Read Zeme Naga TÂTEWBE 17 Bible Online

TÂTEWBE 17 - Zeme Naga bible

TÂTEWBE 17

¹Chunage Amphipolis benai Apollonia penai tatpela ze Thessalonika, chi Judame ka’nduibeki bambe bâm ge wang gai de lei.

²Zai tingtie pa tewbe luigum ze Paulbe â ka’nduibeki ge gut ti ze ’ntakkak kechum penui dage rawdiakkaibe leisi gu sam gene samhepen ze,

³Krista â kahereube lie ze chaidibe gene pa chu dai ra ka’nnangbe tak ze pa salia’mmi gai lu ze, teilia’nchichiak kai ze, “Ai Isua, chi ningnui dage I saliapeu ze Krista de lei,” ze kacheu de lei.

⁴Zai penui ruage hanggesame â, ’nnum’mmi di ze, Paulbe benai Silasbe dage herua di de lei; zai Grikme Hera ge helungchukme benai ’mpuimi betâudime ramme kecheîne ta di ze herua gai di de lei.

⁵Kane Judame â ngauteu di ze kakebiengme ruage katîmphime ze ngua lu baudime je kûwang’ndui lu namdi lung ’nrungkeleurua ze, Jesonbe ki nupgut ze Paulbe benai Silasbe je baudime ruage nguapatlia ra peu de lei.

⁶Zai penai je penui peupet lak dege Jasonbe benai mi puiname hanggesame je namdi ge besuitewme dage zuwang ze ’nrunggetie ze, “Aime zene kedeirei ze tewkedet kam lu, chuna aige du wang gai de lei,

⁷zai Jasonbe ne pe ki ge rêu ra pei bei de lei; aime zene, ‘Heguang kêdabe la lei, pe ji Isua,’ ze acheu sa ze Kaisarbe gu samde peranchibe ramme tewnam’nsui ze bam lei,” ze kacheu de lei.

⁸Zai baudime benai namdi ge besuitewme bau ne aize seu lu penai je tewkeleulia gai bei de lei.

⁹Zai Jasonbe benai kêdame dagene penai kelei ge rangkâng pa’nzua lu lu dezaine penai je ’mpat kai bei de lei.

¹⁰Luakatne mi puiname ne Paulbe benai Silasbe je tingmuî ne Beroia ’mbe lang gai bei de lei; zai penai wangchang dege Judame gu ka’nduibeki ge gut ti de lei.

¹¹Chunage chige bamme â, Thessalonikame sua â renua’nteu ze penui ne ’nchâlai ze sam ze lutei ze chi sam ze kacheu run mei be tak ze nai’nsangne rawdiakkaibe leisi ge pie ze bam lei.

¹²Penui ruage ziemmena misongga ze ’nnum’mmi di de lei, zai Grikme ’mpuimi betâudime ramme, zai Grikme ’mpeumi ramme du kecheîne ta di ze ’nnum’mmi kam di de lei.

¹³Kane Thessalonika ge Judame bamme ne Paulbe Beroia ge du Hera sam pauruabe chî lu dege, chige du penui wang lu ze, baudime je tewkeleu ze gecheu’nsia gai bei de lei.

¹⁴Chidadege sungkling riâ tatchang ra hangge Paulbe je mi puiname ne kelua ze lang gai bei de lei, kane Silasbe benai Timothibe â, chige ’nnai bam di lei.

¹⁵Zai Paulbe je nguatatme bau ne pechu Athens riâ nguagepâu gai bei de lei; zai Paulbe ne Silasbe benai Timothibe je pe tailam wangkelua ra ranggaibe sam penui dage peigaibe lu lu dege, Beroia ’mbe penui wang dai di de lei.

¹⁶Chunage Athens keloa ge Paulbe ne penai je kuâ ze bambe luage, chi namdi ge heraluîtewbe ramme ne puigit bambe pa ngau lu dege, pa pe lunggailak-luisui bam di de lei.

¹⁷Chidadege ka’nduibeki ge Judame benai keneibe lam ge peranchime dage zai hechaiki ge nai’nsangne bamdau-daume dage geikum ze bam de lei.

¹⁸Epikureame benai Stoikme mâ-chîka’ndingme hanggesame ne du pechu geikang de lei. Zai hanggesame ne “Ai pe kuâkiepeu, pa ’ndaikau sam sa nei lau?” ze kacheu de lei. Hanggesame ne, “Hesangme ram rapeu rasam pauruapeu nung lau lei,” ze kacheu de lei—Isua rasam zai pa chukadaibe rasam pa ne sabeibe ziegeneu.

¹⁹Chidadege Paulbe je penui ne ngua lu, Are-opagas, chi namdi gu samrambeki ge nguawang gai lu acheu sa ze, “Ai mâ-geteiliabe karchibe nang sabe ze anui chî duî mei?

²⁰Anui kun ge mâ-châmcheîbe ramme nang salia daze chiramme gu rimba anui chînei lei,” ze kacheu de lei.

²¹Chunage Athens ge bamme benai hanggesame chige bamme ze mâkedabe tew ta di ze mâ-mâ karchibe rasam sa zai ’ngking sâng ’ngking acheu ze bam de lei.

²²Dadege Paulbe ne Are-opagas sûngngang ge sap lu sa ze: “Athens ge bamme gau, getaleine ’mpuî ge ningnui â herasie ge ’nningkahekuîme bau lei be I chîpat lei.

²³I tatpatkaibe ge zai ningnui ne teikakellumbe zat ramme I ne ’ntingruagaibe ge herâtewbe-kaira kat chige samrit, ‘Chimakbe hera hang’ acheu ze giapatkaibe I ngaudau de lei. Chipauziegene ningnui ne chî mak ze kakellumbe ze I ne ningnui dage pau gai de lei.

²⁴Hera kedeirei benai pelung ge kebambe leine tewpeu, Ting-kedei Wangpeu chang ze bambepeu â ziemmena ba ne tewbe kellumki ge bam me lei,

²⁵zai pa ne pe hangge mâ-mâ ’nnang lei, acheubeibe helî gumbe gene ziemmename ba gene pechu mâ peipat ze ’nggua ze bam me lei. Pa zene ziemmena ’nteumena je keringbe benai hechuilu zai getaleine pei ze bam daseu.

²⁶Zai ziemmena hangkat dagene ziemmena zat misonggame je kedeirei leine ge bam ra hangge Hera ne ’ndam gai bei de lei, beting-pehî pa ne teleu’ntua gai ze penui lungrabe heramrai du ritkai’ntua zeu,

²⁷dezai penui ne pechu chîtau ra heguî ze Hera je penui ne peu ra hangge zeu. Acheuleusedu pa â anui ’nteumena dagene deu me lei,

²⁸ningnui gu heleu ka’mpuakme ruage hanggesame ne du ‘Anui â pe haîhikme gesang run lei’; pa gene anui ring zai anui ’ngngai ze bam, zai anui bam daseu,’ ze kacheu lei.

²⁹Anui â Hera haîhikme chang di daze, anui ne, chi Kaherâbe kacheube ze â chi gechâk, gepût, zai ziemmena ne pa maning gene benai chiamchibe gene mâ-mâ-kelei hangge peluî hang lupatkaibe gum lei, ze acheu ’nning gai ra hang â yi me lei.

³⁰Mâ de chî mak ze bambe ting ge â Hera ne ’nningkelamtam gai bei de lei, kane chuna â pebâm’nsangne ge haimena je helungheli ra die gai de lei,

³¹ziemmena pa ne sumgaibeipeu (Isua) zene kapelingbe gene kedeirei je samramrabe mai hangge pa ne chipau mai hang die gai ’ndi daseu, zai aipau hangge ze kechaibe gene pechu zuchugaibe gene teilia’nchichiak kai bei de lei,” ze kacheu de lei.

³²Chunage kechaibe gene ringchukadaibe rasam sabe penui seu lu dege, hanggesame ne teihenuitew de lei; kane kêdame ne, “Aipau deu ge ning dagene anui ’ngking dai gu lei,” ze kacheu de lei.

³³Chidadege â penui ruagene Paulbe zuapat ti de lei.

³⁴Kane hanggesame â pe chai sui ze ’nnum’mmi di de lei, chime ruage Are-opagas gu ziemmena Dionishiabe benai ’mpuimi Damarisle, zai penai dage mi-mige kêdame du bam de lei.