Read Zeme Naga TÂTEWBE 14 Bible Online

TÂTEWBE 14 - Zeme Naga bible

TÂTEWBE 14

¹Chunage Ikoniam ge Judame ka’nduibeki ge Paulbe benai Barnabasbe ne gut lu sam salia’mmi-desang gai bei ze, Judame benai Jentailme misongga ze ’nnum’mmi di de lei.

²Kane Judame neimakme ne Jentailme je gecheu’nsia gai ze, mi puiname je penui lung tewchatchi gai bei de lei.

³Chige beting tiesang ge penai ’nnai bam lei, zai penai kuugiereu ze Heguangpeu sam sa ze, pa ka’nggiabe sam ze nguasakkitew ze, penui ba ne ka’nchetbe ramme benai ’nningdaulakbe ramme tew ra pei gai bei de lei.

⁴Zai keloa ge baudime bau na châmpat ti de lei; hanggesame ne Judame lam sapgu di, zai hanggesame ne apostolme lam sapgu di zeu.

⁵Zai Jentailme benai Judame ne penui gu kanguame besuitewme dage helua lu ze, kenieme je tewhereu ra, zai tingchu ne tuâchat ra ran de lei.

⁶Pe nai ne chize chî lu ze Listra benai Derbe ge, Likonia gu namdi ramme ge zai pehuâzie ramme ge tat’mbia gai di de lei;

⁷zai chige samkeyibe penai paurua de lei.

⁸Chunage Listra ge hangkat pe pî tatchimakbe kau ’ntau bam lei; pechu lungkeube gene pe pî sia ze, mâdauge de pe pî ne pa tat kai mak lei.

⁹Paulbe ne samsabe ze pa ’ngking bam de lei; dadege Paulbe ne chipaupeu dage keneibe ne pechu tew’mmichiduibe la lei be Paulbe ngau lu ze pa ne pechu piereking lu ze,

¹⁰pe rankai sa ze, “Ning pî ne sap’nzeitun gai lau,” ze acheu bei de lei. Dadege pa ’mbuplepchu lu, pe pî ne tatrua di de lei.

¹¹Dadege Paulbe ne tâtewbe baudime ne ngau lu ze, Likonia lad ne sa ze, “Hera ramme ziemmena luîtak gene anui dage wangkeu la de lei!” ze kacheu de lei.

¹²Barnabasbe je penui ne Ziasbe acheu ze ku lei, zai Paulbe je pa zene samsapeu dilangpeu changbeibe ziegene penui ne pechu Hermesbe acheu ze ku lei.

¹³Dadege (hera) Ziabe gu tingkupeu, pe gu kellumki â namdi hela ’mbe bamdibe, pa ne getumsei ramme benai mâpâ-teuria ramme tei lu ze baudime je ngua lu herâtewbe kela peipat kai nei de lei.

¹⁴Kane chize apostolme hangna Barnabasbe benai Paulbe seu lu dege penai, penai paî hit ze baudime zuilung ge pakgut lu ze ’nrung ze,

¹⁵“Azangme gau, ’ndaitew ze ningnui aize tew lau? Anai du ziemmena lei, ningnui gumbe kau lei, zai anai â misuiyibe samkarchibe ningnui dage paumie gai lei, dezai ai mâ-peruânggabe zat ramme gene Hera keringbe Rapeu, ting benai kedei zai sungkling zai pelung ge kebambe leine tewgaipeu dage peize ningnui ’nreiwang ra hangge zeu.

¹⁶’Ndâge rehei tattibe ramme ge â pa ne heramzatme ramme je penui kenei-neibe ’mpuî ge tat ra lun bei de lei;

¹⁷acheuleusede sakkitewgaibe ga ze pa ne ningnui je sâu gai mak ze bam de lei, hetak benai hesuiyibe peibe zene ningnui lungwângchang ra tew gai ze pa â yi dadege tinggim ’mbene pa ne tingruibe benai hêrachi kanchibe ting ramme ningnui je pei ze bam de lei,” ze kacheu de lei.

¹⁸Aipau sam ramme gezene baudime penai dage herâtewbe kela peipatkairabe gene penui je penai ne tew’nsaubi gai de lei.

¹⁹Kane Judame Antiok benai Ikoniam gene chige wang gai de lei; penui ne baudime je penui lam hang kiâmkuak lu ze Paulbe je tingchu ne tuâ ze, pa chaidibe hangge penui ’nnum gai lu, namdi gene hela ’mbe pechu zupat kai bei de lei.

²⁰Kane kenieme ne pe dage guâwang bei dege pa chu lu ze namdi ’mbe gut ti de lei; zai bechai mai dege pa benai Barnabasbe Derbe ’mbe tat ti de lei.

²¹Namdi ge penai ne samkeyibe sa gai ze misonggame je kenieme hangge teigut kai lu dege Listra zai Ikoniam zai Antiok ’mbe penai wang dai ze,

²²kenieme lungran tew’nchi gai ze keneibe ge ’ngngîn mak tat bam ra penui je gecheu’nrak kai ze, acheu sa ze, kahereube ramme misongga lie ze anui â Hera gu heguangram gut sing ra lei, ze salia de lei.

²³Zai herakiangna leine ge penui hangge gechîngme penai ne sum gai de lei; zai teseureibe benai kakellumbe ne penui keneipeu Tingwang dage penui je peipat kai bei de lei.

²⁴Dadege penai Pisidia tatpela ze Pamphilia ’mbe penai wangkeu de lei.

²⁵Zai Perga ge penai Hera gu sam sa gai lu dege, Attalia ’mbe penai wangkeu de lei;

²⁶zai chigene penai Antiok ’mbe ’nnei gene tatchang kadai de lei, chi penai gu tâtew’nsanggailube ze Hera ne peize ’nggia gai ra kie ze diepatkaibe bâm ’mbe zeu.

²⁷Zai Antiok ge penai wangchang dege, herakiangname je penai ne kûwang’ndui lu ze, penai dage Hera ne nguatâtewbe ramme rasam, zai Jentailme hangge keneibe ’ngkam Hera ne ’ndaigum ze lat kai bei mei be tak ze penai ne salia kam bei de lei.

²⁸Zai penai hangna keneime dage betinggetie ’nnai ze bam bam de lei.