Read Zeme Naga TÂTEWBE 22 Bible Online

TÂTEWBE 22 - Zeme Naga bible

TÂTEWBE 22

¹“A sikiname, zai a peume nung gau, chunage achu sagube sam I sabe seu le lau,” ze kacheu de lei.

²Dadege Hebrai lad ne penui dage pa ne sam saliabe penui seu lu dege penui kuâneutabi-bi bam di de lei. Zai pa ne:

³“I â Juda’mpeu, Kilikia ge Tarsas gene achu â lungkeu gai lei, kane aipau namdi gene I chîngchu de lei, Gamali-elbe pîkang gene anui paume gu hingde reika’mmibe tak luî gene leisi getei ze I â bam de lei; nemai ge ningnui ’nteumena ne Hera hangge ka’nrîbe gum ze I du bam lu de lei.

⁴Zai aipau ’Mpui je Keneime je â, I ne Kechaibe riâ chang ze penui je tewsâ ze ’mpeumi ’mpuimi ramme je I ne nîm lu ze kebangki ge bang gai ka’nsui de lei;

⁵tingkudilangpeu benai samrambeki ge gechingme leine ne achu sakkitewbeibe luigum zeu. Penui dagene mi puiname hangge samkela peibe I tei lu ze Damaska ’mbe I ’mbeitat te lei, chige bamme je du ngua lu tewsâ ra hang hegeî’ngkap ’nta gai lu Jerusalem ’mbe nguahang ra hangge zeu.”

⁶“Zai I acheu tat ze Damaska hia wangkeuchang dege, tîngna’nding gumbe ge tinggîm ’mbene kebabe pa’mbi kedibe a taige luakatne sireba gai de lei.

⁷Zai kedei ge I kau gai di de lei, zai achu, ‘Saul, Saul, ’ndaitew ze nang achu tewsâ lau?’ ze kacheube kuâ I seu de lei.

⁸Dadege I ne kak ze, ‘Heguang gau, nang châu lau?’ ze kacheu de lei. Dadege pa ne achu, ‘I â Isua Nazareth’mpeu nang ne tewsâpeu de lei,’ ze kacheu de lei.

⁹Chunage a kangme a dage bamme â, kebabe ze penui ngau da, kane achu ka’mpaube kuâ â penui seu mak lei.

¹⁰Dadege I ne, ‘Heguang gau, ’ndaikau I tew ra lau?’ ze acheu bei de lei. Dadege Heguang ne achu, ‘Chu lu ze Damaska ’mbe gut chu lau, chige nang tâtewrabe leine teleu’ntuagai’ndibe ze ningchu ranglia gu lei,’ ze kacheu de lei.

¹¹Zai kebabe pa’mbi yibe ziegene a mik mâ-ngau ta di de lei, dadege a kangme ne a ba tei lu ze Damaska ge I gut kai de lei.

¹²“Zai hangkat pe ji, Ananiasbe hingde ’mpuî ge ’nningkahekuîpeu, zai Damaska ge Judame bamme leine ne pechu sa’mmi ze bampeu,

¹³a dage wang lu, a taige pa sap lu ze, achu, ‘Saulbe, a kina gau, ning mik ne mâ ngau de zu lau,’ ze kacheu de lei.

¹⁴Dadege pa ne, ‘Anui peume Rapeu ne, ningchu pe suî’nning chî ra, Kapelingbe Hangkat je chî ra, zai pe mui gene hekuâ patbe seu ra ningchu sum gai bei de lei;

¹⁵nang kengaube benai nang keseube ze ziemmena ’nteumena suage nang ne sakkitew ra de lei.

¹⁶Zai chunage ’ndaitew ze nang kuâ bam ra lau? Chu ze baptisma lu le zu lau, zai pe ji kû ze ning gu hemui ramme huitua ne zu lau,’ kacheu de lei.

¹⁷“Jerusalem ’mbe I wang dai lu ze, kellumki ge I kakellumbe luage a mang gum ze bîngtattibe gene

¹⁸pechu I ngau de lei, ‘Kelua ze Jerusalem gene nang zuapat te zu lau, a rasam nang paugaibe ze penui ne lu ra mak daseu,’ ze acheu samsabe zeu.

¹⁹Dadege I ne, ‘Heguang gau, ka’nduibeki leine ge ningchu ’nnumka’mmime je kebangki ge bang gai zai I ne lak’nsuibambe penui chî kam lei.

²⁰Zai ning gu sakkitewpeu Stephenbe jai tewpatkaibe luage chige I du bam ze, a lung hezuâ gai de lei, zai pechu tewchatme paî ramme I ne reî ze bam de lei,’ acheu bei de lei.

²¹Dadege pa ne achu, ‘Tat chu lau; aigene heram kedeu ’mbe Jentailme dage ningchu I ne lang gai gu lei,’ ze kacheu de lei,” ze acheu ze salia bei de lei.

²²Paulbe ne aipau sam sachangbe riâ penui ’ngking bam de lei; dadege penui rankai ’nrung ze, “Aigumbe kau je â kedeirei ge peize bam ta ra tew’ngga ne lau! Pa ring ra yi me lei,” ze penui kacheu de lei.

²³Zai penui ’nrung ze, penui paî gechunggetie ze, zai tingkai ge kedeinia ’nruk ze bambe luage,

²⁴sipai changmuiteipeu ne Paulbe je â sipaime gu kerielung ’mbe nguagut ze ’ndaikau deu hanggene Judame ne pe peireige aipau ’nrung-ka’nrung mei be pechu lak ze samkedî ra samdie gai bei de lei.

²⁵Kane penui ne Paulbe je lakkegit ra hemeigeiria ne pi’ndibe luage Paulbe ne sipai haîmuiteipeu, sapwang’nna lu bambepeu je, “Rom-deina’mpeu, chi chau’ngkuigaibe kau je ningnui ne lakkegit-getie bam ra besie la mei?” acheu bei de lei.

²⁶Dadege sipai haîmuiteipeu ne chize seu lu ze, sipai changmuiteipeu dage tat ze pechu, “Nang ’ndaikau tew gai ra lau? Aipaupeu â Rom deina’mpeu daseu,” ze kacheu de lei.

²⁷Zai sipai changmuiteipeu ne wang ze Paulbe je, “Achu ranglia lau, nang Rom deina’mpeu mei?” ze kacheu de lei. Dadege pa ne, “Eu lei,” ze acheu bei de lei.

²⁸Sipai changmuiteipeu ne kak ze, “I â Romdeina ’mpeu chang ra hangge rangkâng misongga pei ze lui de lei,” kacheu de lei. Paulbe ne, “I â achu lungkeube gene Rom deina chang de lei,” ze acheu bei de lei.

²⁹Chidadege â luakatne Paulbe je sam ’nneudesirame bau ze tat kam di de lei; zai sipai changmuiteipeu ze du hing di de lei, Paulbe â Rom deina’mpeu lei be chîdibe benai pechu pa ne pigai’ndibe ziegeneu.

³⁰Kane bechai mai dege ’ndaitewbeibe ziegene Judame ne Paulbe je kesiatew mei be deu tak ze chîdesi nei dege Paulbe je pa ne heipat kai lu ze tingkugechîngme ramme benai samrambeki gu ziemmena leine wang’ndui gai ra samdie gai bei de lei, zai penui suage pechu kai ra hang pa ne Paulbe je nguakeu gai de lei.