Read Zeme Naga TÂTEWBE 6 Bible Online

TÂTEWBE 6 - Zeme Naga bible

TÂTEWBE 6

¹Chunage aigumbe kenieme riak pung-sang-pung ze bambe ting ge Grik lad teime ne Hebraime peireige sam katelumbe bam di de lei, penui ne patingnai’nsangne mâ merua ka’nzibe ge penui gu kemîpuime ramme je mâ-hang chakkaimakbe ziegeneu.

²Chidadege kenieme hangkereu-ze-kename ne keneime baudime je kûwang’ndui lu acheu sa ze, “Hera gu sam pauruabe tâ sâu nan ze keteu-kesak lam ge anui ne ’ngguahâ di ze bam ra â yi me lei.

³Chidaze mi puiname gau, ningnui ruage Herui Ka’nchibe benai kaningchingbe ne puime, penui ’nsâyime hangsename je kelâng le lau, aipau tâ hangge anui ne sum gai ra hangge zeu.

⁴Kane anui â kakellumbe benai sam pauruabe tâ ge anui runne anui lung pei gai ra de lei,” ze kacheu de lei.

⁵Zai kenieme ne rangbe sam ze baudime ne ’nchâ di de lei, dadege Stephenbe, chi keneibe benai Herui Ka’nchibe ne pui-peu, zai Philipbe, Prokorasbe, Nikanorbe, Timonbe, Parmenasbe, zai Nikolasbe, Antiok’mpeu Juda sie ge guttipeu je penui kelâng gai de lei.

⁶Aime je penui ne kenieme suage teiwang ze kai bei de lei, dadege penui peireige kenieme ne kellum gai ze, penui ba die gai de lei.

⁷Dadege â Hera gu sam ze pungbi-bi ze bam lei; zai Jerusalem namdi ge kenieme riak pung-sang-pung di de lei, zai tingkume misongga ze keneibe-sie ge tatchi ze bam de lei.

⁸Zai Stephenbe ne ka’nggiabe benai tâtewchibe ne pui lu ze ziemmename ruage tâningdaulakbe ramme benai ka’nchetbe ramme tew gai bei de lei.

⁹Kane kebang gene ripatkaibeime ka’nduibeki ge bamme bau, (acheu ze kûgaime) penui ruage, hanggesame â Kurinime benai Alekzandriame zai hanggesame â, Kilikiaram benai Asiaram ge bamme penui ne Stephenbe je hegeichu di de lei.

¹⁰Kane Herui benai kaningchingbe ne pa sam sapatbe ze penui geikâulak tai lei.

¹¹Chidadege ’ngkim ne miramme je kelutew gai bei de lei, “Mosabe benai Hera je pa ne sakahebâbe sam ramme anui seu lei,” ze acheu ra hangge zeu.

¹²Dadege penui ne baudime zai gechîngme zai leisirawme je gecheulum gai lu pe dage penui wang lu ze pechu nîm lu zai ret lu samrambeki suage teiwang gai ze,

¹³karasa gu sakki ramme, “Aipaupeu zene ai ka’nchibe bâm benai hingde peireige saka’nsiabe sam mâdau de sasau me lei;

¹⁴ai Nazareth’mpeu Isua ne aipau bâm ze tew’nsia gai gu lei, zai anui je Mosabe ne mi-kisie hang peibe ze tewkedet kai gu lei ze kacheube anui seu de lei,” ze karasa ne acheu same je puîwang gai de lei.

¹⁵Zai samrambeki ge bamme leine ne Stephenbe je piereking bambe lua Stephenbe ju â angel’mpeu ju gum bambe penui ngau de lei.