Read Zeme Naga TÂTEWBE 2 Bible Online

TÂTEWBE 2 - Zeme Naga bible

TÂTEWBE 2

¹Pentikos mai wangchang dadege penui ’nteumena bâm kat ge bam de lei.

²Zai luakatne tinggîm ’mbene tingkaichibe kuâ gum ze wangkeube zene penui ka’ntaubeki ze puigit bam di de lei.

³Dadege hemimelei gum ze ’nzirua ze penui ’nteumena dage nguabam de lei.

⁴Zai Herui Ka’nchibe ne penui ’nteumena dage pui kam di ze helad gechâm-châmbe ne penui sam sa de lei, Herui ne sam sa ra penui je pei gai bei be luigum zeu.

⁵Chunage tingkehube kangge heramzat leine gene wangme Judame, herasie suika’nchukme Jerusalem ge lung ze bam de lei.

⁶Zai aipau kuâ geze baudime wang’ndui gai de lei, dadege mâ-dambe kuâ ze penui lad-lad hangge seukamgaidibe ziegene penui ’nningdaulak kam di de lei.

⁷Dadege penui ’nteumena ne ’nningdaulaklu-lu bam de lei, zai acheu ze sa ze, “Airamme leine chuna samsabe ze Galilime mak ti lau?

⁸’Ndaigum ze mi kining lad-lad ne samsa bei gum ze anui kat-kat dage penui samsabe seuchi lu lau?

⁹Anui Parthiame, Medme, Elamme, Mesopotamiaram ge bamme, Judia benai Kappadosiaram ge bamme, Pontas benai Asiaram ge bamme,

¹⁰Phrigiaram ge bamme, Pamphiliaram ge bamme, Ijipram ge bamme, Kuriniram samrambe kangge Libiaram ge bamme, zai Rom namdi gene ’ngkiâmieme, Judame benai Juda sie ge guttime,

¹¹Kretme, zai Arabram ge bamme ne Hera tatew kedibe ramme rasam saliabe mi lad-lad hangge seukamgaidibe nung zeu,” ze kacheu de lei.

¹²Dadege ’nteumena ne ’nningdaulak luisui di ze kat-kat dage, “Aize ’ndaikau rimba rei lau?” ze penui kacheu de lei.

¹³Kane hanggesame ne hepâ-henuitew ze, “Aime penui â wain ne puidibe kau ramme de lei,” ze kacheu de lei.

¹⁴Kane Peterbe ne hangkereu-ze-katme benai sap lu pe rankai ’nrung ze penui je, “Judia ge bamme ziemmename benai Jerusalem ge bamme leine gau, a sam ’ngking le lau, zai aize chî’mmi le lau.

¹⁵Aime ze ningnui ne ’nnumgaibe luigum ze â meneu me lei, chuna â hechua ’nchetkak sekui riâ runne rei daseu;

¹⁶kane kemeu’mpeu Joelbe ne aize kerangbe ze de lei:

¹⁷‘Hera ne rang ze, nâlangbe tingnaimikpui ramme ge â, ziemmename zat leine peireige I ne a Herui ruî gai gu lei, zai ningnui name ’mpeumi benai ’mpuimi ramme ne kemeusam paurua gu lei, zai ningnui na rehangme ne keliâbe ramme ngau gu lei, ai ningnui ruage gechîngme ne hemang ramme ’mmi gu lei;

¹⁸eu lei, a gua ka’ngguame ’mpeumi ’mpuimi ramme pumgîm ge du chipau ting ge a Herui ruî gai gu lei; dezai penui ne kemeusam paurua gu lei.

¹⁹Zai kehu ’mbe tinggîm ge ningdaulakbe zat ramme I ne teilia gu zai ’ngkang ’mbe kedei ge ka’nchetbe ’nningdaulakbe ramme teilia gu lei, chige hejai, hemi, zai mika ne muîgit ze bam gu lei;

²⁰tingnaimik ze muî gu zai hekêu ze hejai chang gai du lei, zai Heguangpeu gu tingnaimikpui, chi pengêudibe benai ngauhingbe mai wangkeurabe suage zeu.

²¹Zai mi-mige Heguangpeu ji ze kûbe kau je â, tew’nring gai bu lei,’ ze kacheube zeu.

²²“Israelme gau, aipau sam ramme seu le lau: Isua Nazareth’mpeu, chi Hera ne ningnui ruage pe dagezene tâ kedibe tewbe ramme, zai mâ-’nningdaulakbe zai mâ-’nningdaulakbe tewbe ramme tewgaibe gene pa ne ningnui dage nguahezuâgaibeipeu chi ziemmena je ningnui chibe—

²³ai Isua ze Hera ne diegai’ndibe benai chî’ntuadibe luigum ze peipat kai bei ze hingde teimakme ba gezene ningnui ne pechu gia gai ze tewchatkai’ndipeu de lei.

²⁴Kane Hera ne pechu â kechaibe ted geteube gene heipat kai lu ze kuakchu gai bei de lei, pechu â chize ne namchi lak ti dadegeu.

²⁵Chigum ze Dabidbe ne pe rasam acheu ze salia ze, ‘Tingwang je a suage I ngau bam lei, achu kechuî’ngngai me ra hang pa ne a hezat’mbia bam bei daseu;

²⁶chipauziegene a lung ge a suiyi lei, zai a leiria ne pe suiyika’nta lei; chipau peireige a pum ze du kaheguîbe ge bam gu lei.

²⁷Kechaiberam ge a keringbe je nang ne ’mbâmdiak kai ra mak lei, zai ning gu Ka’nchipeu je nang ne hui’ngga gai ra pei ra mak daseu.

²⁸Nang ne achu keringbe ’mpuî chiliâ gai bei de lei; nang bambe ne a suiyibe ne pui ze bam ra nang ne achu tew gai gu lei,’ ze kacheu de lei.

²⁹“A puiname gau, haîpau Dabidbe rasam ze ningnui suage I hing mak ze ranglia’nchichiak kai dui lei, chi pa chai di, bai gai ’ndi de lei, zai nemai riâ chang ze anui dage pe raw lamui lei.

³⁰Chipauziegene pa kemeu hangkat changlube luigum ze Hera ne pe dage deseu ze hat kai ze, pe gu heguang-bamrak ge pe chaname ruage hangkat je pa ne tei’ntau gai gu lei be chî lu ze,

³¹Krista je â Kechaiberam ge ’mbâmdiak kai me lei, zai pe pum du hui’nggagaidibe ngau me lei kacheube ngau’ntua lu ze Krista kechaibe gene chukadaibe rasam pa salia gai de lei.

³²Ai Isua sing je Hera ne kechaibe gene kuakchu gai bei de lei, zai chipau sam ze anui ne sakkitewme kam de lei.

³³Pechu â Hera hezat’mbia ge teichu gai bei ze, Bepeu dagene Herui Ka’nchibe samhatkaibe ngaulube luigum ze chunage ningnui ngau ze geseube ze pa ne ruîkeu gai de lei.

³⁴Dabidbe â tinggîm ’mbe chu me lei; kane pa ne acheu ze rang ze; ‘Tingwang ne a Wangpeu je, A hezat’mbia ge ’ntau bam lau,

³⁵ning teureime je ning pichaîra chang ra hang I tew gai mak tâneu,’ kacheu de lei.

³⁶Chidaze chi Isua ningnui ne heling ge giagai’ndipeu je Heguang zai Krista chang ra Hera ne tew gai bei de lei be ze Israelbe kiduîme leine ne peize chî sing le lau,” ze kacheu de lei.

³⁷Zai aipau sam ze penui seu lu dege, penui lung rei bei gum bam di ze Peterbe benai kenieme kêdame je, “Anui puiname gau, anui ’ndaikau tak tew ra lau?” ze penui kacheu de lei.

³⁸Dadege Peterbe ne penui je, “Ningnui lung heli zu lau, zai ’nteumena ningnui gu hemui kelunbe hangge Isua Krista ji gene baptisma lu zu lau; dezai Herui Ka’nchibe gu kela ningnui ngau gu lei.

³⁹Chi samhatkaibe ze â Tingwang Hera ne pe lam kûwanggaime, ningnui zai ningnui name zai kedeu ’mbe bamdime leine hang lei,” kacheu de lei.

⁴⁰Zai sam kêdabe misonggabe ne pa ne penui je dei, zai kiâm ze, “Aipau helungriaksiabe rehei gene ningnui runne ningnui je tew’nringpat le lau,” kacheu de lei.

⁴¹Chigum ze pa samsabe ze ka’nchâme leine je â baptistew gai ze, chipau mai ge ziemmena chang chum gum â penui ruage teihelua gai ’ndi de lei.

⁴²Zai kenieme geteiliabe sam ge, zai kat-kat je nguapuinakattewbe ge, zai tingkutiapângbe benai kakellumbe ge, penui runne peipat kai ze bam lei.

⁴³Zai kehingbe haimena peireige wang de lei, mâ-ningdaulakbe ramme benai ’nningdaulakbe tewbe ramme misongga ze apostolme dagene tew gai bei ze bam de lei.

⁴⁴’Nnum’mmi ze bamdime â mâ-leine ge heruagit ze penui gu kebambe leine du mi gu-gu châm mak ze bam di de lei;

⁴⁵zai penui gu kebambe ramme benai penui gu merua ramme zua lu, ka’nnang-nangme dage ’nzi ze bam lei.

⁴⁶Zai nai’nsangne kellumki ge penui wang’ndui ka’nsui lei, zai penui ki ge tingku tiapâng ze, penui suiyi ze helungyibe ne teseu nguateu ze

⁴⁷Hera je penui toa ze, ’nteumena dage nguayichi ze bam lei. Zai nai’nsangne herakiangna ge penui bau ruage tew’nringgailume heguangpeu ne kaisî gai ze bam de lei.