Read Zeme Naga TÂTEWBE 23 Bible Online

TÂTEWBE 23 - Zeme Naga bible

TÂTEWBE 23

¹Zai Paulbe ne samrambe bâm ge piereking lu acheu sa ze, “Mi puiname gau, I â a hangrabe â keyi-kesia chibe kau lei, yi ze nemai riâ Hera masuage I ring la lei,” kacheu de lei.

²Dadege tingkudilangpeu Ananiasbe zene Paulbe taige sapme je pe mui ge lak ra die gai bei de lei.

³Dadege Paulbe ne pechu, “Hera ne ningchu lak ku lei, nang ’mbie ’nnuk-hâgailube kau! Nang aige ’ntau ze hingde-sie luî gene achu samramrabe kau da, kane hingde ’mpuimakbe ne achu lak ra die gai mei?” ze kacheu de lei.

⁴Pehiage sapme ne, “Nang ne aigum ze Hera gu tingkudilangpeu je tewkengam gai ra mei?” kacheu de lei.

⁵Dadege Paulbe ne, “Mi puiname gau, I â pa tingkudilangpeu lei be du chî me lei, ‘Ning gu baudime je samrampeu je kesiabe hang nang sa gai mak ra lei,’ ze raw gai daseu,” ze kacheu de lei.

⁶Zai chige bamme ruage hanggesame â Saddusime zai hanggesame â Pharisaime lei be Paulbe chî lu dege, samrambeki ge pa ’nrung ze, “Mi puiname gau, I â Pharisaime na Pharisai’mpeu lei; kechaime ringchukadaibe kaheguîbe deu hanggene achu samram gai lei,” ze kacheu de lei.

⁷Zai aipau sam ze pa sa bei dege â, Pharisaime benai Saddusime kakge hegeichu di de lei; zai wangka’nduime ruage pebau-pat ti de lei.

⁸Saddusime ne sabe â, kechaibe gene chukadaibe ga, zai angelme du ga, zai herui du ga lei, kacheube lei; kane Pharisaime â airamme ze ’nnumka’mmi lei.

⁹Chidadege â kebieng’nteu-teu chu di de lei; zai Pharisaime ruagene leisirawme hanggesame ne sapchu lu ze geikum ze, “Aipaupeu dage mâ de kemaube anui ngau me lei. Angel’mpeu ne mei, nu herui ne mei ze pe dage sam sabeibe gum zeu?” kacheu lei.

¹⁰Zai penui samtube ze kebiengbi-bi di dege sipai changmuiteipeu ze penui ne Paulbe je tew’nsia desuirui nan ta ra hing di ze sipaime je tat ze Paulbe je sipai kerielung ’mbe ’nchi-chine nguagut kai ’nde ra samdie gai bei de lei.

¹¹Chipau mai tingmuî Paulbe taige Heguangpeu sap lu ze, “Kugiereu ze bam lau, Jerusalem ge nang achu sakkitewgai’ndibe gum ze Rom ge du nang sakkitew himgchang ra de lei,” ze kacheu de lei.

¹²Tingba dege Judame penui runne ’ngkim ne hedei lu ze Paulbe je penui tewchat mak tâne teu de teu mak, sak de sak mak bam ra kadeseu de lei.

¹³Zai mâ-kesiatew ra ’ngkim mâ-kahedeime bau ze hanghedai suadu kie lei.

¹⁴Zai chime ze tingkugechîngme benai gechîngme dage zuamie lu ze, “Anui â Paulbe je tewchat mak tâne mâ de ’ndâu mak ra hedeisiak lu de lei.

¹⁵Chidaze nang ne samrambeki gu ziemmena ramme je ngua lu ze pe tûdeu ze teleu’ntiagairabe helî gumbe gene ningnui tailam chunage peize pechu nguakeu ra sipai changmuiteipeu dage sam chitau gai be lau. Zai pa aige wang’nna gai makge pechu tewchat ra anui â kedâ kam lu la de lei,” ze kacheu de lei.

¹⁶Chunage Paulbe kinapui na rehang’mpeu zene penui pechu lîmkuabe tak ze chî lu de lei; dadege sipaime gu kerielung ’mbe Paulbe bambe ge pa gut lu ze pechu salia bei de lei.

¹⁷Dadege Paulbe ne sipai haîmuiteime ruage hangkat je kû lu ze, “Aipau rehang’mpeu je sipai changmuiteipeu tailam nguawang be lau; pechu mâ sam saliarabe pe dage la daseu,” ze acheu bei de lei.

¹⁸Chidadege â pa ne sipai changmuiteipeu tailam chi rehang’mpeu je nguagut lu ze pechu, “Ai rehang’mpeu ne ning dage mâ-ranggairabe sam pe dage bambe ziegene chipaupeu je ning dage nguawang ra kebangki ge bambepeu Paulbe ne achu lang gai lei,” acheu bei de lei.

¹⁹Chidadege sipai changmuiteipeu zene pe ba gene tei lu nguachâmpat lu reine ze pechu, “Nang achu saliarabe ze ’ndaikau lau?” ze ka’nneu lei.

²⁰Dadege pa ne, “Judame ne pechu mâ-mâ kedî’mmigairabe helî gumbe gene ’nchuamai dezai Paulbe je samrambeki ge nguakeu gai ra ningchu ’nneu ra penui â hesuî-hezuâ kam lu la de lei.

²¹Kane penui dage peipat kai se lau; penui ziemmena hanghedai suadu kie ze pechu lîmkua la de lei, pechu penui ne tewchat mak tâne teu de teu mak, sak de sak mak bam ra samhat ze deseu kam lu bamkuâ la daseu; zai chuna â penui â kedâ kam lu la de lei, ning dagene hatkaibe sam ngau ra kuârim la de lei,” ze acheu bei de lei.

²²Dadege sipai changmuiteipeu ne rehang’mpeu je tat ra ’mpat kai lu ze, “Mi-mi suage aipau sam ze a dage nang salia de lei be rang se lau,” ze rang sing gai bei de lei.

²³Chidadege sipai changmuiteipeu zene pe kangge sipai haîmuiteipeu kena je kû lu ze, “Sipaime haî na, zai hekunchingchuame sipai riaksena, zai sipai hengeupuame haî na ze nemai tingmuî ’nchetkak sekui ge Kaisaria ’mbe nguatat ra kedâ kam le lau.

²⁴Zai Paulbe hangge du hekun ramme pei be lau, pechu Phelikbe laksaibe tailam nguawang be lau,” ze acheu bei de lei.

²⁵Zai Phelikbe laksaibe hangge leisi aigum ze raw gai de lei:

²⁶“Klaudia Lisiabe dagene Phelikbe laksaibe yilangbe hangge rechâgaibe.

²⁷Aipaupeu je Judame ne nîm lu ze, tewchat ne ra tew de lei, I ne sipaime je ngua lu, penui tailam tat ze pechu meupat kai lu ze, ning tailam nguatat ra lang gai de lei, pa â Rom deina’mpeu lei be chî lu zeu.

²⁸Zai ’ndaitewbeibe ziegene pechu penui kesia’ndam gai mei be deu tak ze chîdesi ra hangge, penui gu samrambeki ge pechu I nguakeu gai de lei.

²⁹Zai pechu tewchat’nderabe benai banggai’nderabe hang pa tâtewmaube mâ de I ngau me lei, kane penui ne pechu saka’nsiabe â, penui gu hingde tedeu ge samka’neube runne lei.

³⁰Zai Judame ne pechu tewchat ne ra ’ngkim ne kahedei lei be I chî lu dege, luakatne pechu ning dage I lang gai de lei, pechu saka’nsiame je du pe peireige penui ’ndaikau kesiatew mei be ning dage salia ra sam rang gai lu zeu,” ze acheu zeu.

³¹Chigum ze sipaime ne penui je mâ-geteigaibeibe luigum ze Paulbe je muî’nchang-chang ngua lu ze, Antipatris penui chang de lei.

³²Zai bechai mai dege sipaime bau â chigene penui gu kerielung ’mbe helatwang dai di lei, sipaime hekunchingchuame bau zene Paulbe je peize nguatat ra sâu gai nan zeu.

³³Zai penui Kaisaria chang dege, laksaibe dage leisi rawlube bala gai de lei, zai Paulbe je du pe suage nguawang gai bei de lei.

³⁴Zai laksaibe ne chi leisi ze kiâ gai lu ze, Paulbe je châu ram’mpeu mei be ka’nneu de lei, pa â Kilikia ram’mpeu lei be pa chî lu dege,

³⁵pa ne, “Ning tûdeu â, ningchu kesia ’ndamgaime wangkeu dezaine ’ngking gu lei,” ze acheu bei de lei. Zai Herodbe gu heguang ki chi samrambeki-sîam ge kai lu ze, penui ne pechu hekêt-kaikua ra pa ne die gai bei de lei.