Read Zeme Naga ROMME 10 Bible Online

ROMME 10 - Zeme Naga bible

ROMME 10

¹Aipuiname gau, penui hangge I a lung ne keneibe benai Hera dage I kakellumbe ze â penui je peize ringlerabe ze lei.

²Hera hangge penui helung peigaibe la lei be ze penui je I ne sakki de lei, kane chize â penui chî’mmi mak lei.

³Hera dagene kapelingbe patbe ze penui â chî mak ze, penui gu kapelingbe ze tew’nsap kai ra penui peu lu, Hera kapelingbe kangge penui â bam nei mak lei.

⁴Krista â hingde ze tew’nsanggaibe de lei, chidezai mi-mige de pe dage keneibe bambe kau je â tew’nzei gai be ra hangge zeu.

⁵Hingde gene kapelingbe tâ tewbe kau â chipau hingde gene pa ring gu lei, ze Mosabe ne raw gai lei.

⁶Kane keneibe gene kapelingbe patbe zene aigum ze rang ze, “Châu ne tinggîm ’mbe keuchu ra lau?” acheu ze mei (chize Krista je teikeurabe de lei)

⁷nune “Châu besînggabe kuiki ge wangkeu ra lau?” acheu ze mei (chize chaidime ruagene Krista je teichurabe ze de lei) ze ning lungge acheu se lau, ze kacheu de lei.

⁸Kane aize ’ndaikau tew lei, kacheu be lau? Sam ze ning taige, ning mui taige zai ning lungge lamui lei, (chize de lei, keneibe sam anui paube zeu);

⁹ning mui ne Isua â Heguang lei, ze sa sing lu, zai Hera ne pechu kechaime ruagene teichu dai bei de lei ze ning lung gene ’nnum’mmi dizai â, ningchu tew’nring gai bu daseu.

¹⁰Ziemmena â pe lung gene ’nnumka’mmibe ne pechu tew’nzei gai bei de lei, zai pe mui ne pa keneibe ze salia bei ze pechu tew’nring gai bei daseu.

¹¹Rawdiakkaibe leisi ka’nchibe ne rang ze, “Pechu ’nnumka’mmibe kau je â tew’ngngam gai ra mak lei,” kacheu de lei.

¹²Juda’mpeu benai Grik’mpeu kakge gechâmbe mâ de ga daseu; chi Tingwang kat zene haimena gu Heguangpeu chang lei, zai pe ji kûme leine je â pe heu pei gai lei.

¹³“Mi-mige de Tingwang ji gekûme je â tew’nring gai bu lei,” kacheu daseu.

¹⁴Acheuzaine, penui ’nnum’mmimakpeu je ziemmename ’ndaigum ze penui pechu kûchi ra lau? Zai pe rasam mâdau de seumakpeu je ’ndaigum ze penui ’nnum’mmichi ra lau? Zai pauruapeu ga ze ’ndaigum ze penui seu ra lau?

¹⁵Zai penui je lang gai be makchai ’ndaigum ze penui pauruachi ra lau? “Sam Keyibe pauruame pî peluiyi-desang lei!” ze rawgaibe gum zeu.

¹⁶Kane penui ’nteumena ne gospel ze ’ngking mak lei; “Tingwang gau, châu anui dagene pa seulube ze ’nnum’mmi di lau,” ze Isaiabe ne kacheu daseu.

¹⁷Chidadege seugai’ndibe gene keneibe â wang lei, seugai’ndibe ze â Krista rasam pauruabe gene wang lei.

¹⁸Kane I ka’nneu lei, penui â seu mak mei? Penui seu sing lu de lei; “Kedeirei leine ge penui kuâ â tatchang kam de lei, zai penui kuâ ze kedeimik ramme ge tatchang kam de lei,” kacheu daseu.

¹⁹I ’nneu kadai lei, Israelme â ’nningchi mak tai mei? Railangbe ge Mosabe ne sa ze: “Pedeinamakme je ningnui ne ’nchie ra I ne tew gai gu lei; zai kemiebe zat dage ningnui lumpum ra I ne tew gai gu lei,” kacheu de lei.

²⁰Zai Isaiabe ne hing-me-luisui ze sa ze, “Achu peumakme ne achu ngaudau lu de lei; achu ’mmêtmakme dage I a runne achu liâ gai bei de lei,” ze kacheu de lei.

²¹Kane Israelme deu ge pa ne sa ze, “’Nrîmbeting tâluî ge hekuâpheumakme benai ’ngkailakme peireige I a ba getuakuâ ze bam de lei” ze kacheu de lei.