Read Zeme Naga ROMME 3 Bible Online

ROMME 3 - Zeme Naga bible

ROMME 3

¹Acheuzai Juda’mpeu hangge ’ndaikau yika’ngkeube la lau? Makchai rumkagetanbe ge pemî ’ndaikau la lau?

²’Mpuî leine ge kegiebe misongga lamui lei. Bepîbang dîmchube ge Hera gu samsabe leine Judame dage pei gai lei.

³Hanggesame ne nei makchai â, chize ’ndaikau chang ra lau? Penui neimakbe ziegene Hera keneibe ze tew’ngga ’ndi semei?

⁴Acheu ra mak lei! Ziemmename ne karasa sa leusede Hera â peize peling ze bam lau, “Ning sam ramme gene ningchu tew’nzei gai gu, zai ningchu samram dezai nang ne duî himchang gu lei,” acheu ze raw gai gum zeu.

⁵Kane anui lungriaksiabe zene Hera gu katelingbe teilia ra tew gai zai â, anui ’ndaikau tew lei ra lau? Anui peireige pe lumpumbe ruîkeugaibe ziegene Hera teling ta di de mei? (Ziemmena helî gene I samsa lei.)

⁶Acheu ra mak lei! Chigum dizai â ’ndaigum ze Hera ne kedeirei je samramchi ra lau?

⁷Kane I karasasabe zene Hera gu kapelingbe ze pa pengêudibe tewpungbi-bi ra dizai â, ’ndaitew ze achu hemui kau je gum ze tew’ngkui gai bam ra rei lau?

⁸Zai keyibe wangchang ra hangge ’ndaitew ze kesiabe tew mak ra lau?—acheu ze saka’nsiame hanggesame ne anui je gechui gai gum zeu. Penui je chau’ngkuigaibe â peling de lei.

⁹Acheu zaine anui ’ndaikau tew ra lau? Anui Judame â miramme sua â yika’ngkeu de mei? Acheu me lei; ziemmena leine Judame benai Grikme hemui tâ tewbe kangge bam kam lei, ze I ne gecheu gai ’ndi gum zeu;

¹⁰“Mige de katelingbe kau ’ngga lei, ga lei, hangkat te ga lei;

¹¹mî de ’nningchibe kau ga lei, hangkat te Hera je peube kau ga lei.

¹²Haimena ne tatlietat kam di de lei, penui tatmau kam di de lei; mî de keyibe tew mak lei, hangkat ’nsangdu ga lei.”

¹³“Penui kuki â herawmui latrangbe gum lei, penui leiria ze gechoabe hangge tei gai lei.” “Penui mui ge henêu’nchai geteube ted la lei.”

¹⁴“Penui mui â desetkaibe ramme benai gekabe (karîbe) ne pui lei.”

¹⁵“Penui pî â hejai tewpat kai ra ka’nzet lei;

¹⁶tewka’nsiabe benai hesuisit ne penui ’mpuî ge bam lei,

¹⁷zai penui â lungkatemibe ’mpuî chî mak lei.”

¹⁸“Penui masuage ge Hera je kehingbe ga lei,” ze rawgaibe gum zeu.

¹⁹Hingde ne kerangbe leine ze hingde kangge bamme dage rang lei be ze chuna â anui chî de lei, chidezai mi mui leine tew’nsau gai ra, zai kedeirei leine tatew Hera dage ralia ra hangge zeu.

²⁰Mige de pe mikngau ge hingde teitâtewbe ne râm’nzei gai ra mak lei, hingde gene hemui lei be gechîbe ze â wang daseu.

²¹Hingde benai kemeume ne chipau hangge sakkitew bam sede, chuna â Hera gu kapelingbe ze hingde ze deîtau mak ze teilia gai bei de lei.

²²Hera gu kapelingbe ze Isua Krista je keneibe ziegene keneime leine hangge chang lei. Chige mî de gechâmbe ga daseu;

²³haimena ne hemuigai’ndibe ziegene Hera ngeudibe ze tew’nchei ’ndi de lei,

²⁴kela ’nta peibe gum ze pa ka’nggiabe gene penui je tew’nzei gai bei de lei, Krista Isua ripatkaibe ziegeneu,

²⁵pechu â Hera ne pe râtabe ze tei’mbia ’nde ra hangge zai pe lungwângchang ra hangge desieyibe tew ra herâtew gum tew gai de lei, chize pe jai ge keneime zene ’nchâ ra de lei. Aize â Hera katelingbe teiliarabe hangge pa gesutchibe ziegene tingtie gu hemui ramme ze pa ne tat’ntua lu de lei;

²⁶aize chuna hî ge pa â kateling lei be teilia be ra, zai Isua je neibe kau je â tew’nzei gai ra hangge zeu.

²⁷Acheuzaine â anui ’nningkahegiêbe ze ’ndaikau chang di lau? Chize chak kai mak lei. ’Ndaikau ziegene lau? Tâtewbe ziegene mei? Mak lei, kane keneibe ziegene lei.

²⁸Anui ziemmena â hingde gu tâ ramme gene makse keneibe gene pechu tew’nzei gai gu lei be anui â lutei gai daseu.

²⁹Nune Hera ze Judame Rapeu hang runne semei? Jentailme Rapeu hang chang mak mei? Eu lei, pa â Jentailme hang du chang lei,

³⁰Hera â kat runne dadegeu; rumkagetanme je penui neigaibe ’nchui gene pa ne tew’nzei gai gu, zai rumgetanmakme je penui keneibe luî gene tew’nzei gai gu lei.

³¹Acheuzaine ai keneibe ziegene hingde ze anui mâ-hang du chak kai mak tai semei? Acheu me lei! Maknedu hingde ze anui ne teika’nsap lei.