Read Zeme Naga ROMME 14 Bible Online

ROMME 14 - Zeme Naga bible

ROMME 14

¹Mige keneibe ge peran-gabe kau je pa ka’nningbe tak ramme peireige ki makse pechu ’nchâ lau.

²Hangkat ne mâ-mâ leine pa teu dui kam lei, ze ’nnum gai lei, zai pe ran-gapeu â gireuneu ramme runne teu lei.

³Teupeu zene teumakpeu je peize ngau’nna se lau, zai teumakpeu zene du teupeu peireige peize sa’nsia se lau; Hera ne pechu ’nchâ bei daseu.

⁴Miramme guâ ka’ngguapeu peireige samram ra nang ze châu lau? Pe pau suagene pa â chu zai kâukeu ze bambe kau lei. Zai pechu tei’nsap kai bu lei, pe pau ne pechu â tei’nsap kai dui daseu.

⁵Hangkat ne chi naimikpui kat je sua â kêdabe mai je ’nningka’ndi lei, zai kêdapeu ne tingnaimikpui leine ’nzuâkambe hang ’nning gai lei. ’Nteumena ne peize penui ka’nningbe besingsiak ze bam lau.

⁶Chipau mai ze kereipeu zene Tingwang ngeutewka’ndibe gene chipau mai ze rei ze bam lei. Chi mâ-teupeu ze du Hera ngeutewka’ndibe gene pa mâ-teu ze bam lei, Hera dage pe suiyibe sam pa ne pauliâ gai dadegeu; zai teu mak ze reipeu ze du Hera dage pe suiyibe sam pauliâ gai lu rei lei.

⁷Anui ruage mige de pe hang runne pa ring mak lei, zai anui ruage mige de pe hang runne pa chai mak lei.

⁸Anui ring zai â Tingwang hang anui ring lei, zai anui chai zai â Tingwang hang anui chai lei, chidaze anui ring mei, zai chai mei zaidu, anui â Tingwang gu lei.

⁹Aipau hanggene Krista chai lu ringchu kadai de lei, chidezai pa ne kechaime benai keringme Wangpeu chang le ra hangge zeu.

¹⁰’Ndaitew ze ning sikina peireige nang samram lau? Zai ’ndaitew ze ning sikina je nang ngauka’nna lau? Hera samrambe bâmrak suage anui ’nteumena sap kû daseu;

¹¹“Tingwang ne rang ze, I ringbe ziegene, ’nteumena a suage kukdungkeu gu, zai heleiria leine ne Hera je getoabe pei gu lei,” ze raw gai ’ndi daseu.

¹²Chidaze anui ’nteumena mi run-runne Hera suage mi rasam salia kam gu lei.

¹³Chidaze kat-kat je anui sa’nsia ta zu kei lei, chi suane â mi puina’mpeu ’mpuî ge mâtew-tewsede kâurabe zat mei, nune kenambe zat mei kai mak ra ’nning zu kei lei.

¹⁴Mâ-zat ge du ’nchimakbe â bam me lei be Heguang Isua Krista gene I chî’mmi sing di de lei; kane chize ’nchimakrabe hang ’nninggaibe kau hangge â ’nchimakbe chang lei.

¹⁵Zai nang mâ-teube zene ning sikina je tewkahejambe chang dizai â kehungbe ge nang â tat ta di de lei. Nang mâ-teube zene Krista ne pe hangge chaigaibeipeu, chipaupeu je tew’nsiagaibe peize chang gai se lau.

¹⁶Chigum ze ning hangge keyibe changbe ze peize sa’nsia gai se lau.

¹⁷Hera gu heguangram kacheube ze â keteu-kesakbe je rang mak lei, kane kapelingbe, desieyibe zai Herui Ka’nchibe gene misuiyibe ze de lei;

¹⁸aigumbe ’mpuî gene Krista guâ ka’ngguabe kau â Hera hangge ka’nchâbe, zai ziemmena ne tei’ndigaibe chang lei.

¹⁹Chidaze desieyibe tewrabe benai kat-kat je nguaranchirabe deze anui gua’nsa kei lei.

²⁰Keteu-kesak deu hang ziegene Hera gu tâtewbe ze tew’nsia se lau. Mâgetaleine ka’nchibe kam de lei, kane mige pa mâ-teube zene miramme je tewkaurabe kemaube chang lei;

²¹hemei teu mak ra, zai wain sak mak ra, zai ning sikina je tewkaurabe hang â mâ de tewmakrabe ze betâu sing de lei.

²²Ning dage keneibe bambe ze Hera benai nang ning runne kakge teichi le lau. Pa ne keyibe hang lugaibe ge pe runne pechu ki’nsiagairagabe kau ze yi de lei.

²³Kane pa ne ’nningkategeibe bam lu pa ne mâ-teube chang dizai â, pechu â tew’ngkui gai ’nde lei, keneibe gene pa tâtewmakbe ziegeneu; keneibe gene patmakbe leine â hemui chang daseu.