Read Zeme Naga TÂTEWBE 19 Bible Online

TÂTEWBE 19 - Zeme Naga bible

TÂTEWBE 19

¹Apollobe Korinth ge bambe luage, Paulbe â, chi heram ’nrei ’mbene tatpela ze Ephesi ge pa wang gai de lei. Chige kenieme hanggesame je pa ngaukahedau de lei.

²Dadege pa ne penui je, “Ningnui ’nnum’mmi gai dege Herui Ka’nchibe ningnui lutâu di mei?” ze kacheu de lei. Dadege penui ne, “Herui Ka’nchibe la lei du anui â mâdau de seu de seu me lei,” ze kacheu de lei.

³Dadege pa ne, “Acheuzaine ’ndaikau gu baptisma ningnui lu lau?” acheu bei de lei. Penui ne, “Johanbe gu baptisma lei,” ze kacheu de lei.

⁴Dadege Paulbe ne, “Johanbe â pe chângge patrapeu, chi Isua je ’nnum’mmi ra baudime je salia ze, helungkahelibe gu baptisma ne baptistew gai de lei,” kacheu de lei.

⁵Aipau sam ze seulube gene penui je Heguang Isua ji gene baptistew gai bei de lei.

⁶Zai Paulbe ne penui peireige pe ba die gai bei dege Herui Ka’nchibe penui peireige wangkeu gai de lei; dadege helad chimakbe ne sam sa ze, kemeu sam penui sa de lei.

⁷Chige penui ’nteumena hangkereu ze kena riâ gum lei.

⁸Zai kanduibeki ge pa gut ti de lei, zai kêu chum riâ kuugiereu ze sam sa ze Hera gu heguangram rasam deu ge penui dage samtu ze, zai kiâm ze bam lei;

⁹kane hanggesame ne ’ndamdei ze ’nnum’mmi mak zai baudime dage chi ’Mpuî rasam ze sa’nsia gai bei dege, penui je pa sâu gai nan ze kenieme je ngua lu, nai’nsangne Turannasbe gu geteiliabeki ge sam tu’nrui ze bam bam de lei.

¹⁰Aipau ze kum na ling â bam de lei, chidadege Asia ge bamme leine Judame zai Grikme du Heguang gu sam penui seu kam di de lei.

¹¹Zai Hera ne Paulbe ba gene tâningdaulakbe gechâm-châmbe ramme tew gai bei de lei.

¹²Chidadege â Paulbe pumgîm gene pa teibe paîpoine ramme mei nune mi paîni ’nchi ra mi suage tapsuâgaibe paî pa teibe zat mei ze pe pum gene ka’nrâme hangge teitat kam di de lei, dadege â penui dagene herarît zat ramme ’mbia kam di, zai herui kesiabe ramme penui dagene tat kam di de lei.

¹³Zai Judame hanggesame herui kesiabe ramme kelitua ze tatruame ne herui kesiabe bambe kau ramme peireige Heguang Isua Krista ji gene herui kesiabe ramme keli ze acheu sa ze, “Paulbe ne pe rasam paupeu, chi Isua ji gene I ne ningnui je rang gai de lei,” ze kacheu de lei.

¹⁴Zai Judame gu tingkudilangpeu pe ji, Skebabe na hangsename ne chigumbe tew ka’nsui de lei.

¹⁵Kane herui kesiabe ne penui je kak ze, “Isua je I chî lei, zai Paulbe je du I chî lei; kane ningnui châu lau?” ze kacheu de lei.

¹⁶Zai herui kesiabe bambe ziemmenapeu zene ’nsakpat ze penui je chup ze duî lu de lei, chidadege â chipau ki gene penui hejam ze pumlâng paktat-wak ti de lei.

¹⁷Zai aize Ephesi ge bamme Judame benai Jentailme leine du seu kam di de lei; dadege penui haimena ne hing di de lei; zai Heguang Isua ji ze penui ne suang bam di de lei.

¹⁸Zai Keneime misonggame ne du wang lu ze, penui tâ-kesiabe tewbe ramme baudime suage ranglia ze bam de lei.

¹⁹Dadege kahekabe tak tewchime misongga ze penui gu leisikuak ramme teiwang lu ze, haî mikngau gene hemi ne rû kam gai ’ndi de lei; zai leisikuak ramme mî penui ’nsap kam gai dadege pelane ge rangkângpum chang rengeu riâ gum gu lei.

²⁰Chigum ze Tingwang gu sam ne duî ze naîting bam di de lei.

²¹Airamme wangchanglube chângge Paulbe Herui gene pe lung teleu lu ze, Makedonia benai Akaia tatpela ze, Jerusalem keloa ge tat kai ra pa ka’nning de lei, acheu sa ze, “Chige I bam gai lu dezai Rom du I ngau gai sing gu lei,” ze kacheu de lei.

²²Zai pechu ka’ngngâpeu hangna Timothibe benai Erastasbe je Makedoniaram ’mbe lang gai nan ze pa â Asia ge ’nnai gai di de lei.

²³Chigumbe ting geze chi ’Mpui tedeu ge kakeleube kedibe zuachu di de lei.

²⁴Hangkat pe ji, Demetriasbe, gepût langpeu, Artemisle (herapui) luî hang gepût ne langlua ze bambepeu zene aipau tâ ze mâ-chiamchime dage teiwang gai bei ze aigene helîhedet ze tâtewbe kecheîne ta di bam de lei.

²⁵Zai pe kangge tâtewme benai pa tâtewbe gum ze tewme leine je pa ne kûwang’ndui lu ze penui je, “Azangme nung gau, ai anui tâtewbe gene anui heurâ bam lei be ningnui chî lei.

²⁶Zai ai Ephesi ge runne mak ze Asiaram leine riâ ge du aipaupeu Paulbe ne, ‘Heba ne tewbe heraluî ramme â hera ramme mak lei,’ ze misonggame je kiâmkau ze, chak’nreitat kam de lei be ze ningnui seu da zai chî de lei.

²⁷Chidaze ai anui tâtewbe ze ga ra hingbe runne makse, Artemile (herapui) gu kakellumbeki kedibe ze â mâtâu hang ga gai du de lei, zai Asiaram ge haimena ne, zai kedeirei ne kakellumbe pui ngeudibe huikeugairabe ze mi hing de lei,” ze kacheu de lei.

²⁸Aipau sam ze penui seu lu dege penui lumpum-desang di ze ’nrung ze, “Ephesime gu Artemisle â di-sang-di lei!” ze acheu ze bam de lei.

²⁹Chidadege namdi lung pelane ge ’nteumena keleulia bam di de lei; dadege â penui ne Gaiabe benai Aristarkabe, Paulbe je nguaka’mbeime Makedonia’mpeu kena je nîm lu mâ-luî teiliabeki ’mbe kelua ze zukereugut ti de lei.

³⁰Paulbe â baudime ruage gut ra nei da, kane kenieme ne pechu lun mak tai lei;

³¹Asiaram ge kanguame besuitewme ruage hanggesame, chi Paulbe kangme ’nsangdu pe dage ziemmena lang gai ze, mâ-luîteiliabeki ge gut mak ra hang pechu kiam de lei.

³²Chunage hanggesame ne mâ-kuâge ’nrung zai kêdame hanggesame ne mâ-kuâge ’nrung acheu ze bam di de lei; baudi ka’nduibe kebiengdibe ziegeneu, zai penui ruage gekieme ne chige penui ’ndaikautew ra wang gai mei be du chî mak lei.

³³Baudime hanggesame ne Alekzandarbe je hela ge teipat kai de lei. Dadege Alekzandarbe ne baudime je peize rim bam gai nei ze pe ba kezapliâ de lei.

³⁴Kane pa â Juda’mpeu lei be penui chî lu dege, ’nchetkak kena gum riâ penui ’nteumena ’nrungkua ze “Ephesime gu Artemisle â di-sang-di lei,” ze penui kacheu de lei.

³⁵Zai hekuînâm ge leisirawpeu ne baudime je tew’nsaurim gai lu dege, penui je pa ne, “Ephesi ge bamme gau, Artemisle kedipui gu kellumki benai peluî ka’nchibe tinggîm ’mbene ’ngngaîkeube ze Ephesime ne reî ze bambe kau de lei be ziemmena châu chimakbe kau la lau?

³⁶Airamme ze mâ de keleu ra ga daze, ningnui kuâneu mak ze, zai keluakkelet ne tâtew mak ze bam ra yi sing lei.

³⁷Aige ningnui nguawangme ze â, kakellumbeki gene mâ-hegasut-teume du mak, zai anui rapui je sakahebâme du mak lei.

³⁸Chidaze Demetriasbe benai mâ-chiamchime ne mige peireige kesia’ndamgaibe lazai â samrambeki ze lat la, zai samramme leine chige lamui lei; kat-kat peireige getube sam ramme peize penui je teiwang lau.

³⁹Kane mâkedabe sam sa ra lazai â, hingde-sie luî ze ka’nduibeki gene râm ra lei.

⁴⁰Nemai ge mâ-tewkeleupatbe ze anui peirei gene kesiatew ze bam ra hingbe bam de lei, aize â mâ de pedeugabe kau daze anui ne sa’nzei dui lei,” ze kacheu de lei.

⁴¹Zai aize pa ne sa gai lu dege, ka’nduibe hî kam gai bei de lei.