Read Zeme Naga ROMME 7 Bible Online

ROMME 7 - Zeme Naga bible

ROMME 7

¹A puiname gau, hingde gechîme dage aipau sam ze I sa lei, hingde ze â pa keringbe ting ge runne ziemmena je pi lei be ningnui chî mak mei?

²Chigum ze ’mpuimi meidipui â pe napeu ring tâne â hingde ne pechu pi bam lei; kane pe napeu chai dizai â, pa ze hingde lam gene pe napeu dagene pat ti de lei.

³Chipau luigum ze pe napeu ringbe ting ge kêdapeu dage pa ne ngualung dizai â pechu ze kahemapui ze kû gu lei. Kane pe napeu chai dizaine â chipau hingde zene pi ta di de lei, zai kêdapeu dage meitat dai sedu pa ze kahemapui mak lei.

⁴Chipau luigum ze a puiname nung gau, Krista pum gezene hingde ge ningnui â chai gai di de lei, chidezai Hera hangge anui rachî ’nchirabe hanggene kechaibe gene kuakchugaipeu, chi kêdapeu (Isua) gu ningnui chang de ra hangge zeu.

⁵Hemeipumsie ge anui bambe ting ge hemui lam ge anui ka’nchiebe ramme ze hingde ne gecheu bei ze kechaibe rachî ’nchi ra hangge anui pumkeî ramme ge tâtew bei de lei.

⁶Kane chuna â hingde gene anui pat ti de lei, chi anui je kebangtewgaibe gene chai di de lei, chidezai tingtie gu rawdiakkaibe-hingde guâ ’nggua mak ze kane Herui gu keringbe karchibe gene anui ’nggua ra hangge zeu.

⁷Acheuzaine anui ’ndaikau sa ra lau? Chi hingde ze hemui mei? Acheu me lei! Acheuleusede hingde bam mak nung laîzai â hemui ze I chî ra mak lei. Hingde ne, “Dekum se lau,” acheu mak nung laîzaine â chi katekumbe ze hemui lei be I chî ra mak lei.

⁸Kane hemui â chi samdiegaibe ge pedâuyibe ngau lu dadege ka’nchiebe zat leine ze I ge tewpat kai ze bam lei, hingde gabe ge hemui du chai daseu.

⁹Tingkat â hingde ga ze I â ring bam lei, kane chi samdiegaibe wang dege hemui ze tew’nrakchu gai bei ze I â chai di de lei;

¹⁰keringbe hangge samhatkaibe chi samde singbe zene a hangge kechaibe teiliadesi gai bei de lei.

¹¹Hemui ne chi samdiegaibe ge pedâuyibe ngau lu, achu choa gai ze tewchat ’ndi daseu.

¹²Chigum ze hingde â ’nchi lei, zai samdiegaibe ze du ’nchi zai ’nzei zai yi lei.

¹³Acheuzaine, chi keyibe zene a hangge kechaibe teiwang semei? Acheu me lei! Kane hemui â hemui lei be teilia be ra hangge mâ-keyibe gene kechaibe dage nguatatew bam lei, zai samdiegaibe gene hemui ze seikamlakbe chang le ra hangge zeu.

¹⁴Hingde â Herui lam gu lei be anui chî lei; kane I â hemeipumsie gu de lei, zai hemui kangge bam ra zuagaibeibe kau de lei.

¹⁵A runne a tatew ramme I â chî mak lei. I neibe I tew mak, kane I ngauka’nriebe singbe ze I â tew daseu.

¹⁶Chunage I tewneimakbe ze I tew dizai â, hingde ze yi de lei be ze I hezuâ gai de lei.

¹⁷Chigum dizai â, chize tewbe ze I ne chang ta de lei, kane a lungge hemui bambe zene de lei.

¹⁸A pum hemeipum ge mâ-keyibe mâ de bam mak lei be I chî daseu. ’Ndaibe ze ka’nzei mei be â I kelâng dui, kane chize I tewchi lak lei.

¹⁹Mâ-keyibe I neibe ze I tew mak, kane kesiabe I neimakbe ze I tew ka’nsui daseu.

²⁰Chunage I neimakbe ze I tew dizai â chize I ne tewbe chang ta de lei, kane a lungge hemui bambe zene de lei.

²¹Mâ-keyibe I tewnei-neibe luage kesiabe ze a dage wang’nna ka’nsui lei, besie changbe riâ gum zeu.

²²A lungsui tak sing ge Hera gu hingde ze I ka’nchâ de lei,

²³kane a pumkeî ramme ge hingde kêdabe ramme bambe benai a lungsui tak hereitewbe I ngau lei, zai a dage bambe a pumkeî ramme ne hemui gu hingde kebang hang achu tew gai lei.

²⁴I â ziemmena siabe kau de zeî lau! Ai kechaipum gene châu ne achu ripat kai ra lau?

²⁵Anui Wang Isua Krista dagene Hera dage hesuiyibe sam pau gai lau! Chigum dizai â, a runne I ka’nningbe ge Hera gu hingde guâ I ka’nggua lei, kane a pum hemeipumsie ge â hemui gu hingde guâ I ka’nggua lei.