Read Zeme Naga ROMME 4 Bible Online

ROMME 4 - Zeme Naga bible

ROMME 4

¹Acheuzaine, hemeipumsie gene anui pau changpeu Abrahambe rasam anui ’ndaikau sa ra lau?

²Abrahambe pe tâtewbe ramme gene tew’nzei gai dizai â mâge â pa sahegiê ra bam gu lei, kane Hera suagene mak zeu.

³Hera gu leisi sam gene, “Abrahambe â Hera je ’nnumka’mmi lei, zai pechu katelingbe hangge riam gai bei de lei,” kacheu de lei.

⁴Chunage tâtewpeu hangge pe gu tâtewgaibe hî ze kela ’nta ngaube hangge riam gai mak lei, kane pa ngau ra bambe hepâu hangge riam gai lei.

⁵Zai mige tâtew mak sedu chi Hera lungtak pungmakbe kau je tew’nzeigaipeu peireige ’nnumtewpeu je â, pa keneibe ze katelingbe hangge riam gai bei de lei.

⁶Chigum ze ziemmena pa tatew ne mak sedu Hera ne pechu katelingbe hangge riamgaibe kau peireige Dabidbe ne hesuiyibe sam sa gai ze:

⁷“Penui gu hemui-helut ze lun-gaibeime, zai penui gu hemui ramme ruichimgaibeime ze yi de lei;

⁸Tingwang ne pechu hemui hang riamgaimakbe kau ziemmena ze yi de lei,” ze kacheu lei.

⁹Ai keyibe sam hangge sagaibe ze rumkagetanme hangge runne mei, nune rumgetanmakme hangge du lau? Abrahambe hang â keneibe ze katelingbe hangge riam gai bei de lei, ze anui kacheu zeî lau.

¹⁰Acheuzaine ’ndaigumbe tak gene chize pe hangge riam gai lu lau? Chize pechu rumgetan makge mei, nune pechu rumkagetanbe chângge lau? Chize pechu rumkagetanbe chang ne mak ze kane pechu rumgetanrabe suage lei.

¹¹Pechu ka’nchetbe hang gum ze rumgetan gai lei, makchaidu pechu rumgetan gai mak ze bambe ting ge pe dagene keneibe hangge katelingbe bambe hang ka’nchetbe hangge gum ze rumgetan gai lei. Chi pechu rumgetan-gaibe ze â rumgetan mak ze ’nnum’mmi ze bamme leine peu hang pechu tew gai ra, zai penui je katelingbe hangge riam gai be ra,

¹²zai ziemmena rumgetanlume peu hang runne makse kane anui peu Abrahambe je rumgetanrabe suage pe dage keneibe bambe luilungtak suime peu hang pechu tewgairabe hang ziegene de lei.

¹³Abrahambe benai pe haîhikme dage, penui ne kedeirei lu le ra chi samhatkaibe ze hingde gene tatpela ze wangkeu mak lei, kane keneibe ge katelingbe gene de lei.

¹⁴Hingde teichime ne nguaheurame dizai â keneibe ze matâu hang ga lei, zai samhatkaibe ze perua lei.

¹⁵Hingde ne Hera lumpum teiwang lei, kane hingde gabe ge hedieka’ngkabe du ga lei.

¹⁶Chipauziegene ka’nggiabe geze samhatkaibe wangchang ze bam le ra, chize â keneibe ziegene chang lei, zai pe chaname leine ngau sing le ra pei gai lei, aize hingde ka’ntuime hangge runne makse, kane Abrahambe keneibe ge ka’ntuime leine hangge du chang lei, pa â anui haimena peu chang daseu.

¹⁷Chi kechaime je keringbe pei gai ze kegabe ge bam ra kûwanggaipeu, chi pa ’nnumka’mmibe Hera masua gene, “Heramzatme misonggame peu hang ningchu I ne tew gai lei,” acheu ze rawgaibe gum zeu.

¹⁸Pa ne heramzatme misonggame peu chang ra hangge kaheguîbe ge pa â heguî ze ’nnum’mmi bam lei; “Chigum ze ning chaname aigum bam gu lei,” ze ranggaibeibe luigum zeu.

¹⁹Pa kum haî kat gum changdibe ziegene pe pum je pa ’nning gai ze, kechaibe ’nzuâ ze bambe luage, zai Sarale hena lung ra ga de lei be pa ’nninggaibe luage du pa â keneibe ge pe ran-gakeu mak ze bam lei.

²⁰Hera ne samhatkaibe ge pa ’nningtegei mak, kane pa keneibe ge pe peranchibi-bi ze Hera je toa bam lei,

²¹pa samhatkaibe ze Hera â tew le duî lei be pa â ’nnum’mmi sing lu bam lei.

²²Chipauziegene pa keneibe ze, “pe hangge, katelingbe hangge riam gai bei de lei,” ze kacheu lei.

²³Kane, “aize pe hangge riam gai bei de lei,” kacheube sam ze pe hangge runne rawgaibe mak lei,

²⁴kane anui hangge du raw gai lei. Kechaibe gene zuchugaipeu anui Wang Isua Krista,

²⁵anui gu hemui ramme hanggene tewchat kai bei ze anui ka’nzeibe ngau le ra hanggene kechaibe gene zuchugaidaibeipeu ge anui ’nnumka’mmime hangge chize riam gai gu lei.