Read Zeme Naga 1 KORINTHME 10 Bible Online

1 KORINTHME 10 - Zeme Naga bible

1 KORINTHME 10

¹A puiname gau, anui peume â ’nteumena kemâusungbe kangge bam de lei, zai ’nteumena sungkling ze kapat kam lu ze,

²Mosabe dage kemua gene benai sungkling gene penui je baptistew kam gai bei de lei,

³zai penui ’nteumena ne herui lam gu hetak ze teutâu ze,

⁴chi herui lam gu saktâu kam lu de lei. Herui lam gu chi Tingchukâng penui je suitatbe gene penui sak kam gai de lei, zai chi Tingchukâng ze â Krista lei.

⁵Acheuleusedu penui ruage ziemmename gekieme peireige Hera ne pe lungsui yi mak lei; penui je hênamkang ge tew’nggakamgaibeibe luigum zeu, kacheube ze ningnui chî ra I lunei lei.

⁶Chunage airamme zene anui hangge hing ra teiliabe chang de lei, penui ne mâ-kesiabe lunei gum ze anui lunei me ra hangge zeu.

⁷Penui ruage hanggesame gum ze heraluîtewbe je kellum ze bam se lau; “Chi ziemmename ze teu-sak ra ’ntaukeu zai lim ra zuachu ze bam lei,” acheu ze raw gai gum zeu.

⁸Penui ruage hanggesame ne tew gum ze â anui â hangleutewbe ge mie gai mak ra lei, zai mai kat sâng mai kat gene chang ’ngkai ze kechum kau gai di de lei.

⁹Penui ruage hanggesame ne Tingwang je kedak bei ze henêu ramme ne penui je tew’nsiakam’ndibe gum ze anui â Tingwang je kedak me ra lei;

¹⁰zai kerai de kerai me ra lei, penui ruage hanggesame ne kerai ze bam bei ze chi Tewka’nsiapeu (angel) zene penui je tew’nsiakam’ndibe gum zeu.

¹¹Chunage airamme ze penui hangge ’ntîng ra teiliabe hang gum ze penui dage wangchang gai de lei, kane rehei tudkairabe mi dage wangchanggaidime, anui hangge mâ-geteiliarabe hang chi ramme rawkeu gai bei de lei.

¹²Chipauziegene mi-mige pa sap la lei ze ka’nningbe kau je peize ’ntîng le lau, makchai â pa kau gu lei.

¹³Miramme dage keduaibe wangmakbe zat zene ningnui dage wang me lei. Hera â lungsangtewbe kau lei, ningnui hutmakbe gene ningnui je duai ra pa ne pei ra mak lei, kane keduaibe wangbe ge chigene ’mbiarabe ’mpuî de pa ne pei gu lei, chidezai chi keduaibe ze ningnui lietui le ra hangge zeu.

¹⁴Chidaze I kehungme nung gau, heraluîtewbe je kakellumbe gene bamchâm de lau.

¹⁵Ziemmena mâ-’nningchime dage gum ze I sam salia de lei; I sam saliabe ze ningnui runne ningnui hang ’nningchi le lau.

¹⁶’Nnamgaibe piak chi anui ’nnamgaibe, chize Krista jai ge nguahedamlube mak ti lau? Chi tingku anui tiapânggaibe ze Krista pum ge nguahedamlube mak ti lau?

¹⁷Tingku kat bambe ziegene anui misonggame bau ze pum kat chang lei, chi tingku kat gene anui ’nteumena nguateube ziegeneu.

¹⁸Israelme tâtewbe tak ze ’nning gai ni lau; herâtewbe gu mâ-mâ-teume ze herâtewbe-kaira ge tâtewkaheruame mak ti lau?

¹⁹Chidaze I ’ndaikau sa gai ra lau? Heraluîtewbe ramme dage hetak peipatkaibe ze mahangge â chang semei, nune chi heraluîtewbe ze mahangge â chang semei?

²⁰Ga lei, herasie ’nchuimakme ne herâtewgaibe ze â Hera dage pei gai mak ze herasiabe ramme dage peigaibe hang I ne chak kai lei. Ningnui ne herasiabe meri ramme chang ze bamrabe ze I â nei me lei.

²¹Heguangpeu gu hepiak benai herasiabe ramme gu hepiak ze ningnui sakchi lak lei. Heguangpeu gu mâ-teube bâmra gene benai herasiabe ramme gu mâ-teube bâmra gene ningnui mâ-teuheruachi lak lei.

²²Heguangpeu hemimeurabe hang anui ne chiam gai ra semei? Pa sua â anui mi ranchi semei?

²³“Mâgetaleine tew ra lun kam de lei,” kane mâgetaleine â ’nnang kam me lei. “Mâgetaleine tew ra lun kam de lei,” kane mâgetaleine ne mi je teichu me lei.

²⁴Peize mi ne du pe hang yirabe peu se lau, kane pe ramname yirabe hang peu lau.

²⁵Mâ ’nning ze mâ de sam ’nneusua mak ze hemei zuabe chaiki ge kezuabe zat leine teu kam lau.

²⁶“Kedeirei benai pelung ge kebambe zat leine ze Tingwang gu kam di daseu.”

²⁷Hera je neimakme ruage mige ne ningchu mâ-teu ra kû bei ze, zai nang tatnei dizai â ning lungge keyi-kesia chibe gene mâ de sam’nneu makse teu ra kaipatbeibe leine ze teu lau.

²⁸(Kane mige ne ningnui je, “Aize a heraluîtewbe ge peipatkai’ndibe kau de lei,” acheu dizai â chi ziemmena ningnui je mâ-ranggaipeu ne ’nninggairabe hanggene benai mâ-’nningtui’nruigairabe hang ziegene—

²⁹chi kacheube ze nang ne mâ-’nningtui’nruigaibe gene mak ze, pa ne mâ-’nningtui’nruigairabe hanggene— chize tew gai se lau.) ’Ndaitew ze miramme dage hejeusiabe zene I lungzeunetewbe peireige rezietei ze tâtew bam ra lau?

³⁰Hera dage a suiyibe sam paugailube chângge I mâ-teu dizaine â ’ndaitew ze chi a suiyibe sam paugaibe merua deu hanggene mige ne achu ki’nsia dai ra lau?

³¹Chigum ze, ningnui mâ-keteube ge mei, nu kesakbe ge mei, nu mâ-tâtewbe ge mei, mâleine ge Hera ngeudi ra hangge tew lau.

³²Judame je mei, nu Grikme je mei, nu Hera gu (pe) kiangname je mei ze mî je de tewkaurabe pei gai se lau,

³³I penui je tew’nring gai be ra hangge a hang giera-rabe peu mak kane misonggame hang gierabe peu ze I tâtewbe leine ge ziemmena ’nteumena suigut tew ra heka ze I tew gum zeu.