Read Zeme Naga 1 KORINTHME 13 Bible Online

1 KORINTHME 13 - Zeme Naga bible

1 KORINTHME 13

¹Ziemmename gu hekuâ-helad ramme benai angelme gu gene I sam sa lu, kane a dage kehungbe ga dizai â, I ze mâ-ka’nrabe kuâ benai ’ntoî kakebiengbe kuâ chang lei.

²Zai a dage sam paurabe rezie bam lu, zai chîlakbe benai mâ-mâ gechîbe leine ’nningchi kam lu, zai kedeiloa ramme puikeli ra a dage keneibe bam lu, kane kehungbe ga dizai â I ze matâu hang ga de lei.

³A gu kebam leine ze peipat kam lu, zai a pum du hemi ne rû ne ra peipat lu, kane a dage kehungbe ga dizai â, I mâ de giepat me lei.

⁴Kehungbe â liechi zai ’nggiachi lei; kehungbe â hemimeu mak zai kedikuâ-kua mak lei;

⁵kehungbe â kechî-kedijaîtew mak zai kengang mak lei; kehungbe â mi hang ’nchi-chine ran mak lei; kehungbe â sianei mak zai helungsia bam mak lei;

⁶kehungbe â mâ-betâumakbe ge hesuiyigaihâ mak, kane mâ-ka’nzei geze pe suiyigaihâ lei.

⁷Kehungbe â mâgetaleine ge liechi, zai mâgetaleine ge ’nnum’mmi, mâgetaleine heguîkua, mâgetaleine ge hereuliechi ze bam lei.

⁸Kehungbe â mâdau de tud me lei; keliâbe sam pauruabe ramme â ga gai dai du lei; zai hekuâ-gechâmbe ramme â sau du lei; zai mâ-gechîbe ramme ze chî ra pei ta gu lei.

⁹Anui mâ-gechîbe ze â ’nsang mak zai anui gu keliâbe sam paube ramme ze du ’nsang mak lei;

¹⁰kane ka’nsangbe ze wang dezai ’nsangmakbe ze ga gai du daseu.

¹¹I hena ’ngka â napoine gum I sam sa, napoine gum mâ-’nning, napoine gum mâ-’nsap ze bam lei; I a suî-ting gai dege â, napoine besuitewmakbe luilungtak ramme ze â I sâu gai ’ndi de lei.

¹²Chuna â judageî gene anui mâ-ngauzimra-ra ze ngau de lei, kane bechâng dezai heju ne heju ngau gu lei. Chunage â bechui-chui ge runne I mâ-chi lei; kane bechâng dezai I chîwang kam gu lei.

¹³Chigum ze keneibe, kaheguîbe, kehungbe, airamme kechum â bam bam lei, kane airamme ruage dilangbe â kehungbe lei.