Read Zeme Naga TÂTEWBE 4 Bible Online

TÂTEWBE 4 - Zeme Naga bible

TÂTEWBE 4

¹Zai penai ne baudime dage sam sa ze bambe luage tingkume zai kellumki gu pemuitewpeu zai Saddusime penai tailam wang lu,

²penai ne ziemmename je mâ-geteilia ze Isua kechaibe gene ringchukadaibe rasam pauruabeibe ziegene penai je tewkakeleu de lei.

³Zai penui ne penai je nîm lu ze, hegîdibe ziegene hechua riâ penai je bangchang gai ’ndi de lei.

⁴Kane chi sam seulume gekieme ne ’nnumka’mmi lei; zai ’nnum’mmidime penui riak â chang mengeu gum lei.

⁵Bechaibe mai ge penui gu samramme zai gechîngme zai leisirawme Jerusalem ge zuawang’ndui gai de lei,

⁶tingkudilangpeu Annasbe zai Kaiaphabe, Johanbe, Alekzandarbe zai tingkudilangpeu kibaume je ngua lu zeu.

⁷Zai penui ne penai je sûngngang ge tei’nsap kai lu dege mâ-kedî ze, “’Ndaikau gu rezie gene zai ’ndaikau ji gene ningnai aize tew lau?” ze kacheu de lei.

⁸Chidadege Peterbe Herui Ka’nchibe ne pui lu ze penui je, “Baudime gu samramme gechîngme gau,

⁹chuakanipeu hangkat peireige tâ-yibe tewgaibeibe deu ge ’ndaikau ne aipaupeu je tew’mmi gai bei lau, ze anai je ningnui ne kedî dizai â

¹⁰chize ningnui ’nteumena dage benai Israelme leine dage chiliâ gai be ra hangge, chi ningnui ne giagai’ndibe Hera ne kechaibe gene kuakchugaibeipeu, Nazareth’mpeu Isua Krista ziegene aipaupeu ze yi ze ningnui suage sap kai de lei.

¹¹Aipaupeu ze â ningnui hekitewme ne tuâpatbe chukâng de lei, kane chize ne pemikchukâng dilangbe chang di de lei, kacheube ze de lei.

¹²Zai tewka’nringbe â, mi-mi dagene ngau ra ga lei, tingkehube kangge kêdabe ji gene anui je tew’nring gai be ra hangge ziemmename dage peigaibe mâ de ga lei,” ze acheu bei de lei.

¹³Chunage Peterbe benai Johanbe helungdibe tak, zai leisigetei mak, mâ-luîmakbe kau lei be penui chî lu dege penui ’nningdaulak ti de lei; zai Isua dage penai bamdibe tak penui ngauchi di de lei.

¹⁴Kane chi hangkat tew’mmigaibeipeu ze penui ruage sapbambe penui ngau lu ze penui mâ de ki’nsiadaichi lak ti de lei.

¹⁵Kane samrambeki gene penai je hela ’mbia tat ra die gai lu dege penui karai tu dai ze,

¹⁶“Aime hangna peireige anui ’ndaikau tew gai ra lau? ze kacheu de lei. Jerusalem ge bamme leine ne aipau tâningdaulakbe penai tewbe â chî’nchichiak la daze anui ne mâ de ’ngkimchi lak te lei.

¹⁷Kane aipau sam ze ziemmename ne peize chi’ngkie me ra hangge chuna gene seu ze aipau ji gene mâtew-tewsede peize sam sa dai me ra hang penai je anui ne rang sing gai be kei lei,” ze penui kacheu de lei.

¹⁸Chigum ze penai je penui ne kû lu ze, Isua ji gene sam sa dai me ra, zai geteilia dai me ra hang die sing gai bei de lei.

¹⁹Kane Peterbe benai Johanbe ne penui je kak ze, “Hera mikngau ge Hera kuâ ’ngking ra sua â, ningnui kuâ lu ra ’nzei gu mei be ze ningnui ne samram gai sing ra lei;

²⁰anai â anai ngaulube benai chîlube sa mak ze bamchi lak daseu,” ze acheu bei de lei.

²¹Zai penai je penui ne ’ngngiam ze kedunggetie gai dai lu dege, penai je ’mpat kai bei de lei, baudime bambeibe ziegene penai je tewsârabe ’mpuî peulak ti zeu; ziemmename ’nteumena ne aipau tâwangchangbe ziegene Hera je toa ze bam kam di dadegeu.

²²Zai ’nningdaulakbe tâ tewbe ne tew’mmigaibeipeu ze pe tingkum hedai suadu kie di dadegeu.

²³Penai je ’mpat kai bei dege, penai kangme tailam penai tat lu ze tingkugechîngme benai gechîngme ne penai dage mâ-sam saliabe ramme pauliâ kam gai bei de lei.

²⁴Zai chize penui seu lu dege, penui ’nteumena muikat ne penui kuâ’nrung ze Hera dage acheusa ze, “Mâgetaleine tewchiduibe Tingwang, ting benai kedei zai sungkling zai chige kebambe leine ’ndamgaipeu,

²⁵ning guâ ka’ngguapeu anui peu Dabidbe mui gene Herui Ka’nchibe ne acheu sa gai ze, ‘’Ndaitew ze Jentailme penui lumpum, zai hezat ramme mêruang ramme ge ka’nning lau?

²⁶Kedeirei heguangme ramme ne penui runne penui gu hereipuâ kaizun gai de lei, zai samramme ramme ne Tingwang benai pe gu ’Nnukkai’ndipeu peireige ’nggi ze wang’ndui gu de lei,’ kacheube ze—

²⁷gesangsing ne aipau namdi ge Herodbe benai Pontia Pilatbe ne Jentailme benai Israelme baudime je ngua lu nang ne ’Nnukkai’ndipeu, ning gua ka’ngguapeu ka’nchipeu Isua je ’nggi ze wang’ndui gai de lei,

²⁸ning ba ne benai nang ’nninggaibe gene mâ-mâ wangchang ra kaikua’ndibe leine wangchang gai ra tew gai ra hangge zeu.

²⁹Zai chunage Tingwang gau, penui ne kakedungbe ramme pie gai ni lau, zai ning guâ ka’ngguame ramme ne ning sam ze kuugiereu ze sachi le ra pei gai lau,

³⁰tew’mmi ra nang ne ning ba getuapat kai ze bambe lua, zai ning guâ ka’ngguapeu ka’nchipeu Isua ji gene ka’nchetbe ningdaulakbe ramme benai mâ-’nningdaulakbe ramme tewgaibe luage zeu,” kacheu de lei.

³¹Zai penui kellum kam gai dege wangkanduibe bâm ze gechuîka’ngngai de lei; zai penui ’nteumena Herui Ka’nchibe ne puigit lu ze, kuugiereu ze Hera gu sam penui sa de lei.

³²Chunage keneime bau ze â lungkat, zai suîkat ze bam lei, penui ruage mige de pe gu kebambe ze, A gu lei, ze acheu mak lei, kane mâgetaleine teiherua ze kat ze tei bam lei.

³³Heguang Isua chukadaibe rasam ze apostolme ne reziechibe gene salia de lei, zai ka’nggiabe misongga ze penui ’nteumena peireige ngau ze bam de lei.

³⁴Zai penui ruage kegabe kau mî de ga lei, helu ramme mei, nu heki ramme mei, kebam-bambe zua lu ze, chi zualube mî ze teiwang lu,

³⁵apostolme pîkangge kai de lei; zai penui ruage ka’nnang-nangme hangge ’nzi ze bam lei.

³⁶Zai Josepbe Sipra keloa ge Lebi’mpeu apostolme ne pe ji hangge Barnaba ze ’ntakkaipeu (chize helungtew’ndigaibe na kacheube)

³⁷aipaupeu ze pe gu helu zua lei, zai pa ne rangkâng teiwang ze apostolme pîkangge kai bei de lei.