Read Zeme Naga ROMME 16 Bible Online

ROMME 16 - Zeme Naga bible

ROMME 16

¹Anui kinapui Phoebile Senkria herakiangna ge tâka’ngguapui je ningnui dage I ne chigaihâ de lei,

²chidezai keneime ne tewrabe tâ ningnui tew ze heguangpeu ji gene pechu ’nchâ gai ze, pa ne ningnui dage ka’nnangbe leine ge pechu ’ngngâ gai ze bam lau, pa â misonggame je benai achu ’ngngâbampui daseu.

³Priskale benai Akuilabe, Krista Isua gene I nguatâtewme,

⁴a keringbe hangge penai chai gai ra hingmakbe kena, a runne ne mak ze Jentail herakiangname leine ne penai peireige hesuiyi ze bambe kena je I ne rechâ gai de lei;

⁵penai ki ge herakiangna wangka’nduime je du I ne rechâ de lei. Asia ge Kristian gutrailangpeu, I kehungbe Epaenetabe je du I ne rechâ de lei.

⁶Ningnui ruage tâtewkanripui Marile je du rechâ de lei.

⁷Andronikabe benai Juniasbe a kiduîme benai kebangki ge anui nguabamgaime je du rechâ de lei; penai je â apostolme ruage sasuang ze bambe kena zai penai â Krista gene a suadu keraime kena de lei.

⁸Ampliatasbe, Heguangpeu ge I kehungpeu je du rechâ de lei.

⁹Krista gene anui nguatâtewpeu Urbanasbe benai I kehungpeu Stekasbe je rechâ de lei,

¹⁰Krista gene kedak lu ’ntip ze saptipeu Apellesbe je rechâ de lei. Aristobulasbe kiduîme je rechâ de lei.

¹¹A kiduî’mpeu Herodionbe je rechâ de lei. Narkisasbe kiduîme, Heguangpeu dage bamme je rechâ de lei.

¹²Heguangpeu gene tâtewme, Truphainale benai Truphosale je rechâ de lei, zai Heguangpeu gene tâtew’nrî ze bambepui kehungbe Parsile je rechâ de lei.

¹³Ruphasbe Heguangpeu ne kelânglupeu zai pe ki ge anai hangna pui je rechâ de lei.

¹⁴Asinkritasbe, Phlegonbe, Hermesbe, Patrobasbe, Hermasbe zai mi puiname penui dage bamme je rechâ de lei.

¹⁵Philologabe, Juliasbe, Nirasbe benai pe kinapui, zai Olimpasbe zai penui dage bamme keneime leine je rechâ de lei.

¹⁶Kat kat je ka’nchibe ne keput ze rechâ ze bam lau. Krista gu herakiangname leine ne ningnui je rechâ de lei.

¹⁷A puiname nung gau, ningnui je keneibe-sie geteigaibeibe je ’nggi ze pebau tewchâmme benai tewkeleu ze bamme dagene ’ntîngchi ze bam ra ningnui je I kiam lei.

¹⁸Chigumbe kau ramme â anui Wangpeu Krista guâ ka’ngguame mak lei, kane penui suigut hanggene tâtewme bau lei, penui samniamyibe gene helungka’nzeibe kau ramme je duai lei.

¹⁹Ningnui hekuâpheuchibe tak ze ’nteumena ne chî kam de lei, zai aipau deu ge ningnui peireige a suiyi-desang lei, keyibe lam ge ningchingchi lu zai kesiabe lam ge ningchingsiabe tak bam mak ra I ne ningnui je kiam lei;

²⁰chidezai desieyibe Rapeu ne kelua ze Satan je ningnui pîkang ge chaîkeniakniang gai bu lei. Anui Wang Isua ka’nggiabe ze ningnui dage peize bam bam lau.

²¹Timothibe I nguatâtewpeu ne ningnui je rechâ de lei; chigum ze a kibaume, Lukiasbe, Jasonbe, zai Sosipaterbe aime ne ningnui je rechâ de lei.

²²I Tertiasbe, ai (Paulbe gu) samkela rawpeu ne ningnui je Heguangpeu gene rechâ de lei.

²³I benai herakiangname je pe ki ge rêu ra peipeu, Gaiasbe ne ningnui je rechâ de lei. Erastasbe, namdi gu rangkâng kereîpeu zai anui puina’mpeu Kuartasbe ne ningnui je rechâ de lei.

²⁴Anui Wangpeu Isua Krista ka’nggiabe ningnui dage peize bam bam lau, Amen.

²⁵Chunage a gu gospel luigum ze, zai Isua Krista rasam pauliabe luigum ze, betinggetie ’ngkim ze bam-bamdibe chi ’nningchanglakbe keliâbe,

²⁶kane chuna â latliagai’ndibe benai kemeume gu sam rawgaibe ramme heramzat ramme leine dage chiliâgai’ndibe luigum ze betunmakbe Hera gu samde luigum ze keneibe hekuâpheube bam le ra ningnui ran tew’nchigaiduipeu—

²⁷Hera kaningchingpeu je Isua Krista gene peize pengêudi ze bam bam lau! Amen.