Read Zeme Naga ROMME 12 Bible Online

ROMME 12 - Zeme Naga bible

ROMME 12

¹Chidaze a puiname gau, Hera ka’nggiabe ramme gene ningnui je I kiam lei, ningnui pum ramme ze herâtewbe keringbe gum ze ka’nchibe benai Hera ne kelunbe chang ze peipat kai ra hangge zeu, chi herui lam ge ningnui kakellumbe changbe zeu.

²Kedeireime kebambe tak gum ze ningnui bam se lau, kane ningnui lung tewrechigaibe zene ningnui kelungbe tak tewkeli gai kam ne lau, chidezai Hera ’nning ze ’ndaikau mei, zai pe hangge keyibe zai pa luneibe zai yika’nsangbe ze ’ndaikau mei be ningnui chî’mmi le ra hangge zeu.

³Achu ka’nggiabe peibeibe ziegene ningnui ’nteumena mî de pe runne pechu peize pe hut peireige ’nning’ndi ze bam mak ra, kane Hera ne pechu keneibe ranchi hang peigaibe hut gene pe runne pe hangge samram’nzeichi ze bam ra hangge I salia lei.

⁴Hepum kat ge hepumtaura ramme misongga anui dage bam gum, zai chi hepumtaura leine zene tâtewbe tak ’nzuâ kam mak gum ze,

⁵anui du misongga ze bam leusedu, Krista ge anui pum kat chang lei, zai kat-kat zene kat-kat hangge hepumtaura hang chang kam lei.

⁶Anui dage kela gechâm-châmbe bambe ze ka’nggiabe gene anui je peigaibeibe luî gene chi kela ramme ze anui teitatew kei lei: mâ-rangka’ntuabe kela dizaine â, anui dage keneibe bambe riâ ge anui sa ra lei;

⁷tâ’ngguachibe kela anui je pei gai dizai â, anui ’nggua ra lei; mige pe dage mâ-geteichibe kela pei gai dizai â, pa nguagetei ra lei;

⁸mige pe dage miramme je nguagecheuchibe kela pei gai dizai â, pa nguagecheu ra lei; mige pe dage mâ-mâ-peipatchibe kela pei gai dizai â, pa helungdi ze peipat ra lei; mige pe dage ’ngngâchibe kela pei gai dizai â, pa ’nchâlai ze ’ngngâ ra lei; mige pe dage ka’nggiabe tâ tewchibe kela pei gai dizai â, pe lungsuiyibe ne tew ra lei.

⁹Kehungbe ze peize peling ze bam lau; kesiabe je ’nrie ze keyibe je ’nggui’ntip le lau;

¹⁰puinakattewbe kehungbe zene kat-kat je hungchi ze bam lau; kat-kat je hengêutewchinei-helit ze bam lau.

¹¹Mâ mâ tewbe ka’nchâbe lam ge mâtew-tewsedu ’ntâmkeu mak ze Tingwang gua ’nggua ze bam lau. Herui lam ge ’nchanghang zai rengachai ze bam lau.

¹²Nang kaheguîbe ge hesuiyi’nta ze bam lau, mi duânggabe kahereube ge liechi lau, panehî leine ge kellum bam lau.

¹³Keneibe lam ge ka’nchime penui ka’nnangbe ge ka’ngngâbe-hâ pei gai lau, hesangme je ’nchâchi ze bam lau.

¹⁴Ningnui je tewsâme je ’nnam gai be lau; penui je deset kai mak ze ’nnam gai be lau.

¹⁵Hesuiyime suî nguayigaihâ be lau, zai kehapme je nguahap kai be lau.

¹⁶Kat kat dage ’ndeuhui ze bam lau; gechîrettew se lau, kane kecheime dage nguaheruachi ze bam lau; ningnui runne ningnui je ’nning’nditau ze bam se lau.

¹⁷Mî je de kesiabe ne kesiabe peiruî dai se lau, kane ’nteumena mikngau ge keyibe ze tew ra ’nning gai lau.

¹⁸Chize tew ra ningnui je dau tânege chang dui dizai â, ’nteumena dage nguadesieyichi ze bam lau.

¹⁹Kehungme gau, mâtew-tewsedu hekûm â lu se lau, kane chize Hera lumpum hangge ’nsak kai ne lau; “Hekûmlurabe ze â a gu lei, I ne peiruî dai gu lei, ze Tingwang ne kacheu de lei.”

²⁰Mak lei, “ning teureipeu ne ’njei dizai â pechu kei be lau; pa herei dizai â sak ra pei be lau; chigum ze tewbe gene pe peî’nning ge hemi-mechingkâng ramme nang ne kaibe chang gu lei,” ze rawgaibe gum zeu.

²¹Kesiabe ne duî ze bam mak ze keyibe ne kesiabe je duî ze bam lau.