Read Zeme Naga TÂTEWBE 24 Bible Online

TÂTEWBE 24 - Zeme Naga bible

TÂTEWBE 24

¹Zai hezie mengeune châng dege, tingkudilangpeu, Ananiasbe ne gechîngme hanggesame benai hingde sam sachika’mmipeu pe ji, Tertullasbe je ngua lu ze wangkeu de lei, zai Paulbe peireige penui kesia’ndamgaibe deu ze laksaibe suage teipat kai de lei;

²zai Paulbe je samrambeki ge kû gai dege Tertullasbe ne aigum pechu kesia’ndamchu di de lei: “Yilangbe Phelikbe gau, nang bambe ziegene aitiege desieyibe anui ngau, zai nang ’nningkatinggeube ziegene anui zat hangge tâ ’mpuî ramme teleurechigaibe lat kai ze,

³’mpuî leine ge zai pebâm’nsangne ge airamme anui suiyibe ne pui ze ka’nchâ de lei.

⁴Kane ningchu peize gîngtie makse, nang helêurau ze, anui sam keduîne ’ngking gai ra ningchu I kiam lei.

⁵Aipaupeu â miramme je tewkeleuchipeu zai kedeirei leine ge Judame ruage tewkeleurua ze bambepeu zai Nazarethme bau ruage du pa ne pemuitew de lei be anui ngau lu de lei.

⁶Pa ne kellumki ze du tewhebâ ra tew de lei, kane anui ne pechu nîm ’ndi de lei.

⁷Kane sipai changmuiteipeu, Lisiabe ne wang lu, ’nchi-chine anui ba gene pechu teitat ’ndi lei.

⁸Pechu kesia’ndamgaime bau je ning dage wang ra die gai zeu. Ning runne ne pechu sam’nneu gai dezai, anui ne pechu kesia’ndamgaibe ramme nang chî kam dui lei,” ze kacheu de lei.

⁹Judame ne du pechu kesia’ndamgaibe ramme ze gesang lei, ze penui lung hezuâ kam gai lei.

¹⁰Laksaibe ne Paulbe je sam sa ra rang gai ze, pe ba kezap kai bei dege, Paulbe ne kak ze: “Nang ne patingkum misongga ze aipau zatme peireige samram ze bam bam lei be I chî lu ze ning suage I sing ne achu gube sam sa ra I a lung suiyi lei.

¹¹Aize nang ne ’mmêt dui lei, Jerusalem ’mbe I kellum ra hangbe mai gene nemai riâ ge hezie kereu ze kena suadu kie ra mak lei be zeu;

¹²zai I ne kellumki ge mei nune ka’nduibeki ramme ge mei, nune namdi ge mei ze mi-mige peireige samtugaibe mei nune baudime je tewkeleu gai mei be penui ne achu ngaudau me lei.

¹³Penui ne a peireige kesia’ndamgaibe ramme deu ge du ning dage gesang peling lei be penui teiliachi lak lei.

¹⁴Kane aize ning dage I ralia’nchichiak kai lei, chi penui ne kemaube kacheube, chi ’Mpui sie luigum I â hingde ne kaikeugai’ndibe ge mei nune kemeume gu sam mei be ge ’nnum’mmi ze anui peume Rapeu je kellum ze bam lei,

¹⁵pelingtewme benai tewmakme ’nteumena ne kechaibe gene chu dai kam gu lei be, chi penui ne du ’nnum’mmi ze bambe ge I â Hera gene heguîkua zeu.

¹⁶Chipauziegene Hera lam ge benai ziemmena lam ge keyi-kesia chibe tak ze ’nchichiak ze bam ra pehî’nsangne ge I a laîkai ze tew lei.

¹⁷Chunage patingkum misongga tattibe chângge kelaksiame dage ’ngngâ ra rangkâng benai misuiyibe kela ramme I pungwang de lei.

¹⁸Chigum kellumki ge I ’nggua ze besie luigumbe gene achu huika’nchibe luage penui ne achu ngau lu de lei; mâ de baudime ne tewkakeleube bam mak zeu. Kane Asia gene Judame hanggesame—

¹⁹aige ningnui masuage bam ra yi lei, penui ne a peireige ’nningka’nsiabe lazai â chize chau’ngkui gai ra hangge zeu.

²⁰Makchai aime ne I samrambeki suage sapbe luage ’ndaikau mâ-tewmaugaibe penui ngau mei be ze penui runne peize sa lau,

²¹aipau sam kie kat runne penui suage I sabe luage I ka’nrung de lei, ‘Chize â, nemai ge chaidime ringchukadaibe deu hanggene ningnui suage achu samram gai lei,’ zeu,” ze kacheu de lei.

²²Kane Phelikbe â, chi ’Mpui tedeu ge pa ne chîdesi kam lu dadege, “Sipai changmuiteipeu Lisiabe wangkeu dezai ningnui gu hetû ze I râm gai gu lei,” acheu sa ze pa ne penui je tew’nsâu gai ’ndi de lei.

²³Zai pa ne sipai haîmuiteipeu je Paulbe je hekêt-kai ze reî ra, zai lungzeunetewbe gum ze bam ra, zai pe kangme ne pechu ’ngkiâmie ze pa ka’nnangbe leine pei ra hangge nam me ra hang die gai bei de lei.

²⁴Bechâng mâtiege makse, Phelikbe ne pe nâu Drusillale je ngua lu wang gai lei, chi Juda’mpui zeu; zai Paulbe je pa ne kû gai bei ze Isua Krista je keneibe rasam Paulbe ne saliabe ka’ngking de lei.

²⁵Paulbe ne kapelingbe, zai mi runne mi je reîchibe zai samrambe wangchangrabe deu ge salia bei dege, Phelikbe â hing di ze, “Chuna hangge nang tat dai zu lau, pedâuyibe I ngau dezai ningchu I kû gai dai gu lei,” kacheu de lei.

²⁶Chipau peireige du Paulbe ne pechu rangkâng pei ra pa kaheguî lei. Chidadege pechu wang ra kû gai ka’nsui lei zai pechu ’mpau bam bam de lei.

²⁷Kane kum na ’ntuadibe chângge, Porkia Phestabe ne Phelikbe kelei ge laksaibe chang de lei; dadege Phelikbe Judame suî tew’mmigaineibe ziegene Paulbe je kebangki ge bangdiak kai de lei.