Read Zeme Naga TÂTEWBE 5 Bible Online

TÂTEWBE 5 - Zeme Naga bible

TÂTEWBE 5

¹Kane hangkat pe ji Ananiasbe, pa ne pe nâu Sapphirale je ngua lu helu kat zua de lei,

²zai pe nâu gechîbe gene chi zuapatlube rangkâng lupat kai nan ze kecheîne runne teiwang ze apostolme pîkang ge kai bei lei.

³Kane Peterbe ne, “Ananiasbai ’ndaitew ze Satan ne ning lung ge puigit lu, Herui Ka’nchibe je nang choa ze, ning gu helu mî gêsa â tei dai lu lau?

⁴Zua mak ’ngkage chi helu ze ning gu mak ti lau? Zai nang chize zualube chângge du pelane ning gu kam mak ti lau? ’Ndaigumbe tak gene aigum tew ra ning lung ge nang ka’nning lau? Ziemmename je nang choa mak ze, kane Hera je nang choa de lei,” ze acheu bei de lei.

⁵Zai aipau sam ramme ze Ananiasbe seugap lu dege pa kâukeu ze chai di de lei. Dadege chi geseume leine dage hingka-desangbe bam di de lei.

⁶Rehangme ne zuachu lu, pe pum ze paî ne lim gai lu, pechu puapat ze bai gai ’ndi de lei.

⁷Zai ’nchetkak kechum riâ gum bam gai dege, pe nâu gut lei, mâ-mâ tâwangchangbe tak ze pa â mâ de chî mak zeu.

⁸Dadege Peterbe ne pechu, “Ningnai gu kedei zuabe mî aize pelane de mei be achu rang lau,” acheu bei de lei. Dadege pa ne “Eu lei, aize pelane de lei,” kacheu de lei.

⁹Dadege Peterbe ne pechu, “’Ndaitew ze Tingwang gu Herui je kedak ra ningnai lung hezuâ gai lau? Mi hingkadesangbe de lei, ning napeu je baime pî ramme chuna kemuiki ge wangchang dai lamui de lei, zai ningchu penui ne puapat kai gu de lei,” ze acheu bei de lei.

¹⁰Luakat ne Peterbe pîkangge pa kâukeu gai lu, chai di de lei. Rehangme bau gut dege pa chaidibe ngau de lei, dadege penui ne pechu puapat lu ze pe napeu taige bai gai bei de lei.

¹¹Zai herakiangna leine ge benai airamme seulume leine dage hing-desang ze bam di de lei.

¹²Chunage ziemmename ruage apostolme ne ka’nchetbe ramme benai ’nningdaulakbe tâ ramme misongga tew ze bam de lei. Zai penui ’nteumena Solomonbe gu heki liâmpatkaibe kedibe ge wangherua ze bam de lei.

¹³Ziemmename ramme ne penui runne penui je ’nning’nchei gai lu ze penui ruage herua gai ra ’nningpat lak ze bam lei, kane chi ziemmena ramme ne penui je ’nning’nchâ gai ze bam lei.

¹⁴Zai keneime ramme tingtie bambe peirei gene baudime ’mpuimi benai ’mpeumi ramme Tingwang dage heruagaisuâ ze bam di de lei,

¹⁵chidadege â ’nrâteuneume je ’mpuîki ge puapat lu, jeî ge benai paikam ge ’njei gai bei de lei. Peterbe tatpat dezai penui peireige peize pe gu kezui deîtau gai ra hanggeneu.

¹⁶Baudime Jerusalem huâzie ge namdi ramme gene hereu-teuneume benai herui kahebâbe ramme ne tewhereu ze bamme je nguawang’ndui gai bei ze penui je tew’mmi kam gai bei de lei.

¹⁷Chidadege tingkudilangpeu ne hemimeube ne pui lu zuachu ze, pe kumme Saddusime pe dage bamme leine je ngua lu,

¹⁸apostolme je nîm lu ’nteumena je banggaibe kebangki ge bang gai ’ndi de lei.

¹⁹Kane tingmuî ge Tingwang gu angel’mpeu ne kebangki ’ngkam lat lu ze penui je nguapat lu penui je

²⁰“Tat ze kellumki ge sap lu, baudime dage aipau keringbe sam ramme ze sa gai lau,” ze kacheu de lei.

²¹Zai penui ne aize seu lu tingbapat dadege kellumki ge penui gut lu ze, mâ-geteilia gai de lei. Chunage tingkudilangpeu ne pe dage bamme ’nteumena je ngua lu wang ze samrambeki benai Israelme gu samrambe bâm dilangbe kena ge kûwangherua lu ze penui je nguapat ra kebangki ’mbe ziemmena je lang gai bei de lei.

²²Kane saibe ramme kebangki ge wangchang dege chige penui je ngaudau mak lei, chidadege penui wang dai lu pauliâ ze,

²³“Kebangki â hela ’mbene kainamting nan ze kemuiki ge hekêtkaipeu saplaleube anui ngau de lei, kane anui chize latgut dege mî je de anui ngaudau mak lei,” ze kacheu de lei.

²⁴Chunage kellumki gu pemuitewpeu benai tingkugechîngme ne aipau sam ramme seu lu dege, apostolme peireige penui ’nninghereu ze aize ’ndaikau chang ra se lau ze penui ’nningchi lak ti de lei.

²⁵Dadege hangkat ne wang lu penui dage pau gai ze, “Ningnui ne kebangki ge banggaime bau ze â kellumki ge sap lu ze, baudime je mâ-geteilia lamui lei,” ze kacheu de lei.

²⁶Chidadege kellumki gu pemuitewpeu ne saibe ramme je ngua lu tat ze penui je nguawang gai bei de lei, kane baudime ne penui je tingchu ne tuâ ra hingbe ziegene apostolme je tewkeleu gai mak tai lei.

²⁷Zai apostolme je penui ne nguagut kai dege samrambeki suage kenieme je tei’nsap kai de lei. Zai tingkudilangpeu ne penui je mâ-’nneu ze,

²⁸“Aipau ji gene mâ-geteilia mak ra ningnui je namting gai de lei, kane ningnui mâ-geteiliabe ne Jerusalem naîting gai di de lei, zai aipaupeu jai ze anui peireige ningnui teiwang gai ra tew dezei lau!” ze kacheu de lei.

²⁹Kane Peterbe benai apostolme ne kak ze, “Ziemmename kuâ je sua â Hera kuâ ze anui pheu himchang gu lei.

³⁰Ningnui ne hingbang ge keî’nchie gai lu tewchat’ndipeu Isua je nui pau-paime Rapeu ne teichu gai bei de lei.

³¹Hera ne pechu â Kanguapeu zai Tewka’nringpeu hangge pa hezat’mbia ba ge teichu’ngngu gai ’nde lei, Israelme je helungkahelibe pei gai ra, zai penui gu hemui kelunbe pei gai ra hangge zeu.

³²Zai airamme leine anui ne sakki tewme kam de lei, chigum ze Hera ne pe kuâpheume leine dage peigaibe, chi Herui Ka’nchibe zene du sakkitew de lei,” kacheu de lei.

³³Aize penui seu lu dege, penui lumpum-desang di ze, penui je tewchat nei di de lei.

³⁴Kane samrambeki ge hangkat Pharisai’mpeu Gamalielbe, hingde geteiliapeu, ’nteumena ne pechu hengêutewka’ndipeu ne sapchu lu ze apostolme bau je luakat hang hela ge teipat kai ra samdie gai bei de lei.

³⁵Zai pa ne penui je, “Israelme nung gau, aime peireige ningnui tâtewbe tak ze ’ntîng le lau.

³⁶Besua’ngka ge Theudabe pe runne pechu kedibe kau hangkat lei ze ’nning gai lu zuachu lei, zai pe chaisuime du haî medai gum bam lei; kane pechu gîchat ’ndi lei. Zai pe chaisuime je tewtimrarip kai bei ze ’ngga gai di de lei.

³⁷Pe chângge hepiaurawbe ting ge Galili’mpeu hangkat Judabe zuachu ze bam lei, zai ziemmena misonggame je pe chai sui ra tew gai bei de lei; pa du ga gai di de lei, zai pe chaisuime leine je tewtimrarip kai bei de lei.

³⁸Chigum ze nemai deu ge ningnui je I rang lei, aime dagene ningnui ’mbia de lau, penui je sâu gai be lau; ai penui tâtew ra kateleube benai penui tâtewbe tak ze ziemmename gu lei zai â chize kau gu lei;

³⁹kane aize Hera gu lei zai â ningnui ne aime je tewkauchi lak lei. Makte ningnui ne Hera je ka’nggime chang-laleu gu lei!” ze kacheu de lei.

⁴⁰Chidadege â Gamalielbe ne kerangbe ze penui lu de lei, zai apostolme je penui kûgut kai lu dege penui je lak kai lu Isua ji gene sam sarua ta ra die gai lu penui je ’mpat kai bei de lei.

⁴¹Chidadege â samrambeki gene zuapat lu ze Krista ji gene tewkengamgaibe lie ra penui je kebuibe hang riam gai bei ze penui suiyi ze bam di de lei.

⁴²Zai nai’nsangne kellumki ge benai kilûng ge Isua â Krista lei be ze penui sau mak ze geteilia ze paurua bam di de lei.