Read Zeme Naga TÂTEWBE 9 Bible Online

TÂTEWBE 9 - Zeme Naga bible

TÂTEWBE 9

¹Kane Saulbe, Heguangpeu gu kenieme je kedungrabe benai gîrabe lungtak puigit lu ze tingku dilangpeu dage tat ze

²Damaska ge ka’nduibeki ramme ge samkela leisi pei gai ra pe dage kie de lei, ’mpuimi lêuzai ’mpeumi lêuzaidu ’Mpuiki gu ziemmena zat leine je â pa ne ngaudau dizai â, nîm lu, Jerusalem ’mbe teiwang gai ’nde ra hangge zeu.

³Zai pa tat ze Damaka keloa changtena ge, luakatne tinggîm ’mbene kebabe ’mbi wangkeu ze pechu sireba ze guâgit ’ndi de lei.

⁴Dadege kedei ge pa kâu-plui gai dege, pechu acheu ze ka’mpaube kuâ pa seu de lei, “Saulbe, Saulbe, ’ndaitew nang achu tewsâ lau?” kacheu de lei.

⁵Dadege pa ne, “Heguang gau, nang châu lau?” acheu bei de lei. Zai pa ne, “I ze Isua, nang ne tewsâ ze bambepeu de lei,

⁶kane chu lu ze namdi lungge gut chu lau, zai nang tewrabe ningchu ranglia gai bu lei,” ze kacheu de lei.

⁷Pechu nguaka’mbeime â penui kuâneu ta di ze sap bam de lei, chi samsabe kuâ ze â seu lu, kane mige je de ngau mak lei.

⁸Saulbe kedei gene zuachu de lei; zai pe mik rakpat dege pa mâ de ngauchi ta di de lei; dadege â penui ne pechu pe ba tei lu, Damaska keloa ’mbe nguagut kai de lei.

⁹Zai hezie kechumne riâ pa mâ de ngau mak, zai teu mak sak mak ze bam de lei.

¹⁰Chunage Damaska ge kenie’mpeu hangkat, pe ji Ananiasbe bam lei. Heguangpeu ne keliâbe gene pechu, “Ananiasbai” ze ku de lei. Zai pa ne, “Heguang gau, I aige lamui lei,” ze acheu bei de lei.

¹¹Dadege Heguangpeu ne pechu, “Chu ze Ka’nzeibe kacheube chi Puidi ge tat ze Juda ki ge hangkat, Tarsas’mpeu, Saulbe kacheupeu je nang ’mmêt le lau; pie le lau, pa kellum lamui lei,

¹²zai hangkat pe ji Ananiasbe kacheupeu ne wang ze pe mik ne mâ ngauchi dai le ra hangge pe peireige pe ba diegaibe pa ngau de lei,” ze kacheu de lei.

¹³Kane Ananiasbe ne kak ze, “Heguang gau, ziemmena misonggame dagene aipaupeu rasam I seu lu de lei, ’ndaizeuge ning gu ziemmena ka’nchime Jerusalem ge bamme peireige kesiabe pa ne tewgaibe zeu;

¹⁴zai aige du tingkugechîngme dagene rezie ngaulube la lei, ning ji kume leine je nîmlerabe hangge zeu,” kacheu de lei.

¹⁵Kane Tingwang ne pechu, “Tatchu lau, pa â Jentailme, zai heguangme, zai Israelme dage a ji ge tâtewrabe hang a gu kerua yilangbe hang I ne pechu kelânggaibe kau de lei;

¹⁶a ji ziegene pa ’ndaizeuge hereulie himchang ra mei be I ne pechu teilia gu lei,” ze kacheu de lei.

¹⁷Chidadege Ananiasbe tat lu chipau ki ge gut ti de lei. Zai pe ba die gai ze pa ne, “A kina Saulbe, nang wangbe ’mpuî ge ningchu mâ liâpeu Heguang Isua ne achu lang gai de lei, nang ning mik mâ ngau dai ze Herui Ka’nchibe ne puigit ze bam le ra hangge zeu,” ze kacheu de lei.

¹⁸Dadege luakatne mâlip ramme gum ze pe mik gene ’ngngaîpangkeu gai di dege, pa pe mik mâ ngau dai di de lei. Dadege pa zuachu gai bei ze pechu baptistew gai bei de lei,

¹⁹zai pa mâ teu gai ze pe ranchi di de lei. Tingnaimikpui misongga ze Damaska ge pa kenieme dage ’nnai bam di de lei.

²⁰Zai pa ne Judame ka’nduibeki ramme ge luakatne Isua deu ge, “Pa â Hera Na lei,” ze acheu ze paurua bam di de lei.

²¹Zai pa samsabe seulume leine ne ningdaulak bam di de lei, acheu ze sa ze, “Aipau peu zene Jerusalem ge aipau ji kûgaime je gechim’nrui ze bampeu mak ti lau? Zai aige du aipau tâ tew ra pa wangkeu de lei, chime je nîm ze pi lu, tingkugechîngme suage penui je pei be ra hangge zeu,” kacheu de lei.

²²Kane Saulbe â pe ranchibi-bi ze bam lei, zai Damaska keloa ge Judame bamme dage Isua â Krista sing de lei ze damgecheurua de lei.

²³Zai beting misongga bam-hang gai dege, Judame ne pechu tewchat ne ra hangge ’ngkim ne sam kahekî de lei,

²⁴kane penui kahekîbe sam ze Saulbe chî di de lei. Saulbe je tewchat ra, namdi keriekemui ramme ze nai’nsangne kemui keba rikkuâ bam lei;

²⁵kane pe gu kenieme ne tingmuî ge mâ-rak lungge pechu kai lu ze, kerie peirei ’mbene hela ’mbe ’mpatkeu gai bei de lei.

²⁶Zai Jerusalem ge pa gutchang dege, kenieme dage herua de ra pa tew de lei; zai penui ’nteumena ne pechu hing di de lei, pechu kenie’mpeu hangge ’nnum’mmimakbe ziegeneu.

²⁷Kane Barnabasbe ne pechu tei lu, apostolme tailam nguawang gai de lei, zai penui dage ’ndaigum ze ’mpuîki ge pechu ka’mpaupeu Heguangpeu je pa ne ngaudau mei be tak, zai Damaska keloa ge Isua ji gene hing mak ze pauruabe tak ze Barnabasbe ne penui dage rang’nchichiak kai bei de lei.

²⁸Chigum ze Saulbe penui ruage ’nnai ze, Jerusalem lungge tat’nruirua bam de lei,

²⁹hingmeluisui ze Isua ji gene samyibe paurua zeu. Zai Judame Grik lad teime dage mâ-’mpau ze, zai mâ-tu ze bam de lei; kane penui â pechu tewchat ra peu bam lei.

³⁰Zai penui bau ne chize chî lu dege, Kaisaria ’mbe pechu nguakeu gai lu Tarsas ’mbe lang gai ’ndi de lei.

³¹Chigum herakiangna Judia ge zai Galili ge zai Samaria pelane ge lungzêune ze bambe desieyibe ting ngau lu ze yi ze bam di de lei. Zai Tingwang je hingchi ze bambe ziegene zai Herui Ka’nchibe ne nguapuîlum ze bambeibe gene chize pungpat ti de lei.

³²Chunage Peterbe pebâm’nsangne ge ’mbeirua ze bambe ting ge Lidda ge ka’nchime bamme dage pa wangkeu de lei.

³³Chige hangkat, Aeneasbe kacheupeu, chi pe pum pikatlam chaibe ne pe jeî ge kum desat bamdipeu je pa ngau de lei.

³⁴Zai Peterbe ne pechu, “Aeneasbai, Isua Krista ne ningchu tew’mmi gai lei; chu ze ning jeî ’nzui gai ne lau,” acheu bei de lei. Dadege luakatne pa zualepchu di de lei.

³⁵Zai Lidda benai Sharon ge bamme leine ne pechu ngau lu ze Tingwang lam penui ’nreiwang kam di de lei.

³⁶Chunage Joppa ge kenie’mpui hangkat pe ji, Tabithale, kacheupui bam lei, chize â, Dorkale kacheube mei nune Helungpui kacheube ze lei. Pa â tâ-yibe ramme tew ze mâ-keyibe tewrabe ge peipatneibe lungtak ne puigit ze bambepui lei.

³⁷Chipau ting ge pa ’nrâkau gai ze chai di de lei; zai pechu hedui pia gai lu, ’nreibe kisîam ge ’njei gai bei de lei.

³⁸Lidda ze Joppa taihia ge bam bei dadege, kenieme ne Peterbe â Lidda ge la lei be seu lu dege, pe dage hangna je lang gai ze, “Ning suiyi ze kelua ze anui dage wang gai lau,” ze acheu ze pechu kiam de lei.

³⁹Dadege Peterbe chu lu, penai je ngua lu tat ti de lei. Zai pa wangchang dege, ’nreibe sîam ge pechu nguahang di lei. Dadege kemîpui ramme ne pechu sapgua lu ze hap bam de lei, zai Dorkale ne penui ruage bambe luage penui hang mechua ramme, zai paîni ramme tewgaibeibe ramme ze teilia de lei.

⁴⁰Kane Peterbe ne penui ’nteumena je hela ’mbe langpat kam nan ze kukdung lu ze kakellum de lei; zai kechaibepui lam’mbe ’nreiwang lu ze “Tabitha, chu zu lau,” acheu gai lei, dadege pe mik rakpat lu ze Peterbe je pa ngau lu dege, pa chu’ntau di de lei.

⁴¹Zai pe ba ne tei lu pechu zuchu gai bei de lei. Chidadege â ka’nchime benai kemîpuime ramme je ku lu Tabithale je ring ze penui dage pei gai bei de lei.

⁴²Zai aize Joppa huâzie ge chî kam di ze misonggame ne Tingwang je ’nnum’mmi di de lei.

⁴³Zai Joppa ge hemeigei kateleupeu, Simonbe ki ge Peterbe â naimikpui misongga ze ’nnai ze bam lei.