Read Zeme Naga TÂTEWBE 16 Bible Online

TÂTEWBE 16 - Zeme Naga bible

TÂTEWBE 16

¹Zai Derbe benai Listra ge du Paulbe â wang gai de lei. Chige hangkat pe ji, Timothibe kacheupeu bam lei, pe pui â Juda’mpui keneibepui lei; kane pe peu â Grik’mpeu lei.

²Listra benai Ikoniam ge mi puiname ’nteumena ne Timothibe je pe rasam saka’mmi de lei.

³Timothibe je Paulbe ne nguatat nei de lei; zai chipau bâm ramme ge Judame ’nteumena ne pe peu â Grik’mpeu lei be chibe ziegene pechu rumkagetan de lei.

⁴Zai penui tatkaibe namdi ramme leine ge, Jerusalem namdi ge apostolme benai herakiangna ge gechîngme ne hingde-sie hang hekîgaibe sam ramme ze tei’mmi ra mi puiname je pei gai bei de lei.

⁵Chigum ze herakiangna ramme je keneibe lam ge penui ran tew’nchibi-bi gai bei ze nai’nsangne penui riak pungbi-bi ze bam de lei.

⁶Asiaram ge sam sa ra Herui Ka’nchibe ne penui je nam’ndibe ziegene Phrigiaram benai Galatia tatpelatat ti de lei.

⁷Zai Misia ramrai ge penai wangchang dege Bithiniaram ge gut ra heka gai de lei, kane Isua gu Herui ne penai je lun mak tai de lei;

⁸dadege â Misia tatka ze, Troas ’mbe penai wang di de lei.

⁹Zai tingmuî dege Paulbe dage keliâbe kat pei de lei: Makedonia’mpeu hangkat sap lu ze pechu kiâm ze, “Makedonia ’mbe wang ze anui je ’ngngâ gai lau,” ze kacheu de lei.

¹⁰Zai chi keliâbe pa ne ngau lu dege luakatne Makedonia ’mbe tat ra anui peu de lei, Samyibe penui dage pau gai ra Hera ne anui je kûbe hangge anui riam gai lu zeu.

¹¹Chidadege Troas gene ’nnei gene pat lu ze, ’nzeitun ze Samothrake tatchang de lei, zai bechai mai dege Ne-apolis,

¹²zai chigene Philippi, chize Makedonia gu heram lungge namdi betâudilangbe changbe, Romdei gene tikeume kining lei. Aipau namdi ge ting kat anui ’nnai bam gai de lei;

¹³’ntakbambe mai ge kerie hela ’mbe ’nggeu kung ge kakellumbe bâm bam ra anui ’nnum gai lu ze tat te lei; zai chige ’mpuimi wangka’nduime dage anui ’ntau lu ze mâ salia de lei.

¹⁴Chige ’mpuimi hangkat pe ji, Lidiale banutpaî giebe zuapui, Thiatira’mpui, Hera je kellum ze bambepui ne anui samsabe seu lu de lei. Paulbe samsabe pa ’ngking ze ’nningchi le ra Tingwang ne pe lung ze lat kai bei de lei.

¹⁵Zai pa benai pe kiduîme je baptistew kam lu dege, anui je pa ne kiâm ze, “Heguangpeu je gesangsing ne keneipui hangge ningnui ne achu riam gai dizai â wang ze a ki ge rêu lau,” ze kacheu de lei. Zai pa ne anui je kiâm ’ndi de lei.

¹⁶Zai kakellumbe bâm ’mbe anui tat lage, kebang ’mpuimi hangkat, perin ze hedachakchipui pa hedachakbe gene pe paume hangge rangkâng misongga ngau ra tewgaibeipui je kahedau de lei.

¹⁷Chipaupui ze Paulbe benai anui chai suirua ze hap’nrung ze, “Aime bau â Hera Hulangpeu gu tâka’ngguame bau de lei, ningnui suage tewka’nringbe ’mpuî rasam pauruame bau zeu,” ze kacheu de lei.

¹⁸Zai beting misongga ze pa sahang bam lei. Kane Paulbe pe suiyi ta di ze, ’nreiwang lu chi herui je, “Isua Krista ji gene pe dagene nang zuapat te ra I ne samdie gai de lei,” ze acheu bei de lei. Dadege chipau lua sing ge pe dagene chi herui ze zuapat ti de lei.

¹⁹Kane pe paume bau ze penui rangkâng ngau ra kaheguîbe ’mpuî tew’ngga’ndibe ngau lu dege, Paulbe benai Silasbe je nîm lu besuitewme masua gene hechaiki ’mbe zukereugut ti de lei;

²⁰zai penui ne samramme dage penai je teiwang gai lu dege penui ne, “Aime ze â Judame lei, zai anui gu namdi ge tewkeleu ze bam lei.

²¹Anui Rom deiname hangge kelungbe tak ramme, zai hingde-sie ne tâumakbe ramme ge ’nchâ ze bam ra, zai chize tei ra penai geteilia lei,” ze kacheu de lei.

²²Baudime ne penui je ’nggigaihâ di de lei; zai samramme ne Paulbe benai Silasbe paî gesakpedaktua nan ze hetui ramme ne lak ra samdie gai bei de lei.

²³Zai penai je lak’nteukala gai lu, kebangki ge penui ne penai je tuâ gai bei de lei, zai kebangki kereîpeu je penai je reî’mmi ra rang gai bei de lei.

²⁴Aigum ze samranggaibe pa ngau lu dege, kebangki kereîpeu ne hekisiâm helung ’mbe teigut lu bang gai ’ndi lei, zai penai pî ze â pa’ntung kedibe ge ret kai bei de lei.

²⁵Kane muisum hî gum dege Paulbe benai Silasbe â, Hera dage kellum ze heleutew ze bam lei, zai kebangki ge banggaibeime ramme ne penai kuâ ’ngking ze bam de lei,

²⁶dadege peranchibe kedei-kaketeibe luakatne wang ze kebangki gu bâm tew’ngngai ze bam de lei; zai ’ngkam ramme leine latpat kam gai bei, zai kebangta ramme leine luakpat kam gai bei de lei.

²⁷Kereîpeu kejeibe gene ’nrakchu lu, ’ngkam ramme latpat kam nan ze bambe ngau lu dege, banggaibeime ramme â pakkamdibe hang ’nnum gai lu ze, pe gu hiazutkie tatpat lu, pe runne pechu tewchat ra heka di de lei.

²⁸Kane Paulbe ne pe rankai ’nrung ze, “Ning runne ningchu tewhejam se lau, aige anui ’nteumena lamui lei,” ze acheu bei de lei.

²⁹Dadege kebangki kereîpeu ne hemibung kie lu, kelua ze pakgut lu ze, hingkedun ze, Paulbe benai Silasbe suage keikeu gai lu ze,

³⁰penai je nguapat lu, “Azangkena gau, achu tew’nringpatlerabe hangge I ’ndaikau tew ra lau?” ze kacheu de lei.

³¹Dadege penai ne, “Heguang Isua je ’nnum’mmi le lau, dezai ningchu tew’nring gai bu lei, nang benai ning kiduîme jeu,” acheu bei de lei.

³²Zai pe dage benai pe ki ge bamme leine dage Heguangpeu gu sam penai ne salia bei de lei.

³³Zai muisum hî sing ge kereîpeu ne penai je ngua lu, penai jâm ramme hui gai bei de lei, zai luakatne pa benai pe kiduîme je baptistew gai bei de lei.

³⁴Zai pa ne penai je pe ki lam nguahang lu ze, penai teu ra, sak ra pei bei de lei; Hera ge pa ne ’nnum’mmidibe ziegene pa benai pe kiduîme ’nteumena penui suiyi-desang di de lei.

³⁵Zai tingbapat dege, samramme ne sipaime je kû gai ze, “Chime je peize tatchu lau,” ze acheu bei de lei.

³⁶Dadege kereîpeu ne Paulbe je chipau sam pau gai ze acheu sa ze, “Samramme ne ningnai je peize tat ra lang gai bei de lei; chidaze chuna ningnai zuapat lu ze, ningnai yi ze tatchu lau,” ze acheu bei de lei.

³⁷Kane Paulbe ne penui je, “Anai mâ de ’ngkuimakbe kau kena, Rom deiname changme je haîmapa gene penui ne anai je bêu ze kebangki ge tuâ gai bei de lei; zai chunage penui anai je reine ze tuâpat ra tew mei? Lun me lei! peize penui ne wang ze anai je lupat ku lei,” acheu bei de lei.

³⁸Aipau sam ramme ze sipaime ne samramme dage pau gai bei de lei, dadege penai ze Rom deiname lei be penui seu lu dege â penui hing di de lei;

³⁹chidadege â penui ne wang ze lun gai ra penai dage kie de lei. Zai kebangki gene penui ne penai je nguapat kai lu, namdi sâu nan ze zuapat te ra rang gai bei de lei.

⁴⁰Dadege â penai kebangki gene zuapat lu ze, Lidiale je ’ngkiâmie gai de lei; zai chige mi puiname ramme je ngau gai lu, penui je gecheu’nrak kai nan ze penai tat ti de lei.