâ pakenabe kak dai ze, ‘Hera ne tew’nchigai’ndibe ze ketakedau kau, acheu ze nang kû mak sing ra lei,’ ze kacheu de lei.

¹⁰Aize luachum riâ wangchang de lei, dadege luakatne chize tinggîm ’mbe teichu dai kam ’ndi de lei.

¹¹Chipau hî sing ge anui bambeki ge Kaisaria ’mbene a tailam langgaibeime bau ziemmena hangchum wangchang de lei.

¹²Dadege ’nning’nsia mak ze penui je nguatat ra Herui ne achu rang gai bei de lei. Aime mi puiname, hang serukme ne du achu a pamtew ze chipaupeu ki ge anui gut kai de lei.

¹³Dadege pa ne anui je tinggîm angel’mpeu pe ki ge saplaleube pa ngaube tak benai pechu, ‘Joppa ’mbe ziemmena je lang gai ze Simonbe, chi Peterbe ze kubepeu je nguawang lau;

¹⁴pa ne sam kat ningchu salia’nchichiak kai gu lei, chize ne nang benai ning kiduîme ’nteumena ringpatkamlerabe hangge zeu,’ ze kacheube tak ze salia de lei.

¹⁵I sam sachu gai dege, bepîbang ge gum ze Herui Ka’nchibe anui peireige wangkeu gai de lei.

¹⁶Dadege Tingwang gu sam I ’nningdau di de lei, pa ne sabe ge, ‘Johanbe â ningnui je hedui ne baptistew lei, kane ningnui je â Herui Ka’nchibe ne baptistew gu lei,’ kacheube sam zeu.

¹⁷Chidaze anui Heguang Isua Krista ge neigaidibe luage Hera ne anui je kela peigaibe aigumbe kela ze pa ne penui je pei gai ’ndizai â, I ne Hera je saptingkang ze bam ra I nungge ’ndaikau lau?” ze acheu ze salia gai de lei.

¹⁸Airamme penui seu lu dege zîng ze rim gai di de lei. Dadege Hera ngeutew ze, “Chigumbe ziegene Jentailme je du keringbe hangge penui helungkahelibe Hera ne pei gai bei de lei,” kacheu de lei.

¹⁹Zai Stephenbe dagene tewsabe ’ndetchu-bambeibe ziegene tatrariptatkamdime ze Antiok riâ tatchang ze miramme dage â samyibe pau gai mak ze Judame dage runne paurua ze Phoeniki, Sipra zai Antiok riâ ’mbeitat ze bam de lei.

²⁰Kane penui ruage hanggesame, Sipra benai Kurini ge bamme bau penui Antiok ge wang gai dege Judame-makme Grik lad teime dage du salia gai de lei, Isua Krista rasam pau gai zeu.

²¹Zai Tingwang ba ze penui dage bam de lei, zai neidime misongga ze Tingwang lam ’nreiwang di de lei.

²²Aipau rasam ze Jerusalem herakiangname kun ge seuchang di de lei, dadege Antiok ’mbe Barnabasbe je penui ne lang gai de lei.

²³Pa wang dege Hera ka’nggiabe pa ngau lu ze, pe suiyi-desang ze bam de lei; zai penui ’nteumena ne heranchi ze Heguangpeu dage lungsangtew ze bam bam ra pa ne penui je gecheu’nrak kai bei de lei;

²⁴pa â ziemmena keyibe kau, Herui ka’nchibe benai keneibe ne pui ze bambe kau dadegeu. Zai ziemmena misongga ze Heguangpeu dage bausî gai bei de lei.

²⁵Dadege Saulbe je peu ra hangge Tarsas ’mbe Barnabasbe tat ti de lei;

²⁶zai pechu pa ngaudau lu dege, Antiok ’mbe pechu pa nguawang de lei. Chige kum kat luî herakiangname je nguabam ze baudime je penai ne mâ-geteilia ze bam de lei; zai chi Antiok gene kenieme je Kristianme, acheu ze kûchurailang de lei.

²⁷Chunage aipau ting ge kemeume Jerusalem gene Antiok ’mbe wangkeu de lei.

²⁸Zai penui ruage hangkat pe ji Agabasbe acheu ze kûpeu zene sapchu lu ze, kedeirei leine ge herakûm kedibe wang ra la de lei; zai aize Klaudiasbe ting ge wangchang ze bam de lei be ze Herui gene pa rang’ntua gai de lei.

²⁹Zai kenieme ne penui karai ge tewduî-duîbe riâ gene Judiaram ge bamme mi puiname je ka’ngngâbe pei ra penui sam kam gai de lei;

³⁰zai chi penui tewpatlube chi ka’ngngâbe kela ramme ze, Barnabasbe benai Saulbe ba gene gechîngme dage ’mput kai de lei.