Read Zeme Naga ROMME 9 Bible Online

ROMME 9 - Zeme Naga bible

ROMME 9

¹Krista gene I â samsang sa lei, karasa I â sa me lei; I keyi-kesia chibe tak zene achu Herui Ka’nchibe ge sakkitewlia gai de lei,

²chi sautadibe kahereube benai hesuisiabe kedibe ze a lungge bambe zeu.

³Chang dui zai â hemeipumsie gene a puiname benai a sikiname hangge Krista gene a pum gîmsing ge deset kai ze tuâpat kai ’nde ra du I â nei lei.

⁴Penui â Israelme lei, zai Hera name changbe, pengêudibe, samhatkaibe ramme, hingde peibe, kakellumbe, zai samhatkaibe ramme ze penui hangge chang lei;

⁵penui â Judame gu haîpaume dagene piakeu de lei; zai Krista ze pa ziemmena changbe lam gene penui zat pa chang lei. Mâgetaleine peireige heguang ze bambepeu Hera je peize betingbeta toa ze bam lau! Amen.

⁶Kane chize â Hera gu sam ze tewpuilakbe gumbe mak lei. Israelbe gene piakeume leine ze Israelme chang kam me lei,

⁷zai Abrahambe haîhikme penui changbeibe ziegene haimena ne Abrahambe name chang kam me lei; kane “Isaakbe dagene piakeume peireige zene ning chaname ze kû gu lei,” kacheu de lei.

⁸Aipau sam parimba ze â ai lei, hejaipumsie gene lungkeube na ramme â Hera name chang me lei, kane samhatkaibe gene lungkeube na ramme zene pe chaname hangge riam gai lei.

⁹Chi samhatkaibe zene kerangbe, “Aigumbe hî ge I helatwang dai gu, zai Sarale ’mpeumi napoine lungkeu gu lei,” kacheube ze de lei.

¹⁰Zai chigumbe runne mak lei, kane Rebekkale ze anui peume Isaakbe dagene hena’mpung ze bambe ting ge du,

¹¹tâtewgaibe ramme ziegene mak ze kane pa ne kûgai’ndibe ziegene chi napoine kena je lungkeu gai mak ze bambe luage zai keyibe du kesiabe du tew gai mak ze bambe luagene du Hera mâ-kakelângbe ge ’ndaikau tâudeu hang kelâng gai mei, chipau tâudeu ze tewtat bamrabe hanggene

¹²Rebekale dage acheu ze rang gai lei, “Gechîngpeu ne henabepeu guâ ’nggua gu lei,” acheu zeu.

¹³“Jakobbe je I hung ze Esaube je I ka’nrie lei,” ze rawgai’ndibe gum zeu.

¹⁴Acheuzaine, anui ’ndaikau sa ra lau? Hera lam gene peling tewmakbe lamei? Acheu sua me lei!

¹⁵Pa ne Mosabe dage, “I ne ka’nggiame je I ne ’nggia gu, zai I ne ngauka’nggiame je ngau’nggia gu lei” kacheu daseu.

¹⁶Chigum ze aize â ziemmena suî’nning gene du mak zai ziemmena tatew gene du mak lei, kane Hera ka’nggiabe gene chang lei.

¹⁷Pharaobe “Ningchu I teichu’ngngugaibe ze â, aipau ka’nnangbe hanggene de lei, ning peireige I tâtewchibe ze teilia be ra hangge nêu, chidezai kedeirei leine ge a ji ze pauruatui le ra hangge zeu,” ze rawdiakkaibe sam ka’nchibe ne acheu ze rang gum zeu.

¹⁸Chigum dadege pa ne nei-neime je pa ne ka’nggia lei, zai pa ne nei-neime lung ze pa ne tew’nchi gai lei.

¹⁹Chidaze ningnui ne achu ’nneu gu lei, “’Ndaitew ze pa ne mi kemaube peurua bam gerei lau? Châu ne pa keneibe ze nam dui lau?” ze acheu zeu.

²⁰Kane Hera je sam kakdairabe hangge, ziemmena gau, nang nung ze châu lau? Chiampatkaibe merua zene chiambepeu je, “’Ndaitew ze nang ne achu aigum ze ’ndam gai lau,” ze acheu gu mei?

²¹Hegamli tewpeu zene chi depungkâng kat gene hegamli kat â betâudibe hangge tew gai, zai kêdabe ze â betâudimakbe hangge tewpat kai ra pe gu rezie ga semei?

²²Chidaze Hera ne pe lumpumbe benai pa tâtewchibe teilianei ze pe lumpumbe ne tew’nsia’nderabe hegamli ramme je misongga liechibe ne gesut ze,

²³chi pengêudibe hangge pa ne teleu’ntuagaibe, ka’nggiabe hegamli ramme peireige pe ngêudibe heurâ ramme teilia be ra hangge zeu.

²⁴Chime ze â anui ze de lei, Judame ruagene runne makse, kane Jentailme ruagene du pa ne kûgaibe mak ti lau?

²⁵Hosiabe dagene pa ne rang gai ze, “A gume makme je I ne, ‘A gume’ ze kû gu lei, zai mî ne de hungmakpui je I ne, ‘I hungbepui’ ze I kû gu lei,” kacheube gum zeu.

²⁶“Zai ‘Ningnui â a gume mak lei,’ ze acheu ze rawgaibe ’nchui sing ge penui je, ‘Hera keringpeu name lei,’ ze kû gai bu lei,” ze rang gai gum zeu.

²⁷Zai Isaiabe ne Israelme deu ge acheu ze sa’ntua gai ze, “Israel name riak zene sungkling ge hegitmoîne gum ze bam leusedu, penui ruage ’nsakpatme je runne tew’nring gai bu lei;

²⁸Tingwang ne kedeirei ge pa samrambe gechukbe tew’nsang gai kelua gu lei,” ze kacheu de lei.

²⁹Zai Isaiabe ne rangka’ntuabe, “Tinggîm baudime wangpeu ne rehei hingkeudairabe kau hangge ’nsak kai mak laîzaine â, anui du Sodom gum chang gai du, zai Gomorra je gum ze tew gai ’ndu lei,” kacheube gum zeu.

³⁰Acheuzaine anui ’ndaikau sa ra lau? Kapelingbe gua’nsamakme Jentailme zene kapelingbe ngau lu de lei, chize keneibe gene kapelingbe ngaube ze de lei;

³¹kane Israelme hingde gene kapelingbe guaka’nsame â, hingde ze tew’nsang lak tai de lei.

³²’Ndaitew bei ne lau? Keneibe gene chize penui ne gua’nsa mak ze tâtewbe ze penui teidibe ziegene lei. ’Nrapkâurabe chukâng ge penui ’nrap kai ’ndi de lei,

³³“Pie le lau, Zaion ge I ne tingchukâng ’ngking gai ’nde lei, chize ne ziemmename ’nrap ra, chipau chukâng zene penui je tewkau gai gu lei; zai pa ge ’nnumka’mmibe kau je â, pechu tew’ngngam gai ra mak lei,” ze rawgai’ndibe gum zeu.