Read Zeme Naga ROMME 5 Bible Online

ROMME 5 - Zeme Naga bible

ROMME 5

¹Chidaze keneibe ne anui je tew’nzei gai bei daze, anui Wangpeu Isua Krista dagezene Hera dage anui hangge desieyibe la lei.

²Pa gene chuna anui sapbe ai ka’nggiabe ge gut ra keneibe gene anui ngau lei, zai Hera ngeudibe ge hedam bam le ra kaheguîbe ge anui suiyi’nta ze bam lei.

³Chipau peireige du anui kahereube ramme ge du anui suiyi’nta ze bam lei, kahereube ne liechibe pei,

⁴zai liechibe ne heluilungyibe pei, zai heluilungyibe ne kaheguîbe pei lei be chî lu zeu,

⁵zai kaheguîbe ne anui duângga ra tew gai me lei, Herui Ka’nchibe anui hangge peigaibeibe chize ne Hera kehungbe anui lungge ruî gai bei daseu.

⁶Anui mi ran-ga ze bambe luage, panehî sing ge Hera lungtak pungmakme hangge Krista ne chai gai bei de lei.

⁷’Ndaitew bei lau, ziemmena katelingme hangge mige du chai gai ra hung-desang lei, acheu leusedu ziemmena keyibe kau hang â mige â chairaumakbe kau du bam gu lei.

⁸Kane anui hemui kau chang ze bambe luage, anui hang Krista kehungbe anui je teilia bei de lei.

⁹Chigum ze chuna â pe jai ne anui je tew’nzei gai bei daze Hera lumpum gene anui je pa ne misongga tew’nring gai bu de lei.

¹⁰Pe teureime anui chang ze bambe luage ze pa ne chaigaibe zene Hera dage anui je desieyibe tew gai bei zaine â, ’ndaizeuge chuna anui je pa benai desieyibe tewgaibeibe ziegene pa keringbe ne anui je tew’nring gai be ra lau.

¹¹Aigumbe runne makse, anui Wang Isua Krista dagene Hera ge anui suiyika’nta lei, chi desieyibe tewgaibe chuna â anui pe dagene ngaube zeu.

¹²Chipauziegene hangkat dagene kedeirei ge hemui gut ti gum ze hemui gene kechaibe du gut ti de lei, chidadege â ziemmena leine ne hemuigai’ndibe ziegene haimena dage kechaibe ’nnâk kai kam gai di de lei—

¹³hingde pei mak’ngkage hemui â kedeirei ge bam di de lei, kane hingde gabe bâm ge â hemui ze hemui hangge riam gai mak lei.

¹⁴Acheusede Adambe ting gene Mosabe ting chang ze kechaibe ne heguang ze bam de lei, Adambe chi hangkat wang ra bambepeu ’nda hang teiliapeu gu hedieka’ngkabe hemui gum makbe kêdabe hemuipungme peireige ’nsangdu kechaibe ne heguang ze bam de lei.

¹⁵Kane ’ntane kela peibe ze â chi hedieka’ngkabe benai ’nzuâ me lei. Hangkat hedieka’ngkabe ne misonggame chai dizai â Hera ka’nggiabe benai chi ziemmena hangkat Isua Krista ka’nggiabe ne ’ntane kela peibe ze ’ndaizeuge ziemmena misonggame hangge chang ra lau.

¹⁶Zai chi ’nta kela peibe ze â chi ziemmena hangkat gu hemui tatew peranchibe je ’nzuâ me lei, hangkat gu hedieka’ngkabe peireige samrambe zene tewka’ngkuibe teiwang gai bei de lei, kane misonggame dage ’nta kela peigaibe zene tewka’nzeibe teiwang lei.

¹⁷Hangkat gu hedieka’ngkabe ziegene, chi hangkat dagene kechaibe ne heguang ze bam dizai â, ka’nggiabe misongga ngaume benai katelingbe hanggene kela ’nta ngaume ne chi hangkat Isua Krista gene keringbe ting ge ’ndaizeu heguang ze bam ra lau.

¹⁸Chidaze hangkat gu hedieka’ngkabe ne ziemmena leine hangge tew’ngkuigaibe ge ngua gai bei gum ze hangkat gu kapelingbe tatew zene ziemmename leine hangge tewka’nzeibe benai keringbe ge ngua gai bei de lei.

¹⁹Hangkat gu hekuâpheumakbe zene misonggame je kahemuime chang ra tew gai bei gum ze hangkat gu hekuâpheube zene misonggame je kapelingme hangge tew gai bu lei.

²⁰Hedeka’ngkabe tâ tewpung gai ra hangge hingde â teigutbe chang de lei; kane hemui pung-ze-sa ze bambe ge ka’nggiabe ze puibi-bi ze bam lei.

²¹Chidaze hemui zene kechaibe ge heguang ze bam gum ze, ka’nggiabe ze du kapelingbe gene keringbe betunmakbe ge anui Wang Isua Krista dagene heguang ze bam gu lei.