Read Zeme Naga ROMME 1 Bible Online

ROMME 1 - Zeme Naga bible

ROMME 1

¹Paulbe Isua Krista guâ ka’ngguapeu, apostol hangge kûgaipeu, zai Hera gu sam keyibe hangge lupatchâmgaipeu,

²chize rawdiakkaibe leisikuak ka’nchibe ge pe gu kemeume dagene samhat’ntuagai’ndibe,

³hemeipum sie gene Dabidbe dagene piakeube, pe Na deu gu gospel,

⁴zai anui Wangpeu Isua Krista, chaidime ruagene pa ringchukadaibe gu ka’nchibe pe gu Herui lam gene tâtewchibe rezie gene Hera Na hang teiliagaibe,

⁵pe ji hang ziegene pe dagezene heramzatme leine ruage keneibe ge hekuâpheube teiwang gai ra hang anui ne ka’nggiabe benai apostol changbe hang ngau lu de lei,

⁶Isua Krista gu chang ra kûgaibeime ningnui je du riam gai zeu;

⁷Rom ge bamme leine, Hera ne hungbeime, zai ka’nchime chang ra kûgaibeime dage: Hera anui Peu zai Heguang Isua Krista dagene ka’nggiabe benai desieyibe peize bam lau.

⁸Railangbe ge ningnui ’nteumena je Isua Krista dagezene a Rapeu dage a suiyibe sam I pau gai de lei, ningnui gu keneibe rasam ze kedeirei leine ge pauruagaibeibe ziegeneu.

⁹Pe Na gu gospel ge I ka’nningbe gechîbe gene I ne nguabambe Hera â a gu sakki dadege, a gu kakellumbe leine ge pehî’nsangne ge sau mak ze ningnui je I kûchu gai ze

¹⁰’ndaigum mei zai â Hera suî’nning gene I ningnui dage wangchang le ra kie gai bam de lei.

¹¹Ningnui je I ngauhedau gai ra nei-desang lei, chidezai ningnui ran tew’nchi gai ra ningnui je Herui lam gu kela mâge â I pei be ra hangge zeu,

¹²chidezai ningnui dage benai a dage bambe kat-kat keneibe zene anui kat-kat ran tew’nchi gai be ra hangge zeu.

¹³A puiname gau, ningnui dage zuamie ra I ’nning gai ze bambe ningnui chî ra I lunei lei, ningnui ruage benai Jentailme kêdame leine ruage du perachî ze gat le ra hangge zeu (kane chuna riâ chang ze achu nam ze bam lei.)

¹⁴Grikme dage benai kelungbe tak chimakme, kaningchingme benai kemieme dage I hepâupung lei:

¹⁵chigum ze ningnui Rom ge bamme dage du sam keyibe ze pau gai nei-desang lei.

¹⁶I â gospel je ’ngngam me lei: chize â, keneibe bambe kau leine hangge tew’nringgairabe hang Hera gu tâtewchibe daseu.

¹⁷Chige zene Hera katelingbe ze keneibe gene keneibe hangge teilia gai bei de lei; “Keneibe gene katelingbe kau â ring gu lei,” ze raw gai gum zeu.

¹⁸Tinggîm ’mbene Hera lumpum ze ziemmena telingmakbe benai helungriaksiabe peireige liâ gai bei de lei, penui lungriaksiabe ne samsang ze deinamme peireige zeu.

¹⁹Hera châu mei be chî ra hang â penui hang ’nchichiak ze lamui de lei, Hera ne chize penui je teiliagai’ndibe ziegeneu.

²⁰Kedeirei ’ndamgaibe gene seuze, pa telung tak mi mik ne ngauchilakbe ramme, chize pa betun mak ze reziechibe benai pa kaherâbe ze pa ’ndamgai’ndibe merua ramme gene ’nchichiak ze ngaukâ lamui lei, chidadege penui sa’nreiduibe mâ de ga lei;

²¹penui â Hera je chî lu sede Hera je hengêutew mak, zai pe dage penui suiyibe sam du pau gai mak, kane penui ka’nningbe ze peruânggabe chang di, zai penui mâ-’nningchilakbe lung ze tewmuî ’ndi lei.

²²Kaningchingme hangge riam gai lu ze penui â kemieme chang di lei,

²³zai chaidailakbe Hera pengêudibe hangge, chaidaiduibe ziemmena luî mei nu, ’nruine ramme luî mei nu, hekaubena ramme luî mei nu, liaruabe ramme mâkâupui luî mei zene ’ngngiak kai ’ndi lei.

²⁴Chipauziegene Hera ne penui je mâ-mâ kahebâbe ge penui lung ngau’ntetlak ze bamrabe ge, penui runne penui pum je mâ-hang chak kai mak bamrabe ruage ze sâudiak kai bei de lei,

²⁵penui ne Hera samsang changbe ze karasa hang tei’ngngiak kai ze betingbeta hang suanggai’ndipeu Ka’ndampeu je kellumrabe kelei ge ’ndamgaibe zat dage kellum ze ’nggua ze bamdibe ziegeneu! Amen.

²⁶Aipau ziegene Hera ne penui je ka’ngngambe kedibe ge sâudiak kai bei de lei. Penui ruage ’mpuimi ramme kelaktewbe sie ze betâu-pakezeimakbe kelaktewbe sie hangge tei’ngngiak kai ze bam lei,

²⁷zai ’mpeumi du chigum ze ’mpuimi dage nguakelaktew ze bambe sie sâu nan ze ’mpeumi ne ’mpeumi karai ge mi ka’ngngambe tâ tew ze bam ra ran ze bambe penui tewmaube ziegene gesâbe penui pumgîm ge ngau ra bambe ze ngau ze bam de lei.

²⁸Zai Hera je chî ra penui ne betâudibe hang ngau gai mak bei dadege ka’ngkuibe lungtak benai bamchimakbe telung tak ge Hera ne penui je sâu gai bei de lei.

²⁹Penui dage helungriaksiabe, kesiabe, kadekumbe, zai kategabe airamme leine ne puigit ze bam di de lei. Hemimeube, kegîbe, kahegeibe, gechoabe, katîmphibe ne pui lu ze, penui â tiakchi,

³⁰sa’nsiachi, Hera je ngaugailakme chang, keraichi, gechîrattewchi, keditewchi, kesiapeuchi, pe pui-peu kuâpheu mak,

³¹gepangme, keneibe game, mâ-ka’nningbe game, zai ka’nggiabe game chang ze bam lei.

³²Airamme tewme leine â chaikezei lei, kacheube Hera gu samde penui chî lu sedu, airamme penui tewbe runne makse, kane airamme tewme peireige penui suî hezuâ gai sua lei.