Read Zeme Naga ROMME 15 Bible Online

ROMME 15 - Zeme Naga bible

ROMME 15

¹Anui miranchime ne penui ran-game daulakbe ramme ze nguapunggaihâ ra yi sing lei, zai anui runne anui suigut tew mak zeu;

²anui ruage mi-mige ’nteumena ne peize pe kining’mpeu yirabe hangge pe suiguttew ze bam lau, pechu ngua’nzei gai ra hangge zeu.

³Krista â pe runne pe suigut tew me lei; “Ningchu penui ne saka’nsiabe sam ramme ze a peireige keu gai de lei,” acheu ze raw du raw gai lei.

⁴Tingtie rawgai’ndibe leine ze anui je mâ-geteiliabe chang ra raw gai de lei, chi rawdiakkaibe leisi ka’nchibe sam ka’ntipbe benai helungsui tew’ndigaibe zene kaheguîbe anui bam le ra hangge zeu.

⁵’Ntiprip ze bambe benai helungsui tewka’ndibe Hera zene Krista lungtak luigumbe gene peize ningnui je aigum ze kat-kat dage nguamuikattewchi ze bam ra pei gai be lau,

⁶chidezai ningnui sam kat leu kat ne Hera, Bepeu zai anui Wang Isua Krista je hengêutew’ndi bam ra hangge zeu.

⁷Chidaze Krista ne ningnui je ’nchâ bei gum ze, kat-kat je ningnui ’nchâchi ze bam lau, Hera ngeudirabe hanggeneu.

⁸I ningnui je ranglia lei, Hera gu samsang teilia ra Krista â rumkagetanme hangge ka’ngguapeu chang de lei, anui paume dage samhatkaibe ramme ze tew’ntip kai ra,

⁹zai Jentailme ne Hera je pa ka’nggiabe ziegene pechu toa le ra hangge zeu. “Chidaze Jentailme ruage ningchu I toa gu lei, zai ning ji je I toa gu lei,” acheu ze rawgai’ndibe gum zeu;

¹⁰zai acheu sa dai ze, “Hei Jentailme gau, pe gu ziemmename benai ningnui suiyigaihâ lau,” ze kacheu de lei;

¹¹zai acheu dai ze; “Tingwang je toa zu lau, Jentailme leine gau, zai ziemmena zat leine ne pechu peize toa zu lau,” ze kacheu de lei;

¹²zai Isaiabe ne sa’nduâ gai dai ze, “Jentailme je samram ra zuachupeu, Jessibe chana’mpeu wang gu lei; pa gene Jentailme heguî ze bam gu lei,” ze kacheu de lei.

¹³Kaheguîbe bangpui chi Hera ne peize ’nnumka’mmibe gene ngaube chi misuiyibe benai desieyibe zene ningnui je tewpui gai be lau, chidezai ningnui ze Herui Ka’nchibe tâtewchibe rezie ne kaheguîbe ge puigit bam le ra hangge zeu.

¹⁴A puiname gau, ningnui keyibe ne puigit ze bambe zai ningchingchibe ne puigit ze bambe zai kat-kat je geteiliachibe bambe ningnui peireige I a lungwângchangbe lamui lei.

¹⁵Kane Hera ne achu peibeibe chi ka’nggiabe ziegene mâ mâ deu ramme gêsa ge mâ-rang’ngkiagaibe hangge I ne hingmeluisui ze ningnui dage sam raw gai bei de lei,

¹⁶chi Hera gu gospel gu tingku chang ze tâka’ngguabe ge Jentailme hangge Krista Isua gu tâka’ngguapeu I chang le ra hangge neu, chidezai Jentailme ne mâ-peipatbe ze Herui Ka’nchibe ne ’nchâgaibe benai tew’nchigaibe chang le ra hangge zeu.

¹⁷Chidaze Hera hang I tâtewbe ge Krista Isua gene I hegiêleduibe lamui lei.

¹⁸I ne kuugiereu ze mâ de sa ra mak lei, Jentailme je hekuâpheube ge, sam benai tâtewbe ne,

¹⁹mâ-mâ-tewliabe ’nningdaulakbe benai ’nningdaulakbe tewbe ramme gu rezie ne, Herui Ka’nchibe gu rezie ne nguawanglerabe hangge Krista ne a peireige tâtewgaibe rasam runne kuugiereu ze sa ra zangnêu, chidezai Jerusalem gene chu ze Illirikon riâ chang ze Krista gu gospel rasam I ne pauwangtuisiak kai le ra hangge zeu,

²⁰chigum ze Krista ji kûchugaimakbe bâm ge gospel rasam pau gai ra I ka’nning lei, makchai â kêdapeu ne hekipung dîmchugaibe ge heki tewgairabe chang gu daseu,

²¹“Penui dage pe rasam mâdau paugaimakme, chi baudime zene pechu (Krista je) ngau gu lei, zai pe rasam mâdau de seumakme ne pechu chî’mmi gu lei,” ze acheu ze du raw gai daseu.

²²Aipau deu hanggene ningnui je I ’ngkiâmie ra changlak ze bam bam de lei.

²³Kane chuna â aipau huâzie ramme ge a tâ tewgaidairabe bâm hang ga di dadege zai patingkum misongga ze ningnui dage I wang gai nei bam dadege,

²⁴Spain ’mbe I tat ra tatbe ge ningnui je ngauhedau gai ra, zai luakat ningnui ruage nguabam gai lu, ningnui ne I ka’mbeibe ’mpuî ge nguagepâu gai ra I kaheguî lei.

²⁵Kane chuna kakge â Jerusalem ge keneibe lam ge ka’nchime bamme hang ka’ngngâbe kela tei lu I hang gu rei lei.

²⁶Makedonia ge benai Akaia ge bamme ne Jerusalem ge keneime ka’nchime ruage kelaksiame je ka’ngngâbe kela hang penui suiyibe ne pei gai bei daseu;

²⁷penui suiyibe ne aize tew de lei, zai penui tew du tewsingrabe kau lei. Jentailme ne penui (Judame) gu herui lam ge penui heu ramme nguaheu dizaine â, kedeirei heu ramme ne penui guâ ’nggua ra yi sing de lei.

²⁸Chidaze aize I tew kam lu, zai tei’nduilube ze penui ba ge pei gai lu dezai ningnui dage tat kai ze Spain ’mbe I tat ku lei;

²⁹zai aize I chî lei, ningnui lam I wang dezai, Krista gu ’nnamgaibe puigit bambe ze tei lu I wankeu gu lei.

³⁰A puiname gau, anui Wang Isua Krista zai Herui kehungbe ziegene a dage muikattew ze ningnui kakellumbe ge, Hera dage a hang kiegaihâ ra ningnui je I kiam lei,

³¹chidezai Judia ge neimakme dagene achu ripat kai be ra hang zai Jerusalem ge a tâ tewrabe ze keneime ka’nchime dage ka’nchâbe chang le ra hangge zeu,

³²chidezai Hera sui’nning gene ningnui dage I a suiyi ze wang le ra, zai ningnui ruage I sautemi gai le ra hangge zeu.

³³Desieyibe Rapeu ningnui ’nteumena dage peize bam bam lau. Amen.