Read Zeme Naga ROMME 2 Bible Online

ROMME 2 - Zeme Naga bible

ROMME 2

¹Chipauziegene Hei ziemmena gau, nang châu gumme chang ze bam lêuzaidu, nang ’mbia ra ga lei; nang samrampeu zene mige peireige samramgailube nang ne chize tew dai ze bambe ziegene nang pechu samramgaibe gene ning runne ningchu tew’ngkuigaibe changbe ziegeneu.

²’Mpui leine ge kegiebe misongga lamui lei. Bepîbang dîmchube ge Hera gu samsabe leine Judame dage pei gai lei.

³Hei ziemmena gau, chi kesiabe ramme tewme peireige nang ne samram gai lu, zai chiramme ze nang sing ne tew lu, Hera gu samrambe gene nang â ’mbiachi duî lei, ze nang ka’nning semei?

⁴Makchai pa pe helungyibe, pa pe raitiebe zai pa gesutchibe peireige nang ne mâ-hang ’nning gai mak ze Hera gu samrambe gene nang ’mbia le ra ’nnum gai mei? Hera pe lungyibe â ningchu helungkahelibe ge nguagairabe kau lei be nang chî mak mei?

⁵Kane nang â ning lung keikeulakbe benai helichilakbe lungtak zene Hera gu kapelingbe samrambe teiliarabe mai hangge Hera lumpum ze ning runne ning hangge kaigekua gai de lei.

⁶Pa tâtewgaibe luigum ze haimena je pa ne penui hî pei gai gu daseu:

⁷hereuliechi ze tew’mmi ze tew ze pengêudibe, hengêutewbe zai chaidailakbe je peubamme leine je â pa ne keringbe betunmakbe pei gai gu lei;

⁸kane penui runne yirabe hangge peu ze, zai samsang ge pheu mak ze, kane helungriaksiabe ge pheugaime hangge â pe lumpum benai pe rata kedibe bam gu lei.

⁹Kesiabe tewbe ziemmena leine peireige kahereube benai duânggabe bam gu lei, raîlangbe ge Juda’mpeu peireige zai Grik’mpeu hangge du bam gu lei,

¹⁰kane pengêudibe, hengêutewbe zai desieyibe â tâ-yibe tewme leine hang bam gu lei, raîlangbe ge Juda’mpeu hang zai Grik’mpeu hangge du bam gu lei.

¹¹Hera â kehung-ka’nrie teilia mak daseu.

¹²Hingde ga ze hemuitewme leine du hingde ga ze penui ga kam gu lei, zai hingde kangge bam ze hemuitewme leine hingde gene penui je samram gai gu lei.

¹³Hingde geseume zene Hera masuage katelingbe ngau suadu me lei, kane hingde ze teitâtewme je â tew’nzei gai bu lei.

¹⁴Jentailme dage â hingde ga sedu penui telung tak gene hingde ne ka’nnangbe tew lei, penui dage hingde ga sedu penui singbe zene penui hangge hingde chang de lei.

¹⁵Hingde ne ka’nnangbe ze penui lungge raw gai ’ndi de lei be penui ne teilia lei; zai penui keyi-kesia chibe lung tak zene du sakkitew, zai penui lung katimpeube zene penui je gechui, nune penui je saka’mbia lei,

¹⁶chipau mai dezai Krista Isua gene ziemmename gu hekim rasam leine ze a gu gospel luigum ze Hera ne samram gu lei.

¹⁷Kane nang ne ning runne ningchu Juda’mpeu ze kû ze hingde ge ’ngngêu ze Hera dage nang puinakattewbe peireige kedikuâ-kua ze bam dizai â

¹⁸zai ningchu â hingde getei gai bei dadege pe suî’nningtak chî lu zai ’ndaibe ze yilang mei be ge lugaichi lu,

¹⁹zai hemikchitpeu hangge nang ne pe hangge kanguapeu de lei be chî lu kemuîbe ge bamme hangge kebabe de lei be nang chî sing lu dizai â,

²⁰kemiebe hangge geteiliapeu chang lu, napoine ramme hangge geteiliapeu chang lu, hingde ge mâ-gechîbe benai kapelingbe la lei be nang ne chî sing lu ze—

²¹nang miramme je geteilia lu, ning runne ningchu geteilia mak ra semei? Hega mak ra nang ne paurua lu, nang kahega mei?

²²Mige de hema mak ra lei, kacheupeu nang kahema mei? Heraluîtewbe je ngaugailakpeu, nang kellumki ramme gu nang ne sut ra mei?

²³Hingde ge nang kedikuâ-kuapeu nang hingde ’ngka ze Hera je nang tewhelêu ra mei?

²⁴“Ningnui ziegene Jentailme ruage Hera ji ze sakahebâ de lei,” acheu ze raw gai gum zeu.

²⁵Hingde nang pheuchi dizai â rumkagetanbe â kegiebe bam sing lei; kane hingde ze nang ne ’ngka dizai â, nang rumkagetanbe ze rumgetanmakbe chang lei.

²⁶Chidaze mi-mige rumgetanmakbe kau ne hingde ne kerangbe leine ze rei ze bam dizai â, pa rumgetanmakbe ze rumkagetanbe hangge riam gai mak ta ra semei?

²⁷Chigum dizai â hemeipum sing ge rungetan mak sedu hingde teika’ntipme zene nang ning dage rawlube hingde bam lu zai rumgetan lu kane hingde ka’ngkabepeu je chau’ngkui gai gu lei.

²⁸Hela kengaube ge tâtewgaibe ne mî de Juda’mpeu gesang hang chang mak lei, zai hela kengaube ge hemeipumsie gene rumkagetanbe du peling chang mak lei.

²⁹Kane pe dagene bamkuâdipeu ne Juda’mpeu gesangsingbe kau chang lei, zai rumkagetanbe singbe â helung gene herui lam gene chang lei, rawgaibe hingde gene runne mak zeu. Pe gu getoabe â ziemmena dagene makse Hera dagene ngau lei.