Read Zeme Naga TÂTEWBE 21 Bible Online

TÂTEWBE 21 - Zeme Naga bible

TÂTEWBE 21

¹Zai penui je anui rimna gai lu dege anui ’nnei chaîtat ze ’nzeitunbe ’mpuî gene Kos anui chang de lei, zai bechai mai ge Rhode tat kai ze Patara chang de lei.

²Chige Phoeniki tatkairabe ’nnei ngau lu, chige chua gai lu ze anui tat ti de lei.

³Zai Sipra ngauyibe bâm anui chang dege chigene anui heku’mbia sâu nan ze Siria ’mbe tatzua ze Tira chang de lei; chigene ’nnei gene kerua ramme ze lupat kai ra chang dadegeu.

⁴Zai chige kenieme je anui ngau lu, penui dage hezie senane ’nnai gai de lei. Paulbe je Jerusalem ’mbe tat’nduâ mak ra Herui gene penui ne ranglia bei lei.

⁵Zai chige anui bamrabe riâ bam gai dege, anui rimna lu, anui ’mpuî ra’mbe tatchu kadai de lei; zai penui ’nteumena ne penui puiname je ngua lu namdi gene hela riâ anui je nguagepâuchang gai de lei; zai sungkling kung ge anui ’nteumena kukdung lu ze kakellum de lei, zai kat-kat je anui hebatei-kellum gai lu karimna de lei.

⁶Chidadege â ’nnei gene anui â tat ti de lei, zai penui â penui ki lam wang dai di de lei.

⁷Zai Tira gene ’nnei ge anui chua lu ze, Tolemai wangchang de lei; zai chige mi puiname je ngauhedau ze, rechâ gai lu ze, penui dage mai kat anui ’nnai gai de lei.

⁸Bechaibe mai dege anui tatchu dai ze, Kaisaria chang de lei; dadege pauruapeu, Philipbe, mi hangsename ruage hangkatpeu ki ge anui rêu de lei.

⁹Zai Philipbe name heleume, kemeu sampaume hangmedai bam lei.

¹⁰Chige hezie misongga ’nnai lage, kemeu’mpeu pe ji, Agababe Judia ’mbene wang de lei.

¹¹Zai anui dage pa wang gai lu, Paulbe kiakâk lu lu pe runne chize ne pe pî benai pe ba pi gai lu ze, acheu sa ze, “Herui Ka’nchibe ne acheu ze rang ze, ‘Aipau kiakâk ’mpaupeu je Jerusalem ge Judame ne aigum ze pi gu lei, zai penui ne pechu Jentailme ba ge pei gai gu lei,’ kacheu de lei,” ze kacheu lei.

¹²Zai aize anui seu lu dege, anui benai chige bamme ne Jerusalem tat me ra hangge Paulbe je kiâm de lei.

¹³Dadege Paulbe ne kak ze, “Ningnui ’ndaitew ze aigum hap ze a lung tewka’nnu lau? Jerusalem ge achu bangnamgai’nderabe runne mak ze, Heguang Isua ji gene chai gai ra hangge I â kedâ lu de lei,” ze kacheu de lei.

¹⁴Dadege pechu anui kiâmkaulak ti dege, anui sau gai lu ze “Heguangpeu suî’nning ne peize chang du lau,” ze acheu gai de lei.

¹⁵Aipau ting riâ bam gai lu dege, mâ-mâ kedâ kam lu Jerusalem ’mbe anui hang de lei.

¹⁶Zai Kaisaria gene kenieme hanggesame ne anui je nguatat ze, Sipra’mpeu Nasonbe ki anui rêurabeki ge anui je nguagut kai de lei, pa â kenieme raîdime ruage hangkat lei.

¹⁷Jerusalem ge anui wangchang dege, mi puiname ne penui suiyi ze anui je ’nchâ bei de lei.

¹⁸Bechaibe mai dege Paulbe ne anui je ngua lu, Jakobbe tailam gut lei; zai chige herakiangna ge gechîngme leine du bam kam de lei.

¹⁹Zai Paulbe ne penui kahedaube rasam sa gai lu dege, pa tâgua-ka’ngguabe gene Hera ne Jentailme ruage tâtewbe rasam ze kat-katne ze salia kam gai bei de lei.

²⁰Zai chize penui seu lu dege Hera je penui hengêutew’ndi gai de lei. Zai Paulbe je penui ne, “Anui kina gau, Judame ruage neidime changsenâng bambe nang pie gai ni lau, penui ’nteumena ne (Mosabe gu) hingde je ’nchâ-kadesang lei,

²¹zai nang ne Jentailme ruage Judame bamme leine je Mosabe je sâupat kai ze penui name je rumgetan me ra, zai Judame sie ramme tei me ra geteiliabe ramme ze miramme ne penui je salia bei de lei.

²²Chidaze ’ndaigumbe tak tew ra lau? Nang wang la de lei be rasam ze du penui seu sing gu de lei.

²³Chidaze anui rangbe nang tew lau. Anui dage ’mpeumi hangmedai samhatlume lamui lei;

²⁴aime je nang ne ngua lu nang benai penui je tew’nchi gai le lau, zai penui rangkâng ka’nnangbe hang du nang ne pei lau, dezai penui peîtam gut le ra hangge zeu. Chidezai ’nteumena ne penui je saliabe sam ze mâ du mak lei be kane nang du hingde luigum ze lung lei be chî le ra hangge zeu.

²⁵Kane Jentailme ruage neidime hangge â, anui ne samriagaibe heraluîtewbe ramme dage mâ-mâ peipatbe zai hejai teube, mâ-mâ hekitchatbe zai hangleutewbe gene ’mbiaderabe deu ge samkela anui ’mput kai de lei,” ze kacheu de lei.

²⁶Chidadege Paulbe ne chime bau je ngua lu bechai mai dege penui benai pa huika’nchibe tâ tew de lei, zai ’ndaikau ting ge huika’nchibe gu herâtewbe tew kam ra mei be zai hang kat-kat hangge herâtew gai ra mei be rasam chiliâ gai ra kellumki ’mbe tat ti de lei.

²⁷Zai hezie senane kam zi gu dadege Judame Asia ge bamme, pechu kellumki gene ngaulume ne baudime je tew’nnâheu gai ze Paulbe je nîm lu ze,

²⁸acheu ’nrung ze, “Israelme gau, ’ngngâ lau! Pebâm’nsangne ge ziemmename dage mâ-getei’nsia zai hingde benai aipau bâm peireige ’nggibambe ze aipaupeu de lei; chipau peireige du pa ne Grikme je kellumki ge nguagut kai ze aipau bâm ka’nchibe tewhebâ gai bei de lei,” ze kacheu de lei.

²⁹Besua’ngka ge namdi ge Ephesi’mpeu, Trophimabe pe dage bambe penui ngaulube ziegene chipaupeu je kellumki ’mbe Paulbe ne nguagut ra penui ’nnum gai ’ndi dadegeu.

³⁰Dadege chipau namdi pelane ze ’ngngai kam di de lei, ziemmename ramme pakherua ze bam de lei; Paulbe je penui ne nîm lu, kellumki gene hela ’mbe zupat nan ze luakatne ’ngkam ramme kainam gai ’ndi de lei.

³¹Zai Paulbe je penui tewchat ’nde ra tew lage, Jerusalem pelane ge ’nnâheu la de lei be ze sipai changmuiteipeu dage sam wangchang di de lei.

³²Dadege luakatne sipai changmuiteipeu ne sipai haîmuiteime benai sipaime je ngua lu, baudime tailam pakkeu de lei; dadege sipai changmuiteipeu benai sipaime je penui ngau lu dege, Paulbe je penui laksau di de lei.

³³Chidadege sipai changmuiteipeu ne Paulbe tailam hang ze, pechu nîm lu, pe ba ge hegeîria kena ne pi ra samdie gai bei de lei. Pa ne, Paulbe ze châu mei zai ’ndaikau tew gai bei mei be ka’nneu de lei.

³⁴Baudime ruage bau kat ne sam kat sa, zai kêdabe bau kat ne sam kêdabe sa bam lei, zai kakebiengbe ziegene gesang-peling sam ze sipai changmuiteipeu chî lak ti ze, Paulbe je sipaime gu kerielung ’mbe teigut ra pa ne die gai bei de lei.

³⁵Zai Paulbe ’mpuîki beset-set wangkeube luage baudime sianeibe ziegene Paulbe je â sipaime ne pua ra chang di de lei;

³⁶baudime, pe chai-suime ne, “Aipaupeu je deî’ngga ne lau,” ze ’nrungkeleulia ze bam bei dadegeu.

³⁷Paulbe je sipaime ne kerielung teigutchang-tena dege, pa ne sipai changmuiteipeu je: “Ning dage sam kecheîne I sa gai dui mei?” kacheu de lei. Dadege pa ne, “Grik lad nang chî mei?

³⁸Nang ze, henaiting kakgene keleupat ze hênamkiangname chang hedaime je hênamkang ’mbe nguatatkai’ndipeu, Ijip’mpeu mak mei?” ze kacheu de lei.

³⁹Paulbe ne kak ze, “I â Juda’mpeu Kilikia ge Tarsas ge bambepeu lei, kecheînemakbe namdi deina’mpeu lei; ai baudime ruage sam kat sa gai ra pei ra ningchu I kiam lei,” kacheu de lei.

⁴⁰Zai pa kiebe lun bei dege, Paulbe desua ge sap lu ze baudime lam pe ba kezaprua gai de lei; zai baudime gîngrim bambe luage Paulbe penui dage Hebrai lad ne acheu salia ze: