Read Zeme Naga TÂTEWBE 3 Bible Online

TÂTEWBE 3 - Zeme Naga bible

TÂTEWBE 3

¹Chunage Peterbe benai Johanbe kellumki ’mbe ’nchetkak kechum chi kakellumbe hî ge hang di de lei.

²Zai kellumki kemuiki, Peluiyibe kacheube ge hangkat pe pî sia ze lungkeupeu je kellumki ge zuawangme dagene peize ka’nggiabe-kela kie ra ziemmena ramme ne nai’nsangne pechu puawang ze chige kai de lei.

³Peterbe benai Johanbe kellumki ’mbe gut ra heka ze bambe pa ngau lu ze penai dagene ka’nggiabe kela kie lei.

⁴Dadege Peterbe benai Johanbe ne pechu piereking lu, “Anai je pie gai lau,” ze acheu bei de lei.

⁵Dadege penai je pa piereking gai ze penai dagene mâ-ngau ra pa kaheguî de lei.

⁶Kane Peterbe ne, “A dage gepût zai gechâk mâ de ga lei, kane a dage bambe ze ningchu I pei ra de lei; Isua Nazareth’mpeu ji gene nang tatchi de zu lau,” ze acheu bei de lei.

⁷Chidadege pa ne pe ba hezat’mbia ne tei lu, pechu tei’nsapchu gai bei de lei; dadege luakatne pe pî benai pe pîkemikra ramme peranchiwang di de lei.

⁸Dadege pa ’mbuplepchu ze sap kai lu, tatrua ze kellumki ’mbe penai je nguagut lu Hera je toa ze, ’mbup ze tatrua ze bam di de lei.

⁹Zai ziemmena ’nteumena ne pa tatrua ze Hera je toa ze bambe ngau lu,

¹⁰kellumki gu Peluiyibe Kemui kacheube ge mâkieteu ze ’ntaubambepeu lei be penui chî di de lei; pe pumgîm ge mâ-wangchangbe ze penui ’nningdaulaklu-lu bam di de lei.

¹¹Pa ne Peterbe benai Johanbe je ’ngguigit lu ze bambe luage, baudime ne ningdaulak ti ze, Solomonbe gu heki liâmpatkaibe geze penui tailam pakwang wak lei.

¹²Zai Peterbe ne chize ngau lu dege, penui je, “Israelme nung gau, ’ndaitew ze aige ze ningnui ’nningdaulak lau, zai ’ndaitew ze anai je ningnui pierim bam lau, anai gu rezie ne mei nune anai ne keneibe bambeibe ne pechu tatchi ra tewgaibeibe ria gum zeu?

¹³Abrahambe, Isaakbe zai Jakobbe Rapeu, anui pau-paime Rapeu ne pe guâ ka’ngguapeu Isua ngeutew’ndi gai bei de lei, Pilatbe ne pechu ’mpat kai ra tewbe luage ningnui ne pechu chai ra peipat kai ze Pilatbe masua sing gene ningnui ne pechu ’ngkimgai’ndipeu zeu.

¹⁴Kane ningnui ne Ka’nchibe Katelingpeu je ’ngkim nan ze kegîbe kau je ningnui dage peipat kai ra kie ’ndi de lei,

¹⁵zai keringbe bangpui, kechaibe gene Hera ne kuakchugaibeipeu je gîchat ’ndi de lei. Aige ze anui ne sakkitewme kam de lei.

¹⁶Pe ji ge keneibe gene, pe ji gene aipaupeu ningnui ne ngau zai chîbepeu je tewperanchi gai bei de lei; Isua dagene chi keneibe ngaube zene ningnui ’nteumena bambe masua sing gene aipaupeu je pe pumsak yi-desang ze bam ra tew gai bei de lei.

¹⁷“Chunage a puiname gau, aize I chî lei, ningnui chimakbe gene tâtew gai ’ndi de lei, ningnui gu samramme ne tew gum zeu.

¹⁸(Hera) Pe gu Krista â hereulie gu lei ze kemeume ramme mui gene Hera ne rang’ntua gai ’ndi gum ze, pa ne chigum ze tewpui gai de lei.

¹⁹Chidaze heliwang ze, ’nreiwang dai zu lau, dezai ningnui gu hemui ramme nuitua gai be ra, Hera bambe bâm gene Herui lam ge tewrechigairabe ting peize wangchang ra,

²⁰zai Krista ningnui hangge kelânggailupeu Isua je pa ne peize lang gai ra hangge zeu,

²¹’ndâ gene kemeume ka’nchime mui gene Hera ne sagai’ndibe leine tew’ntipkairabe ting wangchang mak tâne tinggîm ge bam-bamderapeu zeu.

²²Mosabe ne, ‘Tingwang Hera ne ningnui puiname ruagene kemeu’mpeu hangkat je achu gum ze teichu gai gu lei. Ningnui je pa ne kerangbe leine ge pe kuâ ningnui ’ngking ra de lei.

²³Mi-mige de chi kemeu’mpeu kuâ ’ngkingmakbe kau je â, Hera gu baudime ruagene deî’ngga ne ra lei,’ kacheu de lei.

²⁴Zai kemeume Samuelbe ting gene patme benai bechâng dezai patme, kemeu sam paugailume leine ne chuna ting ge du pau de lei.

²⁵Ningnui â kemeume name zai Hera ne ningnui pau-paime dage samhatkai’ndime name de lei, chi Abrahambe dage salia be, ‘Zai ning gu rehei chudairabe gene kedeirei kelak leine je ’nnam gai bu lei,’ ze kacheube zeu.

²⁶Hera ne pe guâ ka’ngguapeu je zuchu gai lu, ningnui dage pechu lang gai raî de lei, ningnui gu helungriaksiabe tak ramme gene ningnui ’nteumena je tei’nreiwang gai lu ’nnam gai ra hangge zeu,” ze kacheu de lei.