Read Zeme Naga 1 KORINTHME 11 Bible Online

1 KORINTHME 11 - Zeme Naga bible

1 KORINTHME 11

¹I ne Krista tak kaheli gum ze ningnui a tak kahelime chang lau.

²Ningnui ne mâgetaleine ge achu ’ngngaî makse, ningnui je I ne geteigaibeibe sie suibambe ziegene ningnui je I toa lei.

³Kane ningnui je peize aize chîdesi ra I lunei lei, Krista ne ’mpeumi leine peî chang lei, zai ’mpeumi ne ’mpuimi peî chang lei, zai Hera ne Krista peî chang lei be zeu.

⁴’Mpeumi mi-mige baudime ruage pa kakellumbe luage mei, nune samsabe luage mei ze pe peî dumbe kau â pe peî pa tewka’nchei lei,

⁵kane ’mpuimi mi-mige baudime ruage pa kakellumbe luage mei, nune samsabe luage mei ze pe peî ’ngkummakbe kau â pe peî tewka’nchei lei, chize â pe peî gut’ndibe riâ chang lei.

⁶’Mpuimi ne pe peî ’ngkum mak ra dizai â pa pe peîtam gutzut ne ra lei; kane ’mpuimi hangge hetamgutbe ze heluîlabe chang zai â, peize pa ne pe peî ’ngkumnam lau.

⁷’Mpeumi â pe peî dumnam me ra lei, pa â Hera luî benai Hera ngeudibe changbe ziegeneu; kane ’mpuimi â ’mpeumi ngeudibe chang lei.

⁸(’Mpeumi je â ’mpuimi dagene ’ndampat me lei, kane ’mpuimi je â ’mpeumi dagene ’ndampat lei.

⁹Chipau peireige du ’mpeumi je â ’mpuimi hangge ’ndam gai me lei, kane ’mpuimi je â ’mpeumi hangge ’ndam gai daseu.)

¹⁰Chidadege ’mpuimi â pe peî ge hepeî’ngkum bam ra yi sing lei, angelme ziegeneu.

¹¹Acheuleusedu, Heguangpeu dagene ’mpuimi â ’mpeumi ga ze bamchi lak zai ’mpeumi du ’mpuimi ga ze bamchi lak lei;

¹²’mpuimi je â ’mpeumi dagene ’ndampat kai gum ze, ’mpeumi je du ’mpuimi dagene lungkeu gai lei. Zai mâgetaleine Hera dagene pat kam lei.

¹³Ningnui runne ningnui hangge ’nningchi le lau; ’mpuimi ne pe peî ’ngkum makse Hera je kakellumbe betâu se mei?

¹⁴’Mpeumi ne hetam pungka’ntiebe â pechu peluîtewlabe chang lei,

¹⁵kane ’mpuimi ne hetam pungka’ntiebe â pe hangge pa’nrîmyibe chang lei be ziemmena kebambe sietak zene ningnui je geteilia mak semei?

¹⁶Mi-mige ne aipau tedeu ge samtube lazai â, mâkedabe tewrabe tak â anui â chî me lei, zai Hera gu bekiangname du tew me lei.

¹⁷Ai geteiliabe sam ramme peibe ge ningnui je I toa me lei, ningnui wangka’nduibe ge mâ-yibirabe tew mak ze sia’nteu ra tew ze bambe ziegeneu.

¹⁸Railangbe bâm ge ningnui herakiangname wangka’nduibe ting ge ningnui ruage pebau ramme châmpatbe rasam I seuchang de lei; zai chize gêsa â gesang ra I ’nnum gai lei,

¹⁹ningnui ruage pelingtewme je chîdesi le ra hangge ningnui ruage pebau pungchâmpatbe ramme â bam sing ra chang di de lei.

²⁰Ningnui wangka’nduibe luage ningnui mâ-teube ze â Heguangpeu gu muîteseu teube zat hang â chang me lei.

²¹Mâ-teube ge teuraînei-’nsa ze hangkat ’njei ze bam zai kêdapeu meneu lu bamdibe ziegeneu.

²²’Ndaigum ze lau! Ningnui teu-sakkairabeki hangge ga di de mei? Nune Hera gu herakiangname je ngau’nna ze kegame je ningnui tewhelêu gai mei? Ningnui je I ’ndaikau sa gai ra se lau? Aipau deu ge ningnui je I toa gai ra mei? Mak lei, I toa gai ra mak lei.

²³Ningnui je du I mâ-geteiliabe sam peigaibe ze Heguangpeu dagene I ngau de lei, chize Heguang Isua ne pechu zua’ndibe mai tingmuî ge tingku lu lu ze,

²⁴Hera dage pe suiyibe sam pau gai lu dege, chize tewpâng gai de lei, zai acheu sa ze, “Aize a pum lei, chize ningnui hangge changbe zeu, achu chibam ra hang aipau tâ ze tew bam lau,” kacheu de lei.

²⁵Chipau luigum ze muîteseu mâ-teulube chângge pa ne hepiak ze du lu lu acheu sa ze, “Aipau piak ze a jai gene samhatkaibe karchibe lei. Achu chibam ra aize ningnui sak tânege aipau tâ ze tew bam lau,” ze kacheu de lei.

²⁶Aipau tingku ze ningnui teu zai aipau piak ze ningnui sak tânege Heguangpeu kechaibe rasam ze ningnui ne pa wangkeube mai riâ paube chang de lei.

²⁷Chipauziegene mi-mige du buimakbe luilungtak gene Heguangpeu gu tingku ze teu mei, nune hepiak sak mei be kau â, Heguangpeu pum benai pe jai ze tewhebâgaibe hangge kemaube chang ze bam gu lei.

²⁸Peize ziemmena ne pe runne pechu kedak’mmi le lau, chigumbe gene tingku ze teu zai hepiak ze sak lau.

²⁹Mige chi Bepum peireige ’nningtui’nrui gai mak ze tingku ze teu zai hepiak ze sakbe kau â, chipau luage pa ne pe runne pe peireige samrambe teiwang gai de lei.

³⁰Chipauziegene ningnui ruage misonggame ne heran-ga ze ’nrâ ze bam lei, zai hanggesame ne chai lei.

³¹Kane anui ne gesangsing ze mi runne mi je samramchi ze bam dizai â, anui je samram gai ra mak lei.

³²Kane Heguangpeu ne anui je samramgaibeibe luage anui je â deiliâ ze tewsâ gai bei de lei, chidezai kedeireime dage anui je â nguatew’ngkui gai mak ra hangge zeu.

³³Chidaze a puiname gau, ningnui mâ-teu ra wang’ndui dezai kat-kat ma-heleukuâ lau—

³⁴mi-mige ne ’njei dizai â peize pechu â kilûng gene teu le lau—makchai â ningnui wangka’nduibe ze tew’ngkuirabe chang gu lei. Zai kêdabe tedeu ramme hangge â I wang dezai nguagechiauliâ gu lei.