Read Zeme Naga 1 KORINTHME 1 Bible Online

1 KORINTHME 1 - Zeme Naga bible

1 KORINTHME 1

¹Hera suî’nning gene Isua Krista gu apostol chang ra kûgaibeipeu Paulbe benai anui puina’mpeu Sosthenesbe dagene,

²Korinth ge Hera bambe chi Hera gu herakiangna dage, penui benai anui Wangpeu Heguang Isua Krista je kellum ze pebâm’nsangne ge ziemmena leine dage nguakangkattew ze bamme Krista Isua gene nguamuikattew ze Hera gume changme, Hera gu keneime ka’nchime chang ra kûgaibeime dage:

³Hera anui Peu benai Heguang Isua Krista dagene ka’nggiabe benai desieyibe ningnui dage peize bam lau.

⁴Krista Isua gene Hera ka’nggiabe ningnui dage peigaibeibe ziegene ningnui hangge Hera dage a suiyibe sam pehî’nsangne ge I pau gai ze bam de lei.

⁵Krista ge nguamuikattewlube gene mâ-mâ sabe benai mâ-gechîbe leine hangge du, zai mâ-leine ge ningnui ’ntuahang di de lei—

⁶Krista rasam paugaibe sam ze ningnui dage bam’ntiprip kai di de lei—

⁷chidezai anui Wangpeu Isua Krista je teiliarabe deze ningnui ne heguîkuabambe ge ’nnamgaibe ningnui ne ngau sing le ra hangge zeu,

⁸pa ne ningnui je hetûn riâ chang ze ningnui ranchi ze bam bam ra kai gu lei, dezai anui Wang Isua Krista gu tingnaimikpui ge ningnui kemaube ga ze bamchi le ra hangge zeu.

⁹Hera, pe Na anui Wang Isua Krista dage nguapuinakattew ze bam ra ningnui je kûgaibeipeu, (Hera) je ’nnumtew bam ra lei.

¹⁰A puiname gau, ningnui ’nteumena muikattewchi ze ningnui ruage pebau châmbetew mak ze kane suîkat-lungkattew ze mâ-leine ge yi kam ze bam ra anui Wangpeu Isua Krista ji gene I ningnui je kiam lei.

¹¹A puiname gau, ningnui ruage sam getube la lei be Kloesle kiduîme ne a dage pau gai de lei.

¹²I ne rangbe ze ai lei, ningnui ruage mi-mige ne, “I â Paulbe chai sui lei,” acheu, zai kêdabepeu ne, “I â Apollobe chai sui lei,” acheu, zai kêdabepeu ne, “I â Kephabe chai sui lei,” acheu, zai kêdabepeu ne, “I â Krista chai sui lei,” ze ningnui acheu wak ti de lei.

¹³Krista je ’nzipâng gai bei semei? Paulbe je ningnui hangge gia gai bei semei? Nune Paulbe ji gene ningnui je baptistew gai bei semei?

¹⁴Krispasbe benai Gaiasbe je runne zangno, ningnui ruage mî je de I ne baptis tewgaimakbe ziegene a suiyi lei;

¹⁵makchai â a ji gene ningnui je baptistewbe hangge mige ne sa gai gu lei.

¹⁶(Stephanasbe kiduîme je du I ne baptistew gai de lei. Chipau peireige â miramme je I ne baptistewbe I chî me lei.)

¹⁷Baptistew ra hangge Krista ne achu lang gai me lei, kane gospel rasam paurua ra hangge achu lang gai lei, kaningchingbe sachibe gene mak zeu, makchai â Krista gu heling gu tâtewchibe rezie ze tew’ngga gai nan ta du daseu.

¹⁸Chi heling sam ze gaderame hang â kemiebe lei, kane tew’nringgaibeime anui hang â chize Hera gu tâtewchibe lei.

¹⁹“Kaningchingme gu kaningchingbe ze I ne tew’ngga gai gu lei, zai mâ-gechîme gu gechîbe ze I ne tuâpat kai gu lei,” ze acheu raw gai ’ndi daseu.

²⁰Ziemmena kaningchingbe kau ’ndaige la lau? Leisi rawchibe kau ’ndaige la lau? Henaiting ge sam hepanchibe kau ’ndaige la lau? Hera ne kedeirei gu kaningchingbe deze kemiebe hang tew gai mak semei?

²¹Hera kaningchingbe tak geze, kedeirei ne kaningchingbe gezene Hera je chî mak tai dadege, anui ne paugaibe chi kemiebe zene keneime je tew’nringgairabe gene Hera suitew’mmi gai bei de lei.

²²Judame ne ka’nchetbe ’nningdaulakbe kie, zai Grikme ne kaningchingbe kie lei,

²³kane anui â giagai’ndipeu Krista rasam paurua lei, Judame hangge tewkaurabe benai Jentailme hangge kemiebe changbe zeu,

²⁴kane Judame benai Grikme kûgaibeime ’nteumena hang â Krista ze â Hera gu tâtewchibe benai Hera gu kaningchingbe chang lei.

²⁵Hera gu kemiebe ze â ziemmename suadu ’nching lei, zai Hera pe ran-gabe ze â ziemmena suadu pe ranchi lei.

²⁶A puiname gau, ningnui je gekûbe tak ze ’nning gai ni lau; kedeireime ne piebe tak luigum ze â, ningnui misonggame ne ka’nningching kau ramme mak lei, misonggame ne mâ-tewchibe kau ramme mak lei, misonggame ne pengêudibe kelak gene lungkeube kau ramme mak lei;

²⁷kane Hera â kaningchingme je tew’ngngam gai ra hangge chi kemieme je kelâng gai bei de lei, zai Hera ne peranchime je tew’ngngam gai ra hangge kedeirei ge heran-game je kelâng gai bei de lei,

²⁸kedeirei ne betâudibe hangge riam gai ze bambe ting ze tew’ngga ra hangge kedeirei ge ngauka’nchiebe zai ngauka’nnabe zai mâ-hangge du chakkaimakbe ramme je ’nsangdu Hera ne kelâng gai bei de lei,

²⁹chidezai Hera suage ziemmena mige ne de kedikuâ-kua me ra hangge zeu.

³⁰Pa zene anui hangge keringbe bangpui chang bei de lei, Isua Krista, anui kaningchingbe hang, anui gu katelingbe zai tew’nchigaibe zai ripatbe hangge Hera ne tewgaibeipeu pa ge zeneu;

³¹chipauziegene, “Mige kedikuâ-kuabe kau â Tingwang gene peize kedikuâ-kua lau,” ze kacheu de lei.