Read Zeme Naga TÂTEWBE 7 Bible Online

TÂTEWBE 7 - Zeme Naga bible

TÂTEWBE 7

¹Zai tingkudilangpeu ne Stephenbe je, “Aize gesangsing de mei?” kacheu de lei.

²Dadege Stephenbe ne, “Mi puiname zai mi peume nung gau, a sam ’ngking gai lau. Anui pau Abrahambe, Haran ge pa bam gai makge Mesopotamia ge bambe ting ge pengêudibe Hera ne pechu liâ ze,

³pechu, ‘Ning ram benai ning kibaume je sâu ze heram I ne ngualiarabe heram ’mbe nang zuatat chu lau,’ ze kacheu de lei.

⁴Dadege pa â Kaldia ramdei gene zuapat ze Haran ge bam di de lei. Zai pe peu chaidibe chângge chigene chuna aige ningnui kebambe heram ’mbe Hera ne pechu nguagut kai bei de lei;

⁵acheusede aige pe ram hang Hera ne mâ de pei mak lei, kêrang kat riâ du pei mak lei, kane pa pe na ga leusede aipau heram ze pa benai pe cha pe name heurâ hangge ngau ra samhat kai diak lei.

⁶Zai Hera ne aipau deu ge rang gai ze pe chaname rehei churaîrame â miramme ram ge hesangme chang ze bam gu, zai chime ne penui je kebang ge chui gai gu zai penui je tewsâ ze kum haî medai bam gu lei.

⁷‘Kane penui je penui guâ ’nggua ra chuigaime heramzatme je I ne samram gu lei,’ ze Hera ne kacheu de lei, ‘zai chipau châng dezai penui zuapat ze aipau bâm gene achu kellum ze bam gu lei,’ ze acheu zeu.

⁸Zai pa ne pechu rumkagetenbe sie samhatkaibe pei gai de lei. Dadege â Abrahambe pe na Isaakbe lungkeu lu hezie padesatbe mai ge pechu rumgeten gai de lei; zai Isaakbe pe na Jakobbe lungkeu de lei, zai Jakobbe ne reheime peume, zai kereu-ze-kename je piakeu de lei.

⁹“Dadege reheime peume bau ne Josepbe je hemimeu ze Ijipram ’mbe pechu zua gai ’ndi de lei; kane Hera ne pe dage nguabam ze,

¹⁰zai pa hereuliebe leine gene pechu meupat kai lu ze Ijipme wangpeu, chi pechu Ijip benai pe kiduîme leine gu laksaibe hang sumgaibeipeu masuage ngauka’nggiabe benai kaningchingbe bam ra pechu pei gai bei de lei.

¹¹Chunage Ijip benai Kanaanram leine ge herakûm benai kahereube kedibe wang de lei, zai anui peume teu ra peulak ti de lei.

¹²Kane Ijip ge chêu la lei be Jakobbe ne seu lu ze anui peume je raîlangbe ge chige lang gai de lei.

¹³Zai pakenabe ’ngkiâtatbe luage â, Josepbe ne pe sikiname je pe runne ne pechu chiliâ gai bei de lei; zai Josepbe kiduîme je Pharaobe ne chî kam di de lei.

¹⁴Zai Josepbe ne pe peu Jakobbe benai pe kiduîme ’nteumena penui riaksena-ze-mengeume je pe dage wang ra lang gai bei de lei;

¹⁵dadege Ijip ’mbe Jakobbe wangkeu di de lei. Zai pa benai anui peume chai di ze

¹⁶penui gu kechaipum ze â, Shekem ’mbe puawang dai ze, Abrahambe ne Shekem ge Hamorbe name dagene heraw bâm hang gepût-rangkâng ne luigaibe bâm ge bai gai ’ndi de lei.

¹⁷“Zai Hera ne Abrahambe dage samhatkaibe hî ze wang’nnabi-bidibe luigum ze Ijip ge ziemmename heluîhing ze pung-ze-sa ze bam lei,

¹⁸chi Ijip ge heguang kêdabe Josepbe je chimakpeu ne heguangsapkadaibe ting riâ chang zeu.

¹⁹Pa ne anui zatme je choa’nrui, zai anui peume je penui name ’ngngiêne ramme leine je du peize ring mak ra hangge penui ki gene hela ’mbe ’nchi-chine tuâpat kai ra samde pei ze bam lei.

²⁰Aipau ting ge Mosabe je lung de lei, zai Hera mikngau ge pa peluiyisang-yi ze bam lei. Zai pe peu ki ge kêu chum â bam ze chîngchu de lei;

²¹zai heki gene pechu hela puapat kai bei dege, Pharaobe na heleu’mpui ne pe hang hiam lu ze pechu ’ngkutchu de lei.

²²Zai Mosabe je â Ijipram gu kaningchingbe leine geteilia gai bei ze, pa samsabe benai pe tatew leine ge peranchi ze bam de lei.

²³“Pa pe tingkum hedai chang dadege pe puiname Israelbe chaname je ’ngkiâmie ra pe lung ge ka’nning de lei.

²⁴Chidadege penui ruage hangkat ne kemakbe tâ tewbe ngau de lei, hejaîsittewgaibeipeu je pa ne mêuhâpat kai lu Ijip’mpeu je pa ne hekûmtewruî ze bêu bei de lei.

²⁵Hera ne pe puiname je pe ba gene ripatkairabe penui chî ra ’nnum gai da, kane penui â chize chî mak lei.

²⁶Zai bechai mai dege mi hangna hegei bambe luage penai dage pa wang lu, pa ne penai je desieyibe nguatew gai nei ze pa ne acheu sa ze, ‘Azangkena gau, ningnai hangna â pesikina de zeî lau, ’ndaitew ze kat-kat peireige kemakbe tâ tew rei lau?’ ze acheu bei de lei.

²⁷Kane chi hangkat pe kining’mpeu peireige kemakbe tâ tewpeu zene Mosabe je chuikeduipat lu ze, ‘Châu ne ningchu anai peireige besuitewpeu hang benai samrampeu hangge sum gai bei lau?

²⁸’Nzimai ge Ijip’mpeu je nang tewchat ’ndi gum ze, achu du nang tewchat kai nei mei?’ ze kacheu de lei.

²⁹Aipau sam seulube gene Mosabe â paktat lu Midianram ge hingrangrui chang ze bam gai di de lei; zai chige pe na ’mpeumi hangna lungkeu de lei.

³⁰“Chunage tingkum hedai kam gai dege, Sinai Loa hênam ge hereupuîtum ge hemitau bambe gene angel’mpeu hangkat pechu lia de lei.

³¹Chize Mosabe ngau gai dege chi mâ-kengaube peireige pa ’nningdaulak-desang ze bam lei; zai pa piegai’mmi ra wang’nna gai dege Tingwang kuâ acheu ze pat ze,

³²‘I â ning peume Rapeu, Abrahambe, Isaakbe, zai Jakobbe Rapeu lei,’ ze kacheu de lei. Dadege Mosabe hingkedun ze pie dai hing di de lei.

³³Zai Tingwang ne pechu, ‘Ning pîchûp ning pî gene lupat ne lau, nang sapbe bâm ze ka’nchibe bâm daseu.

³⁴Ijip ge a gume je tewkahereube ze I ne ngau sing lu de lei, zai penui duângga ze huaipun bambe kuâ I seu lu de lei, zai penui je lupat kai ra I wangkeu de lei. Chidaze chunage wang lau, Ijipram ’mbe I ne ningchu lang gai gu de lei,’ ze kacheu de lei.

³⁵“Ai Mosabe, ‘Châu ne ningchu besuitewpeu zai samrampeu hang sum gai lau?’ acheu ze pechu tuâpatkaibeipeu je â chi hereupuîtum gene pechu liâpeu angel’mpeu ba gene ripatpeu benai samrampeu hangge Hera ne lang gai bei de lei.

³⁶Pa ne Ijip ge Kegiebe Sungkling ge, zai hênamkang ge kum hedai lungge ka’nchetbe ramme benai mâ-’nningdaulakbe zat ramme tew ze penui je pa ne nguapat kai de lei.

³⁷Ai Mosabe ze, ‘Hera ne achu lang gai gum ze, ningnui puiname ruagene kemeu hangkat je pa ne tei’nsap kai gu lei,’ ze kacheupeu de lei.

³⁸Aipaupeu ze Sinai Loa ge angel’mpeu ne pechu ’mpau ze hênamkang ge baudime ruage bambepeu zai anui pau-paime ruage bambepeu de lei; zai anui je bala gai ra hangge Hera gu keringbe sam pechu peigaibe pa ngau de lei.

³⁹Anui pau-paime ne pe kuâ lumeu ze, pechu chuikeduitua ’ndi lei, zai penui lung ge â Ijipram je ’nreipie ze,

⁴⁰Aaronbe je, ‘Anui sua raîtat ra hang anui hang hera ramme tew gai lau; Ijipram gene ai anui je nguapatpeu Mosabe ze â, pe peireige ’ndaikau wangchang di mei be anui chî ta de lei,’ ze kacheu de lei.

⁴¹Zai chipau ting geze penui ne getumpoine luî hang chiam lu, zai chipau heraluî dage penui herâtewbe kela teiwang ze, penui bachiâm peireige penui suiyi’nta ze bam de lei.

⁴²Kane Hera ne penui dagene ’mbia di ze, tinggîm ge hegi ramme je penui kellum ra peipat kai bei tai de lei, kemeume gu leisikuak ge rawdiakkaibe ge, ‘Hekaune tewchatbe benai herâtewbe ramme ne ningnui achu kela peipat kai mei, hênamkang ge kum hedai lungge zeu, Hei Israel ki gau?

⁴³Zai ningnui ne Molokbe gu hetiampaîki puipat kai lei, zai hera Rephanbe gu hegi chi ningnui ne kellum ra tewgaibe luî zat ramme zeu; zai I ne ningnui je Babilon hela tei’mbiapat kai gu lei, kacheube gum zeu; zai I ne ningnui je Babilonram dei wîgiam ’mbe kelitua ’ndu lei,’ ze kacheu de lei.

⁴⁴“Hênamkang ge anui pau-paime gu sakkitewbe hetiampaîki bam de lei, Mosabe je ka’mpaupeu ne chize tew ra ranggaibeibe pa ne ngaulube tak luigumbe gene tewbe zeu.

⁴⁵Anui pau-paime masua gene Hera ne heramzatme je chuipatkaibeibe chi penui ne heramzatme je kechaîpatkaibe ting ge Joshuabe je ngua lu ze anui pau-paime ne chize teiwang gai kadai de lei. Zai chize Dabidbe,

⁴⁶Hera masuage ngauka’nggiabe ngaupeu, zai Jakobbe Rapeu hang pebâm peu ra tat ra kiepeu ting riâ bamkuâchang de lei.

⁴⁷Kane Solomonbe ne pe ki hang tew gai de lei.

⁴⁸Acheuleusede, Hulangpeu â mi ba ne tewbe heki ramme ge bam mak lei; kane kemeu’mpeu ne ranggaibe ge,

⁴⁹‘Tinggîm ze a gu Heguang-bamrak lei, zai kedei ze a pichaîra lei. ’Ndaigumbe heki zat a hang ningnui ne tew gai ra lau, makchai I saugairabe ’ndaikau bâm lau?

⁵⁰A ba ne airamme leine ze tew gai mak ti lau?’ kacheube gum zeu.

⁵¹“Ningnui helung-kunrachime benai ningnui kun ge rumgetenmakme bau gau, pehî’nsangne ge Herui Ka’nchibe je ningnui ka’nggi lei. Ningnui pau-paime tew gum ze ningnui du tew de lei.

⁵²Ningnui pau-paime ne tewsâgaimakbe kemeume châu la lau? Zai penui ne Katelingbe Hangkat, wangrabe rasam pau’ntuagaibeime je tewchat ’ndi lei, ningnui ne pechu zua lu gîchatkai’ndipeu zeu,

⁵³Angelme ne hingde peigaibe ningnui lutau lu chize tei’mmimakme bau zeu,” ze acheu bei de lei.

⁵⁴Zai airamme penui seu lu, penui lungteu-desang di ze, pe peireige penui geukegit ze bam de lei.

⁵⁵Kane pa â, Herui Ka’nchibe ne pui lu ze, tinggîm ’mbe ’ngngangpie lu, Hera pengêudibe, zai Hera hezat’mbia ba ge Isua sapbe pa ngau de lei;

⁵⁶zai pa ne, “Pie le lau, tinggîm latkaibe zai ziemmena Na Hera hezat’mbia ba ge sapbe I ngau lei,” kacheu de lei.

⁵⁷Kane penui laîkai ’nrung ze, penui kun keba lu ze, pe tailam nupwang de lei.

⁵⁸Dadege penui ne pechu namdi gene hela ’mbe chuipat kai lu, tingchu ne tuâ de lei; zai chize sakkitewme ne penui paî ramme ze rehang’mpeu hangkat Saulbe kacheupeu pîkang ge kai kam gai de lei.

⁵⁹Zai penui ne Stephenbe je tingchu ne tuabe luage, pa â kellum ze, “Heguang Isua gau, a herui lu le lau,” kacheu de lei.

⁶⁰Zai pa kukdung gai lu ze, pe laîkai ’nrung ze, “Heguang gau, aipau hemui ze penui peireige chibam se lau,” kacheu de lei. Zai aipau sam sa gai lu dege pa jeikeu gai di de lei.