Read Zeme Naga TÂTEWBE 25 Bible Online

TÂTEWBE 25 - Zeme Naga bible

TÂTEWBE 25

¹Chunage Phestabe pa samrambe heram ge wangchang lu, hezie kechumne châng dege Kaisaria gene Jerusalem ’mbe pa hang di de lei.

²Dadege tingkugechîngme benai Judame ruage besuitewme ramme Paulbe siabe rasam pechu pau gai de lei; zai penui ne pechu getu gai ze,

³’mpuîki gene pechu lîmkua lu tewchat ra penui heka ze peize chipaupeu je Jerusalem ’mbe lang gai ra pechu kiâm de lei.

⁴Kane Phestabe ne penui je, Paulbe je â kebangki ge reîgit ze lamui lei, zai I du mâtiege makse Kaisaria ’mbe tat ra ka’nning lei.

⁵Chidaze, “Ningnui ruage ziemmena pecheuchime je peize achu nguakeu lau, zai chige pa ne tâumakbe bam zai â peize penui ne pechu kesiachau gai ra hangge zeu,” ze pa kacheu de lei.

⁶Phestabe penui ruage hezie desatne mei, hezie kereune mei suadu kie ze pa bam gai lu ze, Kaisaria ’mbe wangkeu de lei; zai bechai mai dege samrambe bâm ge pa ’ntau lu ze Paulbe je nguapat kai ra hang samdie gai bei de lei.

⁷Zai pa wang dege Jerusalem gene tattime ne pechu sap’mpuî-plui lu ze penui ne du ’nningchilakbe mâ-mâ gechukbe sam ramme ne pechu kechingka’nrui de lei.

⁸Paulbe pe runne ne pechu sagu ze, “I â Judame gu hingde peireige du zai kellumki peireige du zai Kaisarbe peireige du kesiabe mâ de tew me lei,” ze kacheu de lei.

⁹Kane Phestabe Judame suitew’mmi nei dege Paulbe je, “Jerusalem ’mbe nang hang nei mei, chigene aipau deu ramme a suagene hekî dai ra hangge zeu?” ze kacheu de lei.

¹⁰Kane Paulbe ne, “Kaisarbe gu samrambe bâm, a tûdeu hekî gai ra yibe bâm ge I sa la lei; nang ne chî’mmi ze bambe gum ze I ne Judame hangge kesiabe tâ mâ de tew gai me lei.

¹¹I ne tâtewmaube kau chang ze, chairabe hang tâtew gai ’ndizai â kechai’nreipat ra I peu me lei; kane a peireige aime bau ne kesia’ndamgaibe ge mâ-peling peupat lak zai â, mi-mige ne achu penui ba ge peigaichi lak lei. Kaisarbe dage I ne kiam lei,” kacheu de lei.

¹²Chidadege Phestabe ne pe gu samrambeki ge bamme dage ’mpauhelak lu dege acheu kak ze, “Kaisarbe dage nang ne kiam de lei; Kaisarbe tailam nang tat ra lei,” ze kacheu de lei.

¹³Chunage bechâng bamkenak kai dege, heguang Agrippabe benai Bernikele Phestabe je ’nchâ ze ngauhedau gai ra zuamiechang de lei.

¹⁴Zai chige hezie misongga ze bam gai dadege Phestabe ne heguang suage Paulbe tûdeu sachu ze, “Mige hangkat bang’ndibe kau, Phelikbe ne sâudiakkaipeu la lei;

¹⁵zai Jerusalem ge I bam lage tingkugechîngme benai gechîngme ne a dage pe rasam chîchang gai ze, pechu chai ra samram gai ra a dage penui kie lei.

¹⁶I ne penui je kak ze, Romme gu hingde ge pe peireige kesia’ndamgaipeu ze pechu kesia’ndamgaime je heju ne heju hedau gai ze, pe peireige kesia’ndamgaibe sam ramme ze pechu sagube sam sa ra pedâuyibe pei mak tâne â, mige ne pechu kesia’ndamgaibe luî ze tew’ngkuigaichi lak lei ze, acheu bei de lei.

¹⁷Chipauziegene penui aige wang’ndui gai dege, I ne a mintie mak ze bechai mai ge samrambe bâm ge ’ntau gai lu chipaupeu je nguagut ra die gai bei de lei.

¹⁸Kesiachaugaime ramme zuachu gai dege pe tûdeu ge penui ne mâ-mâ-kesiabe ramme sapat kai ra mi ’nnumgaibe ramme ze â sapat suadu mak lei;

¹⁹kane penui ne pe dage tube ze â, penui râsie gu mâ gechukbe deu lam ge, zai chaidipeu, chi Isua kacheupeu deu gene de lei, kane Paulbe ne rangliasinggaibe tak ge â pa ze chai me lei, kacheupeu zeu.

²⁰Chidadege I airamme tedeu ge râm ra chî ta di ze, Jerusalem namdi gene airamme hekî ra hang nei gu mei ze Paulbe je I ’nneu gai de lei.

²¹Kane Paulbe ne heguang dilangpeu dagene samram gai be ra kie bei dege, chize ne pechu Kaisarbe tailam ’mpat kai ra chang mak tâne â, pechu hekêt kai ze bam ra hangge I ne die gai bei de lei,” kacheu de lei.

²²Dadege Agrippabe ne Phestabe je, “I du chipaupeu ne samsabe ’ngking gai nei bam de lei,” acheu bei de lei. Phestabe ne. “’Nchuamai dezai nang pe sam seutâu gu lei,” ze kacheu de lei.

²³Bechaibe mai dege â, Agrippa benai Bernikele ze paîni pengêudibe kai lu ze, baudime ka’nduibeki ge sipaime changmuiteime benai namdi ge kanguame besuitewme je ngua lu ze gut ti de lei. Chige Paulbe je teigut ra Phestabe ne die gai bei de lei.

²⁴Zai Phestabe ne, “Heguang Agrippabe benai chuna aige bamme gau, aige ningnui ngaupeu deu ge Judame leine ne Jerusalem ge benai aige bamme ne peize pa ring ta de ra hangge ’nrung ze a dage kiewang de lei.

²⁵Chaikezeirabe tâ pa ne mâ de tâtew gai me lei be I ngaupat lei; zai pa ne heguang dilangpeu dage kiambe luigum ze pa tat ra I ne pechu lun gai ra ’nning gai de lei.

²⁶Kane pe tûdeu rasam pa’nchui singbe bâm â heguangdilangpeu dage I raw gai ra mâ de ga lei. Chidaze pechu ningnui suage benai nang heguang Agrippa suage I nguapat kai de lei, pechu sam kedî kam dezai, mâ sam rawrabe I chîpat le ra hangge zeu.

²⁷Bang’ndibe kau je pa tewmaube ’nchuisingbe mâ de teilia’nchi mak ze langgairabe ze â a hangge betâu mak ra chang gu dadegeu,” kacheu de lei.